ក្រុមម៉ូតូទឹកកម្ពុជា ឈ្នះមេដាយ ៦គ្រឿង ក្នុងជុំទី១ នៃការប្រកួត WORLD SERIES 2024 នៅប៉ូឡូញ

ក្រុមកីឡាម៉ូតូទឹកជម្រើសជាតិកម្ពុជា ដឹកនាំដោយវីរកីឡាករ សាលី អ៊ូមើត និងជា​អគ្គ​លេខាធិការ​សហព័ន្ធ ដណ្ដើមបានមេដាយ ៦គ្រឿង ក្នុងព្រឹត្តិការណ៍ប្រណាំងម៉ូតូទឹកពានរង្វាន់​ពិភព​លោក ​WATERJET World Series 2024 ជុំទី១ នៅទីក្រុង Ostrow Warcki ប្រទេសប៉ូឡូញ រួមមាន​មេ​ដាយមាស ២ ប្រាក់ ២ និងសំរឹទ្ធ ២ បន្ទាប់ពីឆ្លងកាត់ការប្រកួតដ៏ស្វិតស្វាញរយៈពេល ៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៤ ។

ជាមួយការបើកទំព័រប្រកួតពានរង្វាន់ម៉ូតូទឹកពិភពលោកឆ្នាំនេះដែរ កីឡាករវ័យក្មេងកម្ពុជា សាលី ហ្វីលីន និង កៃ វ៉ាន់ស៊ីដែន នៅតែបន្ដធ្វើបានយ៉ាងល្អ ដោយដណ្ដើមបានមេដាយមាសរៀងៗខ្លួន ក្នុងនោះប្អូនប្រុសបង្កើតលោក សាលី អ៊ូមើត គឺកីឡាករ សាលី ហ្វីលីន ដណ្ដើមបានមេដាយមាស លើវិញ្ញាសា Expert Runabout 1100 Super Stock និងកីឡាករ កៃ វ៉ាន់ស៊ីដែន ដណ្ដើមបានមេដាយមាស លើវិញ្ញាសា Novice Ski Stock ។

ចំណែកប្រធានក្រុមម៉ូតូទឹកកម្ពុជា កីឡាករ សាលី អ៊ូមើត ដណ្ដើមបានមេដាយ ២គ្រឿង រួមមានមេដាយប្រាក់ ១ លើវិញ្ញាសា Pro AM Runabout 1100 Open និងមេដាយសំរឹទ្ធ ១ លើវិញ្ញាសា Pro Sport GP ។ រីឯសិស្សប្អូន ម៉ីន មូសស្ដាន ដណ្ដើមបានមេដាយប្រាក់ លើវិញ្ញាសា Novice Runabout 1100 Stock និងកីឡាករ ម៉ីន អូស្មាន់ ដណ្ដើមបានមេដាយសំរឹទ្ធ លើវិញ្ញាសា Novice Ski Stock ។

ក្រោយបញ្ចប់បេសកកម្មនៅទឹកដីអឺរ៉ុបនេះ ក្រុមកីឡាម៉ូតូទឹកកម្ពុជា នឹងត្រូវត្រៀមចូលរួមការប្រកួតជុំទី២ នៃព្រឹត្តិការណ៍ WATERJET World Series 2024 ដដែល នៅសហរដ្ឋអាមេរិក នាដើមខែតុលា មុនឈានដល់ការប្រកួតជុំផ្ដាច់ព្រ័ត្រ នៅប្រទេសថៃ នាខែធ្នូ ឆ្នាំ២០២៤ ខាងមុខ ខណៈការប្រកួតជុំទី៣ ផងដែរ នឹងមានព្រឹត្តិការណ៍ពីរួមគ្នា ពោលគឺការប្រកួតជុំផ្ដាច់ព្រ័ត្រជើងឯកអាស៊ី Asian Championship ឆ្នាំ២០២៤ បន្ទាប់ពីការប្រកួតជុំទី១ នៅទីក្រុង Osaka ប្រទេសជប៉ុន កាលពីដើមខែមិថុនាកន្លងទៅ៕

អត្ថបទ៖ លី ឈុនឡា