មន្ដ្រីសហព័ន្ធថា ការប្រកួតកាយសម្ព័ន្ធតាម Online នៅកូរ៉េ ជាឱកាសវាស់ស្ទង់សមត្ថភាពដ៏ល្អ ដោយបាច់ចំណាយ

ឯកឧត្តម ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានចាត់ទុកការ​ប្រកួត​លក្ខណៈ​អន្ដរជាតិ​តាម Online នៅសាធារណរដ្ឋកូរ៉េ គឺជាឱកាសមួយដ៏ល្អ ដើម្បីតាមដាន និង​វាស់​ស្ទង់​សមត្ថភាពកីឡាករ-កីឡាការិនីកម្ពុជា ជាមួយបណ្ដាប្រទេសជាច្រើនលើពិភពលោក ដោយ​មិនបាច់ចំណាយ ។

ការលើក​ឡើងនេះ បន្ទាប់ពីសហព័ន្ធ បានបញ្ជូនកីឡាករ-កីឡាការិនីចូលរួមកម្មវិធី  Korea OPEN AEROBIC Gymnastics Video Online Competition 2024 កាល​ពីចុងសប្ដាហ៍​កន្ល​ងទៅ និងទទួលបានមេដាយ ២គ្រឿង រួមមានមេដាយប្រាក់ ១ លើវិញ្ញាសា Trio (ទ្រីយ៉ូ) ដោយ​កីឡា​ការិនី ស៊ីវ ចន្ថា, ឌឹម អ៊នធីតា និង ណេម សុខហេង និងមេដាយសំរឹទ្ធ ១ លើវិញ្ញាសា​ក្រុម​នារី ដោយកីឡាការិនី ម៉ូ ស្រីពៅ, ស៊ីវ ចន្ថា, ឌឹម អ៊នធីតា, ណេម សុខហេង និង ឈូន សុវណ្ណបញ្ញា ។

ឯកឧត្តមបានបញ្ជាក់ថា កូរ៉េតែងរៀបចំកម្មវិធីនេះរៀងរាល់ឆ្នាំ ដោយ​តម្រូវ​ឲ្យ​បណ្ដា​ប្រទេស​ចង់ចូលរួម ថតជាវីដេអូ ហើយផ្ញើទៅចូលរួមប្រកួតប៉ុណ្ណោះ ។ ការធ្វើបែបនេះ មិនត្រឹមតែចំណេញ ដោយមិនបាច់ចំណាយលើការធ្វើដំណើរ និងស្នាក់នៅ-ហូបចុកនោះទេ ថែមទាំងមានឱកាសវាស់ស្ទង់សមត្ថភាពជាមួយបណ្ដាប្រទេសផ្សេងៗ លើពិភពលោក ជាក់ស្ដែងការប្រកួតលក្ខណៈអន្ដរជាតិតាម Online ឆ្នាំនេះ គឺមានអត្តពលិករហូតដល់ ៧៣០នាក់ មកពី ២១ប្រទេស និងគ្រប់ទ្វីបចូលរួម ។

ក្រៅពីការប្រកួត ក៏ដូចជាបង្ហាញសមត្ថភាពរបស់កីឡាករ-កីឡាការិនី ក៏ជាឱកាសសម្រាប់មន្ដ្រីបច្ចេកទេស ពិសេសអាជ្ញាកណ្ដាល-ចៅក្រម បានសិក្សារៀនសូត្រពីការប្រកួតអន្ដរជាតិនេះផងដែរ ដ្បិតរៀងរាល់ឆ្នាំ កូរ៉េតែងអញ្ជើញចៅក្រម ២រូបពីបណ្ដាប្រទេសចូលរួមទាំងអស់ ដើម្បីចូលរួមកាត់សេចក្ដីក្នុងការប្រកួតនេះ ហើយឆ្នាំនេះ សហព័ន្ធក៏បានបញ្ជូនចៅក្រម ២រូបចូលរួមផងដែរ គឺលោក សោ សុផេង និងកញ្ញា សោ សុគីម ៕

អត្ថបទ៖ លី ឈុនឡា