កម្ពុជាចង់ឃើញកីឡាអាស៊ាន មានដៃគូអភិវឌ្ឍលើសពី ២ប្រទេស

ម្ពុជាបានបង្ហាញបំណងចង់ឲ្យវិស័យកីឡាក្នុងតំបន់អាស៊ាន មានដៃគូអភិវឌ្ឍន៍ឲ្យបានច្រើនលើសពី ២ប្រទេស ដើម្បីជំរុញការរីកចម្រើន និងសាមគ្គីភាពកាន់តែខ្លាំងក្លា។

នេះបើតាមប្រសាសន៍ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ក្រោយដឹកនាំកិច្ចប្រជុំ ស្ដីពីការត្រៀមធ្វើម្ចាស់ផ្ទះរៀបចំកិច្ចប្រជុំឧត្តមមន្ដ្រីកីឡាអាស៊ាន នាខែតុលា ឆ្នាំ២០២៦ និងកិច្ចប្រជុំថ្នាក់រដ្ឋមន្ដ្រីកីឡាអាស៊ាន នាឆ្នាំ២០២៧ ខាងមុខ នៅខេត្តសៀមរាប។

ក្នុងនាមម្ចាស់កិច្ចប្រជុំកំពូលកីឡាអាស៊ានទាំងពីរ កម្ពុជាបានត្រៀមធ្វើកិច្ចការជាច្រើន ដើម្បីជំរុញសកម្មភាពកីឡាក្នុងតំបន់ ហើយកម្ពុជាក៏ចង់ឃើញអាស៊ាន មានដៃគូអភិវឌ្ឍកាន់តែច្រើន ក្រៅពីដៃគូបច្ចុប្បន្ន រួមមានជប៉ុន និងចិន តួយ៉ាងការជំរុញឲ្យមានការចាប់ដៃគូជាមួយសាធារណៈរដ្ឋកូរ៉េ ដែលជាប្រទេសមានបទពិសោធន៍ច្រើន ក្នុងការការទូតកីឡា ក៏ដូចជាការបណ្ដុះបណ្ដាល នៃការអភិវឌ្ឍ និងស្រាវជ្រាវយុទ្ធគុនបុរាណជាដើម។

គួរដឹងថា មុនឈានដល់កិច្ចប្រជុំឧត្ដមមន្ដ្រីកីឡាអាស៊ាន និងរដ្ឋមន្ដ្រីកីឡាអាស៊ាន កម្ពុជានឹងត្រូវរៀបចំសិក្ខាសាលាកម្រិតតំបន់ចំនួន ២ ដើម្បីបំបេញលក្ខខណ្ឌ ក៏ដូចជាការបង្ហាញពីការត្រៀមលក្ខណៈធ្វើម្ចាស់ផ្ទះរួចរាល់ រួមមានសិក្ខាសាលាស្តីពីសកម្មភាពកីឡាអាស៊ាន-ជប៉ុន លើសមភាពយេនឌ័រ នៅខេត្តសៀមរាប កាលពីខែមករា និងសិក្ខាសាលាស្ដីពីការរៀបចំផែនការមេអាស៊ានកីឡា ឆ្នាំ២០២៦-២០៣០ ដែលគ្រោងរៀបចំនាថ្ងៃទី៣១ ខែមីនា និងថ្ងៃទី១ ខែមេសា ឆ្នាំ២០២៦ ខាងមុខ នៅរាជធានីភ្នំពេញ៕ អត្ថបទ លី ឈុនឡា