មន្ទីររ៉ែខេត្តបាត់ដំបង អំពាវនាវពលរដ្ឋកុំទិញប្រេងស្តុកទុកនាំបង្កហានិភ័យ

លោក លឹម ប៊ុនលី ប្រធានមន្ទីររ៉ែ និងថាមពលខេត្តបាត់ដំបង បាន​អំពាវ​នាវ​ដល់​បង​ប្អូន​ប្រជា​ពលរដ្ឋ​​សូ​ម​កុំទិញប្រេងស្តុកទុកក្នុងពីដុងជ័រដែលអាចបង្កហានិភ័យ ខណៈ​បច្ចុប្បន្ន​នេះ​ប្រេង​មាន​គ្រប់​គ្រាន់​សម្រាប់ផ្គត់ផ្គង់តម្រូវការប្រើប្រាស់ប្រចាំថ្ងៃ។

លោក លឹម ប៊ុនលី គូសបញ្ជាក់ថា នៅទូទាំងខេត្តបាត់ដំបងមានស្ថានីយប្រេងឥន្ធនៈ៣៨៧ស្ថានីយហើយប្រេងក្នុងស្តុកមានគ្រប់គ្រាន់សម្រាប់ផ្គត់ផ្គង់ដល់អតិថិជន។

លោកប្រធានមន្ទីរ អំពាវនាវដល់ក្រុមហ៊ុនផ្គត់ផ្គង់ប្រេងត្រូវលក់ប្រេងទៅឱ្យស្ថានីយដែលជាដៃគូរបស់ខ្លួនឱ្យបានទាន់ពេលវេលា។លោកអំពាវនាវទៅដល់ស្ថានីយលក់ប្រេងនៅទូទាំងខេត្តបាត់ដំបងត្រូវលក់ប្រេងទៅតាមតម្លៃដែលកំណត់ដោយក្រសួងពាណិជ្ជកម្ម កុំឆ្លៀតឱកាសដំឡើងថ្លៃ ប្រសិនបើម្ចាស់ស្ថានីយណាធ្វើខុសច្បាប់ដូចជាលក់ក្នុងតម្លៃខុសគោលការណ៍ក្រុមហ៊ុនធំ ឬរដ្ឋកំណត់ ឬមានប្រេងតែមិនបើកលក់នោះ ក្រសួងនឹងដកវិញ្ញាបនបត្រឈប់ឱ្យប្រកបអាជីវកម្មតទៅទៀត។

សូមជម្រាបថា បច្ចុប្បន្ននេះតំណាងស្ថានីយប្រេងឥន្ធនៈធំៗនៅក្នុងខេត្តបាត់ដំបងបានអនុវត្តន៍ការលក់ប្រេងទៅតាមតម្លៃកំណត់របស់ក្រសួងពាណិជ្ជកម្មពុំមានការដំឡើងថ្លៃនោះទេ។

មន្ទីររ៉ែ និងថាមពល មន្ទីរពាណិជ្ជកម្ម និងសាខាក.ប.បខេត្តបាត់ដំបងបាននិងកំពុងបន្តចុះតាមដាន ត្រួតពិនិត្យការលក់ជាប្រចាំ ដើម្បីធានាការលក់ និងជំរុញឱ្យស្ថានីយប្រេងឥន្ធនៈអនុវត្តឱ្យបានគត់មត់តាមលក្ខណៈស្តង់ដាបច្ចេកទេស និងបង្ការការឆ្លៀតឱកាសដំឡើងថ្លៃប្រេងឥន្ធនៈខុសប្រក្រតីជាដើម៕