ធុរជន​ឥណ្ឌា ឈានមុខក្នុងវិស័យបច្ចេកវិទ្យាមក​ស្វែងរកដៃគូវិនិយោគនៅកម្ពុជា​

ភ្នំពេញ៖ ធុរកិច្ចឥណ្ឌាតំណាងឱ្យក្រុមហ៊ុនបច្ចេកវិទ្យាឈានមុខរបស់ឥណ្ឌាចំនួន ៩ បានជួបពិភាក្សាជាមួយធុរជន​កម្ពុជា ស្តីពីវិស័យអេឡិចត្រូនិក សូហ្វវែរ និងបច្ចេកវិទ្យាព័ត៌មាន និងសារគមនាគមន៍ (ICT) នៅព្រឹកថ្ងៃទី ៣០ ខែកក្កដា ឆ្នាំ២០២៦ នៅរាជធានីភ្នំពេញ​។ ព្រឹត្តិការណ៍នេះមានការចូលរួមពីតំណាងជាង ១០០ នាក់ មកពីក្រសួង-ស្ថាប័ន​រាជរដ្ឋាភិបាល វិស័យឯកជន ក្នុងវិស័យបច្ចេកវិទ្យា និងហិរញ្ញវត្ថុ និងក្រុមហ៊ុនបង្កើតថ្មី (Startups) មកពីប្រទេសទាំងពីរ។

កិច្ចពិភាក្សាធុរកិច្ច (B2B) នេះ ត្រូវបានរៀបចំឡើងដោយស្ថានទូតឥណ្ឌាប្រចាំកម្ពុជា សហការជាមួយក្រុមប្រឹក្សាលើការផ្សព្វផ្សាយការនាំចេញអេឡិចត្រូនិក និងសូហ្វវែរកុំព្យូទ័រ (ESC) ដែលជាអង្គការលើកកម្ពស់ពាណិជ្ជកម្មកំពូលរបស់ឥណ្ឌាសម្រាប់វិស័យអេឡិចត្រូនិក ទូរគមនាគមន៍ សូហ្វវែរកុំព្យូទ័រ និងសេវាកម្មគាំទ្រដោយបច្ចេកវិទ្យាព័ត៌មាន (IT-enabled Services)។

ក្នុងជំនួបពិភាក្សា ឯកឧត្តម បាវីតលុង វ៉ាន់ឡាល់វ៉ាវណា (Bawitlung Vanlalvawna) ឯកអគ្គរដ្ឋទូតឥណ្ឌាប្រចាំនៅកម្ពុជា បានលើកទឹកចិត្តដល់ធុរជននៃប្រទេសទាំងពីរឱ្យស្វែងរកមធ្យោបាយបន្ថែមទៀតសម្រាប់កិច្ចសហប្រតិបត្តិការ, ភាពជាដៃគូបច្ចេកវិទ្យា, នវានុវត្តន៍, ការកសាងសមត្ថភាពឌីជីថល, និងការវិនិយោគ។ ឯកឧត្តម បានគូសបញ្ជាក់ថា៖ «កិច្ចសហប្រតិបត្តិការកាន់តែជិតស្និទ្ធរវាងសហគ្រាសឥណ្ឌា និងកម្ពុជា នឹងពង្រឹងទំនាក់ទំនងសេដ្ឋកិច្ចទ្វេភាគីបន្ថែមទៀត ព្រមទាំងគាំទ្រដល់បរិវត្កម្មឌីជីថល និងការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជា»។

ឧកញ៉ាបណ្ឌិត ឈិន កេន ប្រធានសមាគមបច្ចេកវិទ្យាឌីជីថលនៃកម្ពុជា (CDTA) ដែលបានដឹកនាំតំណាងក្រុមហ៊ុនចំនួន ១០ ចូលរួមក្នុងកិច្ចពិភាក្សាធុរកិច្ចនេះ បានចាប់អារម្មណ៍ទៅលើក្រុមហ៊ុន​បច្ចេកវិទ្យារបស់ឥណ្ឌាមួយ​ដែល​ផ្តល់ការបណ្តុះបណ្តាលអ្នកវិទ្យាសាស្រ្ត​វ័យក្មេងដែលជាឱកាសក្នុងចាប់ជាដៃគូវិនិយោគ​។

