ខណ្ឌ៧មករា កំពុងខិតខំដំណើរការចុះបញ្ជីដីធ្លី ដើម្បីបញ្ចប់​ការចុះបញ្ជី​ដីធ្លី​ក្នុង​ក្រប​ខ័ណ្ឌ​រាជ​ធានី​ភ្នំពេញ

ក្រុមការងារជំនាញ នៃមន្ទីររៀបចំដែនដីនគររូបនីយ៍កម្ម សំណង់ និងសុរិយោដី កំពុង​ខិត​ខំ​ដំណើរ​ការ​ការចុះបញ្ជីដីធ្លី អគារសហកម្មសិទ្ធិក្នុងខណ្ឌ៧មករា ដែលជាខណ្ឌ​ចុង​ក្រោយ​បង្អស់​សម្រាប់​ក្រប​ខ័ណ្ឌ​រាជធានីភ្នំពេញ។

បច្ចុប្បន្ននេះ ក្រុមការងារជំនាញ បាននឹងកំពុងអនុវត្តការងារ តានរយៈការចុះផ្ទាល់ដល់តាមខ្នងផ្ទះប្រជាពលរដ្ឋ ក្នុងខណ្ឌ៧មករា ដើម្បីធ្វើការបាញ់ប្រព័ន្ធតាមបច្ចេកទេសជំនាញ និងដំណើរការការស្នើសុំចុះបញ្ជីដីធ្លី ដោយតម្រូវឱ្យប្រជាពលរដ្ឋចូលរួមផ្តល់ និងបំពេញឯកសារភ្ជាប់ ដែលបញ្ជាក់ពីការកាន់កាប់កម្មសិទ្ធិដីធ្លី ដើម្បីចុះទៅក្នុងប្រព័ន្ធ មុនឈានដល់ការចេញប្លង់កម្មសិទ្ធិដីធ្លី ជូនពលរដ្ឋជាម្ចាស់អគារសហកម្មសិទ្ធិទាំងអស់ ។

លោក សារិន វណ្ណា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី រាជធានីភ្នំពេញ បានឲ្យដឹងថា ក្រុមការងារ បានអនុវត្តការចុះបញ្ជីដីធ្លីក្នុងប្រព័ន្ធ និងបានចែកបណ្ណកម្មសិទ្ធិដីធ្លីជូនពលរដ្ឋរួចរាល់ អស់១៣ខណ្ឌហើយសម្រាប់ក្របខ័ណ្ឌរាជធានីភ្នំពេញ។ ដោយឡែកសម្រាប់ខណ្ឌ៧មករា គឺជាខណ្ឌដែលសម្បូរទៅដោយសំណង់អគារចាស់ៗពីសង្គម ដោយចែកជាពីរ គឺសំណង់អគារមុនអនុក្រឹត្យ និងក្រោយអនុក្រឹត្យ។

ប្រជាពលរដ្ឋសាទរ និងរីករាយទទួលយកយន្តការចុះបញ្ជីដីធ្លីដល់តាមខ្នងផ្ទះរបស់ពួកគេ ដែលវាបានបង្កលក្ខណៈងាយស្រួលមួយ ដោយពលរដ្ឋពុំចាំបាច់រត់ទៅរកមន្ត្រីដើម្បីធ្វើសេវា។

គួរបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី២៩ ខែកក្កដា ឆ្នាំ២០២៦ បានជំរុញដល់ក្រសួង និងជំនាញ ត្រូវបញ្ចប់ការចុះបញ្ជីដីធ្លីជូនពលរដ្ឋនៅទូទាំងប្រទេសត្រឹមឆ្នាំ២០២៦ និងបញ្ចប់ការចែកបណ្ណកម្មសិទ្ធិដីធ្លីត្រឹមឆ្នាំ២០២៧៕ អត្ថបទ៖ លីហេង