ទំនិញកម្ពុជាចំនួន ១៥៤បន្ទាត់ពន្ធគយ ទទួលបានការលើកលែងពន្ធនាំចូលពីអាមេរិក

មន្ត្រីជាន់ខ្ពស់ក្រសួងពាណិជ្ជកម្ម បានបញ្ជាក់ថា សហរដ្ឋអាមេរិក ទើបបានសម្រេចក្នុងការលើកលែងពន្ធនាំចូលលើទំនិញមួយចំនួនរបស់កម្ពុជា។

ការបញ្ជាក់ឲ្យដឹងបែបនេះ របស់លោក ស៊ឹម សុខខេង ធ្វើឡើងក្នុងសន្និសីទសារព័ត៌មាន ស្ដីពី «អត្រាពន្ធគយថ្មី ក្នុងការនាំចូលពីកម្ពុជា ទៅសហរដ្ឋអាមេរិក បន្ទាប់ពីការស៊ើបអង្កេតអនុលោមភាព នៃមាត្រា ៣០១ ច្បាប់ពាណិជ្ជកម្ម សហរដ្ឋអាមេរិក» នារសៀលថ្ងៃទី២៧ ខែកក្កដា ឆ្នាំ២០២៦។

ឯកឧត្តម ស៊ឹម សុខខេង រដ្ឋលេខាធិការ ក្រសួងពាណិជ្ជកម្ម បានថ្លែងថា សហរដ្ឋអាមេរិកបានសម្រេចផ្ដល់ការលើកលែងពន្ធនាំចូល ឬអត្រាពន្ធសូន្យ (Zero Tariff) លើមុខទំនិញរបស់កម្ពុជាចំនួន ១៥៤ បន្ទាត់ពន្ធគយ។ ការប្រកាសនេះគឺយោងតាមការកែប្រែអត្រាពន្ធគយថ្មីរបស់អាមេរិក បន្ទាប់ពីការស៊ើបអង្កេតអនុលោមភាពផ្នែកពាណិជ្ជកម្ម (Section 301)។

បើតាមឯកឧត្តម ស៊ឹម សុខខេង បានឱ្យដឹងថា មុខទំនិញអាទិភាពដែលទទួលបានពន្ធសូន្យរួមមាន៖ផលិតផលធ្វើដោយដៃ (Handicrafts)៖ ដូចជា ក្រមា មួក និងផលិតផលសិប្បកម្មដទៃទៀត។ ផលិតផលពីកម្ទេចឈើ៖ គ្រឿងប្រើប្រាស់ ឬទំនិញដែលកែច្នៃចេញពីកម្ទេចឈើ។ ផលិតផលវាយនភណ្ឌមួយចំនួន៖ ក្រៅពីសម្លៀកបំពាក់ទូទៅ និងផលិតផលរុក្ខជាតិ និងសត្វមួយចំនួន៖ ប្រភេទកសិផលដែលបានកំណត់។

ឯកឧត្តម ស៊ឹម សុខខេង បានបញ្ជាក់យ៉ាងដូច្នេះថា «ទំនិញរបស់យើងមានរហូតដល់ ១៥៤បន្ទាត់ពន្ធគយ ដោយក្នុងនោះក្រៅពីវាយនភណ្ឌ គឺផលិតដែលធ្វើដោយដៃ ឧទាហរណ៍៖ ក្រមា, មួក ជាដើម -ល- និងផលិតផល ដែលធ្វើចេញពីកំទេចឈើ នាំចេញទៅអាមេរិកពន្ធសូន្យ។ ក្រៅពីនេះ ក៏មានរុក្ខជាតិ និងសត្វមួយចំនួនផងដែរ ដែលស្ថិតក្នុងបន្ទាត់ពន្ធគយនេះដែរ»។

បន្ថែមពីនោះទៀត ឯកឧត្តម ស៊ឹម សុខខេង បានគូសបញ្ជាក់ថា ទំនិញផ្សេងៗទៀត ក្រុមការងារនឹងនៅតែបន្ដជំរុញរកសក្ដានុពល ដើម្បីអាចនាំចេញទៅកាន់ទីផ្សារសហរដ្ឋអាមេរិក ដោយគ្មានពន្ធនាំចូល គឺពន្ធសូន្យផងដែរ។

សូមជម្រាបថា សហរដ្ឋអាមេរិក នៅថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦ បានប្រកាសដាក់ពន្ធគយថ្មីលើប្រទេសចំនួន៦០ ជុំវិញការព្រួយបារម្ភពីការបង្ខំកម្លាំងពលកម្ម ហើយពន្ធគយថ្មីនេះនឹងជំនួសពន្ធគយសកល ១០ភាគរយប្រកាសដោយលោកប្រធានាធិបតី ដូណាល់ ត្រាំ កាលពីដើមឆ្នាំនេះដែលត្រូវផុតសុពលភាពនៅថ្ងៃសុក្រទី២៤ ខែកក្កដា។

សម្រាប់កម្ពុជាពន្ធគយថ្មីនេះ ក្នុងអត្រា១០% ទាបជាងប្រទេសជិតខាង ដូចជាថៃ និងវៀតណាម ដែលមានអត្រា ១២.៥%៕