ឧបនាយករដ្ឋមន្ត្រី ស៊ុន ចាន់ថុល៖ រាជរដ្ឋាភិបាលកំពុងខិតខំទាក់ទាញវិនិយោគិន មកវិនិយោគរោងចក្រផលិតក្រណាត់ប្រើប្រាស់វត្ថុធាតុដើមពីអាមេរិក

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានលើកឡើងថា រាជរដ្ឋាភិបាលកំពុងប្រឹកប្រេងទាក់ទាញវិនិយោគិនបង្កើតរោងចក្រផលិតក្រណាត់ ដែលប្រើប្រាស់វត្ថុធាតុដើមមានប្រភពមកពីសហរដ្ឋអាមេរិក​ ដូចជា កប្បាស និង អំបោះ ជាដើម ដើម្បីអាចទទួលបានការអនុគ្រោះពន្ធ MFN បូក សូន្យភាគរយ នៅពេលនាំចេញ​ផលិតផលកាត់ដេរពីកម្ពុជាទៅកាន់ទីផ្សារសហរដ្ឋអាមេរិក។ MFN គឺ​​ជាប្រទេសទទួលបានការអនុគ្រោះខ្ពស់បំផុត (Most-Favored-Nation)។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី បានថ្លែងក្នុងសន្និសីទសារព័ត៌មានស្តីពី «អត្រាពន្ធគយថ្មីក្នុងការនាំចូលពីកម្ពុជាទៅសហរដ្ឋអាម៉េរិក បន្ទាប់ពីការស៊ើបអង្កេតអនុលោមភាព នៃមាត្រា ៣០១ ច្បាប់ពាណិជ្ជកម្មសហរដ្ឋអាម៉េរិក» កាលពីថ្ងៃទី ២៧ កក្កដា ថា ប្រទេសកម្ពុជាគឺជាប្រទេសមួយក្នុស្ថិត​ងចំណោម ៤ប្រទេស (ឥណ្ឌូនេស៊ី,ម៉ាឡេស៊ី,បង់ក្លាដេស និងកម្ពុជា) ក្នុងពិភពលោក​ ដែលសហរដ្ឋអាមេរិកបានផ្តល់​​ភាពអនុគ្រោះពន្ធ MFN បូក សូន្យភាគរយ (ប្រទេសទទួលបានការអនុគ្រោះខ្ពស់បំផុត (Most-Favored-Nation-MFN) ប្រសិនបើរោងចក្រផលិតផលកាត់ដេរនៅកម្ពុជា បានប្រើប្រាស់វត្ថុធាតុដើមដែលមានប្រភពមកពីសហរដ្ឋអាមេរិក​ ហើយនាំចេញទៅកាន់ទីផ្សារសហរដ្ឋអាមេរិកវិញ​។​ ការណ៍នេះ បាននាំឱ្យរាជរដ្ឋាភិបាលកំពុងខិតខំទាក់ទាញវិនិយោគិន ដើម្បីមកបោះទុនវិនិយោគលើការសាងសង់រោងចក្រ​ផលិតក្រណាត់ ដែលនាំចូលវត្ថុធាតុមកពីសហរដ្ឋអាមេរិក ដើម្បីផលិតផលកាត់ដេរនៅកម្ពុជា។ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានបង្ហាញថា សហរដ្ឋអាមេរិកនៅតែជាទីផ្សារនាំចេញដ៏ធំបំផុតរបស់កម្ពុជាសម្រាប់ផលិតផលកាត់ដេរ។ ក្នុងឆមាសទី១ ឆ្នាំ២០២៦នេះ កម្ពុជាបាននាំចេញទៅកាន់ទីផ្សារសហរដ្ឋអាមេរិក សម្រេចបានក្នុងទំហំទឹកប្រាក់ ៥.៦ពាន់លានដុល្លារអាមេរិក (​កើន២៩.៨%) នៃការនាំចេញផលិតផលកាត់ដេរសរុប​ចំនួន​ ៨ ០៨៩ លាន​ដុល្លារអាមេរិក​​ (កើន៦,២%)៕អត្ថបទ៖ ធូ វិរៈ