អ្នកនយោបាយមានសុទិដ្ឋិនិយមចំពោះទស្សនកិច្ចរបស់អ្នករាយការណ៍ពិសេស UN ទៅតំបន់ព្រំដែនកម្ពុជា

អ្នកនយោបាយនៅក្នុងប្រទេសកម្ពុជា បានបង្ហាញសុទិដ្ឋនិយមចំពោះដំណើរទស្សនកិច្ចរបស់អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា ទៅកាន់តំបន់ព្រំដែនកម្ពុជា ដែលត្រូវបានរំលោភដោយយោធាថៃ និងរំពឹងថា លោកនឹងបញ្ចូលបញ្ហានេះទៅក្នុងរបាយការណ៍ផ្លូវការជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ។

ឯកឧត្តម អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ បានយល់ឃើញថា អ្នករាយការណ៍ពិសេសអង្គការសហប្រជាជាតិ បានចុះទៅពិនិត្យមើលតំបន់ព្រំដែន គឺពិតជាមានសារសំខាន់ក្នុងការប្រមូលឯកសារភស្តុតាងពិតប្រាកដនៃការឈ្លានពានរបស់ថៃមកលើកម្ពុជា ដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិ និងអន្តរជាតិឱ្យបានដឹងការពិត។ ហើយជាចំណែកមួយយ៉ាងសំខាន់ក្នុងការស្វែងរកសិទ្ធិរស់រានមានជីវិតរបស់ប្រជាជនកម្ពុជា និងអាចមានពន្លឺក្នុងការជំរុញដល់ការដោះស្រាយ។

ឯកឧត្តម អ៊ុន ជឹម ប្រធានគណបក្សឯកភាពជាតិខ្មែរ បានបង្ហាញក្ដីរំពឹងដែរថា ការចុះទៅដល់ទីតាំងរបស់អ្នករាយការណ៍ពិសេសអង្គការសហប្រជាជាតិ នឹងប្រមូលបានភស្តុតាងយ៉ាងច្បាស់ដែលបញ្ជាក់ឱ្យពិភពលោកបានដឹងថាថៃឈ្លានពានកម្ពុជា។

គួរបញ្ជាក់ថា គោលបំណងចម្បងនៃបេសកកម្ម និងទស្សនកិច្ចការងាររបស់អ្នករាយការណ៍ពិសេសមកកាន់កម្ពុជា និងតំបន់ព្រំដែន ដើម្បីសិក្សាពីស្ថានភាពជនភៀសសឹក ចុះពិនិត្យ និងប្រមូលព័ត៌មានផ្ទាល់អំពីស្ថានភាពរស់នៅ និងតម្រូវការផ្នែកមនុស្សធម៌របស់ប្រជាជនកម្ពុជា ដែលរងផលប៉ះពាល់ដោយសារជម្លោះព្រំដែន។ ដើម្បីវាយតម្លៃផលប៉ះពាល់ជម្លោះ នៃការប៉ះទង្គិចគ្នានៅតាមតំបន់ព្រំដែនកម្ពុជា-ថៃ ក្នុងការប្រមូលព័ត៌មាន និងភស្តុតាងជាក់ស្តែង ដើម្បីរៀបចំជា របាយការណ៍ផ្លូវការ ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ៕ អត្ថបទ៖ វង្ស សុភាព