ឧកញ៉ាបណ្ឌិត មានប្រសាសន៍ថា៖ «មានក្រុមហ៊ុនមួយដែលខ្ញុំចាប់អារម្មណ៍ខ្លាំង​គឺក្រុមហ៊ុនបណ្តុះបណ្តាលផ្នែកអ្នកវិទ្យាសាស្រ្តវ័យក្មេង។សិស្សចាប់ពីអាយុ ១២ ឆ្នាំឡើងទៅ គាត់ទទួលបង្រៀនលើមុខវិជ្ជា​ជាអ្នកវិទ្យាសាស្រ្ត ដូចជាអាកាយនិក​ ជាដើម»។

លោក Gurmeet Singh ប្រធានមន្ត្រីនាយកប្រតិបត្តិ និងជានាយកប្រតិបត្តិនៃក្រុមប្រឹក្សា ESC បានកត់សម្គាល់ថា កិច្ចពិភាក្សានេះ មិនមែនគ្រាន់តែជាជំនួបរវាងអាជីវកម្ម និងអាជីវកម្មប៉ុណ្ណោះទេ ប៉ុន្តែគឺជាការចាប់ផ្តើមនៃដំណើររួមគ្នាឆ្ពោះទៅកាន់អនាគតឌីជីថល ដែលឥណ្ឌា និងកម្ពុជា ឈរជាដៃគូក្នុងនវានុវត្តន៍ និងភាពជឿនលឿន។ ប្រតិភូរបស់ឥណ្ឌាតំណាងឱ្យប្រព័ន្ធអេកូឡូស៊ីបច្ចេកវិទ្យាជឿនលឿនរបស់ឥណ្ឌា រាប់ចាប់ពី AI, IoT, សន្តិសុខសាយប័រ, FinTech, AgriTech, ដំណោះស្រាយ EV និងអេឡិចត្រូនិកជឿនលឿនជាដើម។ លោក មើលឃើញថា៖ «កម្ពុជាមិនត្រឹមតែជាទីផ្សារប៉ុណ្ណោះទេ ប៉ុន្តែជាដៃគូសហការក្នុងការកសាងសេដ្ឋកិច្ចផ្អែកលើចំណេះដឹង ដែលអាចជួយពង្រឹងសមត្ថភាពប្រជាជន ពង្រឹងស្ថាប័ន និងបង្កើតហេដ្ឋារចនាសម្ព័ន្ធប្រកបដោយភាពរឹងមាំ និងចីរភាព។ យើងអាចរួមគ្នាបំប្លែងគំនិតទៅជាលទ្ធផលវិជ្ជមាន និងបំប្លែងភាពជាដៃគូទៅជាមរតក ដោយធានាថា បច្ចេកវិទ្យានឹងក្លាយជាស្ពាននៃឱកាសសម្រាប់មនុស្សជំនាន់ក្រោយ»។

ព្រឹត្តិការណ៍នេះបានបញ្ជាក់ជាថ្មីនូវការប្តេជ្ញាចិត្តរួមរបស់ប្រទេសទាំងពីរ ក្នុងការបន្តពង្រឹងកិច្ចសហប្រតិបត្តិការលើវិស័យ ICT និងលើកកម្ពស់កំណើនសេដ្ឋកិច្ចដែលជំរុញដោយនវានុវត្តន៍ ក្រោមក្របខណ្ឌនៃភាពជាដៃគូកម្ពុជា-ឥណ្ឌា៕

អត្ថបទ៖ ធូ វិរៈ