មន្រ្ដីជាន់ខ្ពស់ក្រសួងធនធានទឹក ដឹកនាំកិច្ចប្រជុំស្តីពីការចាប់ផ្តើមអនុវត្តគម្រោងការវាយ​តម្លៃ​ការ​វិនិយោគ នៃប្រព័ន្ធធារាសាស្ត្រនៅក្នុងប្រទេសកម្ពុជា

នៅព្រឹកថ្ងៃទី១២ ខែមករា ឆ្នាំ២០២៦ ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីដឹកនាំកិច្ចប្រជុំស្ដីពីការចាប់ផ្តើមអនុវត្តគម្រោង «ការវាយតម្លៃការវិនិយោគនៃប្រព័ន្ធធារាសាស្ត្រនៅកម្ពុជា» ដែលប្រព្រឹត្តទៅនៅសាលប្រជុំរំដួល នៃទីស្ដីការក្រសួងធនធានទឹក និងឧតុនិយម ដោយមានការចូលរួមពីឯកឧត្តម លោក លោកស្រី មកពីនាយកដ្ឋានពាក់ព័ន្ធ សរុបប្រមាណ៤០រូប។

សូមជម្រាបថា កិច្ចប្រជុំនេះមានគោលបំណង ដើម្បីពិភាក្សា និងស្វែងយល់ពីគម្រោងការវាយតម្លៃការវិនិយោគនៃប្រព័ន្ធធារាសាស្ត្រនៅកម្ពុជា ដែលអនុវត្តស្របតាមចក្ខុវិស័យនៃរាជរដ្ឋាភិបាល ក្នុងកិច្ចប្រជុំអន្តរក្រសួងនៅក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៥ ខែមីនា ឆ្នាំ២០២៥ និងស្របតាមផែនទីបង្ហាញផ្លូវកម្មវិធីគ្រប់គ្រងធនធានទឹកប្រកបដោយភាពធន់នឹងអាកាសធាតុនៅកម្ពុជា ហើយដែលផ្តល់ភារកិច្ចឱ្យក្រសួងធនធានទឹក និងឧតុនិយម ដឹកនាំការវាយតម្លៃគ្រប់ជ្រុងជ្រោយលើការវិនិយោគនៃប្រព័ន្ធធារាសាស្ត្រ និងពង្រឹងការសម្របសម្រួលអន្តរក្រសួងលើកិច្ចការសន្តិសុខទឹក។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា គម្រោងនេះដឹកនាំអនុវត្តដោយក្រសួងធនធានទឹក និងឧតុនិយម ដោយមានការគាំទ្រពីរដ្ឋាភិបាលអូស្ត្រាលី តាមរយៈភាពជាដៃគូទឺកអូស្ត្រាលី(AWP) និងជំនួយបច្ចេកទេសពីមជ្ឈមណ្ឌលអន្តរជាតិសម្រាប់ការគ្រប់គ្រងបរិស្ថាន(ICEM) ។ ឯកឧត្តមរដ្ឋលេខាធិការ បានបញ្ជាក់បន្ថែមថា គម្រោងនេះនឹង៖ ១)ពង្រឹងដល់ការសម្រេចចិត្តដោយផ្អែកលើភស្តុតាង ក្នុងការគ្រប់គ្រងធនធានទឹក ២)បង្កើតវិធីសាស្រ្ដ និងអនុវត្តសាកល្បងលើការធ្វើបច្ចុប្បន្នភាពនៃបញ្ជីសារពើភណ្ឌប្រព័ន្ធធារាសាស្ត្រ ៣)ពង្រឹងការសម្របសម្រួលប្រព័ន្ធគ្រប់គ្រងទិន្នន័យធារាសាស្ត្រ ៤)វាយតម្លៃការវិនិយោគនៃប្រព័ន្ធធារាសាស្ត្រដែលមានស្រាប់ និងដែលកំពុងរៀបចំ ៥)ពង្រឹងប្រតិបត្តិការ ការថែទាំ និងការសងថ្លៃ (Cost Recovery) សម្រាប់ហេដ្ឋារចនាសម្ព័ន្ធធារាសាស្ត្រ និង ៦)បញ្ចូលភាពធន់នឹងអាកាសធាតុ និងអភិបាលកិច្ចប្រកបដោយបរិយាបន្ន ក្នុងការរៀបចំផែនការធារាសាស្ត្រ។

សូមបញ្ជាក់ថា លទ្ធផលនៃការវាយតម្លៃនេះនឹងគាំទ្រដោយផ្ទាល់ដល់ការរៀបចំយុទ្ធសាស្ត្រ និងផែនការមេធនធានទឹកជាតិ ដោយធានាថា ការវិនិយោគនាពេលអនាគតត្រូវផ្អែកលើទិន្នន័យជាក់លាក់ វាយតម្លៃពីហានិភ័យនៃអាកាសធាតុ និងមាននិរន្តរភាពយូរអង្វែង។ គម្រោងនេះមានរយៈពេល ១៣ខែ ហើយការវាយតម្លៃនេះនឹងផ្ដល់នូវការតម្រង់ទិសក្នុងការអភិវឌ្ឍប្រព័ន្ធធារាសាស្ត្រ គាំទ្រការរៀបចំផែនការអន្តរក្រសួង និងបង្កើតបណ្តាញគម្រោងវិនិយោគនៃប្រព័ន្ធធារាសាស្ត្រជាតិប្រកបដោយភាពជឿជាក់ ព្រមទាំងជាជំហានដ៏មានសារៈសំខាន់មួយក្នុងការពង្រឹងសន្តិសុខទឹក និងគាំទ្រដល់ការអភិវឌ្ឍប្រព័ន្ធធារាសាស្រ្តឱ្យមានភាពធន់ទៅនឹងការប្រែប្រួលអាកាសធាតុ៕