គណៈកម្មាធិការជាតិគ្រប់គ្រងគ្រោះមហន្តរាយ និង UN Women ធ្វើ «កម្មវិធីកិច្ចសន្ទនាគោលនយោបាយ ស្តីពីការអនុវត្តផែនការសកម្មភាពជាតិសម្រាប់ការកាត់បន្ថយហានិភ័យគ្រោះមហន្តរាយ ២០២៤-២០២៨ ដើម្បីជំរុញការអនុវត្តដែលឆ្លើយតបទៅនឹងយេនឌ័រ ស្របតាមក្របខ័ណ្ឌសេនដាយ និងអនុសញ្ញាស៊ីដ»

ភ្នំពេញ៖ ថ្ងៃទី២២ ខែមករា ឆ្នាំ២០២៦ គណៈកម្មាធិការជាតិគ្រប់គ្រងគ្រោះមហន្តរាយ សហការជាមួយ UN Women បានរៀបចំ «កម្មវិធីកិច្ចសន្ទនាគោលនយោបាយ ស្តីពីការអនុវត្តផែនការសកម្មភាពជាតិសម្រាប់ការកាត់បន្ថយហានិភ័យគ្រោះមហន្តរាយ ២០២៤-២០២៨ ដើម្បីជំរុញការអនុវត្តដែលឆ្លើយតបទៅនឹងយេនឌ័រ ស្របតាមក្របខ័ណ្ឌសេនដាយនិងអនុសញ្ញាស៊ីដ» ក្រោមអធិបតីភាពរបស់ ឯកឧត្តម គីម វីរៈ អនុប្រធាន និងជាអគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ នៅសណ្ឋាគារកាំបូឌីយ៉ាណា ។

កម្មវិធីនេះមានការអញ្ជើញចូលរួមពី លោកជំទាវ សុវណ្ណ បុទុម រដ្ឋលេខាធិការ ក្រសួងកិច្ចការនារី,លោកស្រី ឃុន សុភា អ្នកសម្របសម្រួលប្រចាំប្រទេស UN Women នៅកម្ពុជា, ថ្នាក់ដឹកនាំ និងសមាសភាពមកពីក្រសួង-ស្ថាប័នពាក់ព័ន្ធ អង្គការសង្គមស៊ីវិល ដៃគូអភិវឌ្ឍន៍ ជាតិ-អន្តរជាតិ សរុបចំនួនប្រមាណ ៧៥នាក់។

កម្មវិធីនេះប្រព្រឹត្តទៅក្នុងគោលបំណងពង្រឹងការបញ្ជ្រាបយេនឌ័រនៅក្នុង DRR និងបង្កើតវេទិកាចែករំលែកសម្រាប់កិច្ចសហការប្រកបដោយនិរន្តរភាព ជាពិសេសដើម្បីពង្រឹងការអនុវត្ត និងការត្រួតពិនិត្យផែនការសកម្មភាពជាតិសម្រាប់កាត់បន្ថយហានិភ័យគ្រោះមហន្តរាយតាមរយៈវិធីសាស្រ្តឆ្លើយតបទៅនឹងយេនឌ័រនិងបរិវត្តកម្មយេនឌ័រ ដែលស្របទៅនឹងក្របខណ្ឌសេនដាយ និងអនុសញ្ញាស៊ីដ ព្រមទាំងបង្កើនការចូលរួមលើកកម្ពស់ការប្ដេជ្ញាពីក្រសួង-ស្ថាប័ន ភាគីពាក់ព័ន្ធ។