ឆ្នាំ២០២៥ គម្រោងចំនួន២២ របស់ក្រសួង ស្ថាប័នចំនួន១៣ ត្រូវបានអនុម័ត ហើយបាននិងកំពុងអនុវត្តយ៉ាងសកម្ម

ក្នុងក្របខ័ណ្ឌនៃការអនុវត្តប្រព័ន្ធលើកទឹកចិត្គគាំទ្រសមិទ្ធកម្ម ក្នុងឆ្នាំ២០២៥ ក្រសួង ស្ថាប័នចំនួន១៣ កំពុងអនុវត្តគម្រោងចំនួន២២ ដែលបាន និងកំពុងលេចចេញនូវសមិទ្ធកម្មជាក់ស្តែងជាបន្តបន្ទាប់ ហើយផ្តល់ជាប្រយោជន៍ដល់ការរៀបចំគោលនយោបាយ និងការផ្តល់សេវាជូនប្រជាជនពិតប្រាកដ។ គម្រោងទាំង២២ ត្រូវបានអនុវត្តក្នុងមុខសញ្ញាចំនួន ៦រួមមាន៖ (១)ការដ្ឋានកែទម្រង់វិធានការគន្លឹះរបស់រាជរដ្ឋភិបាល (២)វិធានការគន្លឹះក្នុងវិស័យអប់រំ​ (៣)វិធានការគន្លឹះក្នុងវិស័យសុខាភិបាល (៤)វិធានការគន្លឹះក្នុងវិស័យកសិកម្ម (៥)ការរៀបចំគោលនយោបាយ​ និង(៦)ការរៀបចំផែនការ​ និងស្ថិតិ។

គួរជម្រាបថា ការអនុវត្តប្រព័ន្ធលើកទឹកចិត្តគាំទ្រសមិទ្ធកម្ម ក្នុងរដ្ឋបាលសាធារណៈ ប្រកបដោយសង្គតិភាព ជាការអនុវត្តឈរលើមូលដ្ឋានយុទ្ធសាស្ត្របញ្ចកោណ ដំណាក់កាលទី១ និងជាការអនុវត្តវិធានការគន្លឹះទី៣ នៃការការទម្រង់រដ្ឋបាលសាធារណៈ។ ការអនុវត្តវិធានការគន្លឹះទី៣នេះ ត្រូវបានធ្វើឡើងក្នុងគោលបំណងរៀបចំប្រព័ន្ធលើកទឹកចិត្តគាំទ្រសមិទ្ធកម្មមួយដែលជាក់លាក់សម្រាប់រដ្ឋបាលសាធារណៈនៅកម្ពុជា។ ប្រព័ន្ធនេះមានការកំណត់អំពីគោលការណ៍ យន្តការ និងនីតិវិធីនៃការស្នើសុំ ការអនុម័ត និងការអនុវត្តប្រព័ន្ធលើកទឹកចិត្តគាំទ្រសមិទ្ធកម្មច្បាស់លាស់ ពោលជាគម្រោងដែលមានសមិទ្ធកម្មហើយផ្តល់ប្រយោជន៍ជាក់លាក់ ពិតប្រាកដជូនប្រជាពលរដ្ឋ។