រដ្ឋមន្រ្តីក្រសួងការពារជាតិអាមេរិក៖ អាមេរិកនៅតែមានចំណាប់អារម្មណ៍ធ្វើការជាមួយ​សម្តេចតេជោជានិច្ច

លោក ឡយ ជេម អូស្ទីន(Lloyd James Austin) រដ្ឋមន្រ្តីការពារជាតិសហរដ្ឋអាមេរិក បាន​ប្រកាសថា សហរដ្ឋអាមេរិកនៅតែមានចំណាប់អារម្មណ៍ធ្វើការជាមួយសម្តេចតេជោ ហ៊ុន សែន ប្រធាន​ព្រឹទ្ធសភា និង ជាអតីតនាយករដ្ឋមន្រ្តីកម្ពុជា ជានិច្ចដើម្បីពង្រឹងទំនាក់ទំនងរវាងកម្ពុជា និង​អាមេរិក ហើយមួយវិញទៀត លោកសង្ឈឹមថា អាមេរិកអាច​នឹង​ជួយ​ពង្រឹង​សន្តិសុខ​របស់​កម្ពុជា​ផងដែរ។

តាមរយៈសារលិខិតថ្លែងអំណរគុណដល់សម្តេចតេជោ ហ៊ុន សែន នាថ្ងៃទី៦ ខែមិថុនា ឆ្នាំ​២០២៤នេះ លោក ឡយ ជេម អូស្ទីនលើកឡើងថា លោកសូមថ្លែងអំណរគុណ ដល់​សម្តេច​តេជោ ហ៊ុន សែន ដែលបានស្វាគមន៍លោកនៅកម្ពុជាលើកទីពីរ ហើយលោក​ក៏​បាន​សម្តែង​ក្តី​រីករាយ​ផង​ដែរ ដែលបាន ជួបពិភាក្សាការងារជាមួយសម្តេចតេជោជាលើកទីពីរនោះ។

ក្នុងសារលិខិតថ្លែងអំណរគុណនេះលោកឡយ ជេម អូស្ទីន បានបញ្ជាក់ថា«ដូចអ្វីដែលខ្ញុំបាន លើក​ឡើងនៅក្នុងជំនួបរបស់យើង សហរដ្ឋអាមេរិក​នៅ​តែមាន​ចំណាប់​អារម្មណ៍​ធ្វើ​ការ​ជាមួយ​សម្តេច​ប្រធានព្រឹទ្ធសភា ដើម្បីពង្រឹងទំនាក់ទំនងរវាងប្រទេសយើងទាំងពីរ។ ខ្ញុំសង្ឃឹម​ថា​សហរដ្ឋ​អាមេរិក​អាច​ជួយកម្ពុជា ពង្រឹងសន្តិសុខរបស់ខ្លួន ទៅតាមរបៀបដែល​ផ្តល់​ផល​ប្រយោជន៍​ដល់​ប្រជាជន​កម្ពុជា»។

តាមរយៈសារលិខិតថ្លែងអំណរគុណដល់សម្តេចតេជោ ហ៊ុន សែន ដដែលនេះ រដ្ឋមន្រ្តីក្រសួងការ ពារ​ជាតិអាមេរិករូបនេះបានសង្កត់ធ្ងន់ទៀតថា «ខ្ញុំសូម​វាយ​តម្លៃ​ខ្ពស់​ចំពោះ​ចម្លើយ​ដ៏​ស្មោះត្រ​ង់​មិន​លាក់លៀមរបស់សម្តេចតេជោ ចំពោះសំណូមពរបស់ខ្ញុំ។ ខ្ញុំសង្ឃឹម​ថា​នឹង​បន្ត​កិច្ច​ពិភាក្សា​អំពី​មធ្យោបាយ​ដ៏ល្អបំផុត ក្នុងការជំរុញកិច្ចសហប្រតិបត្តិការទ្វេភាគីរបស់យើង ហើយខ្ញុំ​ទន្ទឹង​រង់ចាំ​នូវ​ទំព័រ​ថ្មី​នេះ នៃទំនាក់ទំ នងការពារជាតិរបស់ប្រទេសយើងទាំងពីរ»។

សូមបញ្ជាក់ថា លោកឡយ ជេម អូស្ទីន រដ្ឋមន្រ្តីក្រសួងការពារជាតិអាមេរិកបានមកបំពេញទស្សន កិច្ច​នៅកម្ពុជា ជាផ្លូវការនៅកម្ពុជាកាលពីដើមខែមិថុនា ឆ្នាំ២០២៤កន្លងទៅនេះ ខណៈដំណើរ​ទស្សន​កិច្ចរបស់លោកគឺបានជួបពិភាក្សាការងារជាមួយសម្តេចតេជោ ហ៊ុន សែន ប្រធាន​ព្រឹទ្ធសភា​កម្ពុជា ជួបជាមួយ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជួប​ជា​មួយ​ឧប​នាយករដ្ឋមន្រ្តី រដ្ឋមន្រ្តីក្រសួង ការពារជាតិកម្ពុជា នាយឧត្តមសេនីយ៍ ទៀ សីហា។ នៅក្នុង​កិច្ច​ជំនួប​រវាងថ្នាក់ដឹកនាំកំពូលកម្ពុជា លោក ឡយ ជេម អូស្ទីន បានសន្យា​អាមេរិក​នឹង​ពង្រឹង​កិច្ច​សហ​ប្រតិបត្តិការទ្វេភាគីជាមួយកម្ពុជាឲ្យកាន់តែល្អ ប្រសើរឡើងវិញ ជាពិសេសវិស័យយោធា បន្ទាប់​ពីមានភាពថមថយក្នុងរយៈពេលប៉ុន្មានឆ្នាំចុងក្រោយនេះ៕ អត្ថបទ៖ បាន ចក់