លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នាំយកទៀនព្រះវស្សា ប្រគេនសម្តេចព្រះសង្ឃគង់ចាំព្រះវស្សានៅវត្តចំពុះក្អែក

ភ្នំពេញ៖ នារសៀលថ្ងៃទី៣០ ខែកក្កដា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយថ្នាក់ដឹកនាំ និងពុទ្ធបរិស័ទជិតឆ្ងាយ បាននាំយកទៀនចំណាំព្រះវស្សា រួមជាមួយនឹងទេយ្យទាន ទេយ្យវត្ថុ ព្រមទាំងបច្ច័យប្រគេន «សម្តេចព្រះមហាសុមេធាធិបតី អំ លីមហេង សម្តេចព្រះសង្ឃនាយកគណៈមហានិកាយ នៃព្រះរាជាណាចក្រកម្ពុជា» និងព្រះសង្ឃគ្រប់ព្រះអង្គដែលគង់ចាំព្រះវស្សានៅវត្តមុនីសុវណ្ណ ហៅវត្តចំពុះក្អែក ។

សូមបញ្ជាក់ផងដែរ ពិធីបុណ្យចូលព្រះវស្សា គឺជាពិធីបុណ្យមួយធំមួយក្នុងព្រះពុទ្ធសាសនា ដែលត្រូវបានប្រារព្ធធ្វើឡើងក្នុងរយៈពេល ៣ខែ (មួយត្រៃមាស) ចាប់ពីថ្ងៃ ១រោច ខែអាសាឍ រហូតដល់ថ្ងៃ ១៥កើត ខែអស្សុជ ពោលគឺក្នុងរដូវវស្សា គឺស្របតាមបញ្ញតិ្តរបស់ព្រះបរមសម្ពុទ្ធ ដែលទ្រង់បានបញ្ញត្តិសិក្ខាបទឱ្យភិក្ខុសង្ឃ និងសាមណេរនៅគង់ក្នុងវត្តដើម្បីរៀនសូត្រធម៌អាថ៌ ធម៌វិន័យ និងប្រតិបត្តិវិបស្សនាកម្មដ្ឋាន ហើយក៏ដើម្បីកាត់បន្ថយការលំបាកក្នុងការនិមន្តធ្វើដំណើរបិណ្ឌបាតក្នុងវស្សានរដូវដែលត្រូវនិមន្តក្រោមតំណក់ទឹកភ្លៀង សើមព្រះកាយ មានទឹកលិច ភក់ជ្រាំ ជាពិសេសចៀសវាងការនិមន្តជាន់កម្ទេចពន្លកដំណាំ ស្រូវរបស់ប្រជាកសិករដែលទើបដុះលូតលាស់ផងដែរ។

ក្នុងវេលាគង់ចាំព្រះវស្សានេះដែរ ពុទ្ធបរិស័ទគ្រប់ៗរូបតែងនាំគ្នាប្រារព្ធពិធីបុណ្យចូលព្រះវស្សានេះដើម្បីនាំយកទៀន ប្រេងកាត ធូបអុជបំភ្លឺ ទេយ្យទាន ទេយ្យវត្ថុ សម្ភារៈបរិក្ខារប្រើប្រាស់ប្រចាំថ្ងៃ ចង្ហាន់បរិភោគ ព្រមទាំងបច្ច័យផងដែរ ប្រគេនព្រះសង្ឃ សាមណេរគ្រប់ព្រះអង្គ សម្រាប់ចាត់ចែងប្រើប្រាស់ប្រចាំថ្ងៃ រហូតដល់ចេញព្រះវស្សា៕