ទេសចរក្នុងស្រុកដាក់ផែនការទៅទស្សនាខេត្តសៀមរាប កំឡុងការបញ្ចុះតម្លៃសេវាស្នាក់រហូតដល់៥០%

ខណៈក្រសួងទេសចរណ៍បានចេញផ្សាយ សេចក្តីជូនដំណឹង ស្តីពីការដាក់ឱ្យដំណើរការសាកល្បងកម្មវិធីលក់បញ្ចុះតម្លៃសេវាកម្មទេសចរណ៍ ប្រចាំឆ្នាំ២០២៦ នៅខេត្ដសៀមរាប បណ្តាភ្ញៀវទេសចរក្នុងស្រុក បាននាំគ្នាដាក់ផែនការទៅទស្សនាខេត្តសៀមរាប ដើម្បីទទួលយកបទពិសោធន៍ យកជាចំណេះដឹង ការស្នាក់នៅតាមសណ្ឋាគារលំដាប់ផ្កាយ និងទស្សនាតំបន់ទេសចរណ៍ដ៏មានសក្តានុពលនានានៅក្នុងខេត្តសៀមរាប។

ភ្ញៀវទេសចរក្នុងស្រុកនៅក្នុងចំណោម លោកគ្រូ អ្នកគ្រូ សិស្សនិស្សិត រដ្ឋ និងឯកជន នៅរាជធានីភ្នំពេញ និងខេត្តកណ្តាល បានថ្លែងប្រាប់BTV នៅថ្ងៃទី១ ខែសីហានេះថា នៅក្នុងរដូវកាលទេសចរណ៍បៃតងនេះ គេនឹងនាំគ្នាទៅទស្សនាខេត្តសៀមរាប ដើម្បីដកបទពិសោធន៍ការស្នាក់នៅ នៅតាមក្នុងបន្ទប់សណ្ឋាគារលំដាប់ផ្កាយ ខណៈនៅសេវាបន្ទប់ស្នាក់នៅ នៅតាមសណ្ឋាគារចាប់ពីលំដាប់ផ្កាយ៣ ដល់ផ្កាយ៥ អំឡុងពេលនេះ គឺបានប្រកាសបញ្ចុះតម្លៃពី១០% ទៅ៥០%។

សូមបញ្ជាក់ថា ប្រទេសកម្ពុជា នៅក្នុងរដូវកាលទេសចរណ៍បៃតង Green Season ចាប់ពីខែឧសភា ដល់ខែតុលា ត្រូវបានគេដឹងថា មិនសូវមានភ្ញៀវទេសចរអន្តរជាតិពីតាមប្រទេសនានា មកទស្សនាកម្ពុជានោះទេ ជាហេតុធ្វើឲ្យគ្រប់មូលដ្ឋានអាជីវកម្មទេសចរណ៍ មានដូចជា សណ្ឋាគារ ផ្ទះសំណាក់ រមណីយដ្ឋាន រីស៊ត សេវាកម្មធ្វើដំណើរ ម្ហូបអាហារ និងកញ្ចប់ទេសចរណ៍ជាដើម ត្រូវបានប្រកាសលក់បញ្ចុះតម្លៃពីទៅ១០ទៅ៥០% សំដៅទាក់ទាញទេសចរក្នុងស្រុកចេញដើរកម្សាន្ត ហើយចាប់ពីខែតុលា រហូដល់ខែមេសា ដែលគេហៅថា ជារដូវ High Season មានភ្ញៀវទេសចរអន្តរជាតិមកទស្សនាកម្ពុជាច្រើន ធ្វើឲ្យគ្រប់សេវាកម្មទាំងនោះ នឹងត្រូវលក់នៅក្នុងតម្លៃធម្មតាវិញ។

តាមសេចក្តីជូនដំណឹង របស់ក្រសួងទេសចរណ៍ដែលចេញផ្សាយនៅថ្ងៃម្សិលមិញនេះ បានឲ្យដឹងថា ក្រសួងទេសចរណ៍ ក្រោមកិច្ចសហការជាមួយសមាគមសណ្ឋាគារកម្ពុជាសាខាខេត្តសៀមរាប និងសមាគមក្លឹបទេសចរណ៍ខេត្តសៀមរាប ពិសេសការគាំទ្រពីអាជីវកម្មទេសចរណ៍នានាក្នុងខេត្តសៀមរាប សូមដាក់ឱ្យដំណើរការសាកល្បងប្រើប្រាស់“កម្មវិធីលក់បញ្ចុះតម្លៃសេវាកម្មទេសចរណ៍ប្រចាំឆ្នាំ២០២៦ ខេត្តសៀមរាប ” ដោយចាប់ផ្តើមអនុវត្តចាប់ពីថ្ងៃទី១ ខែសីហា ឆ្នាំ២០២៦ តទៅ។

ភ្ញៀវទេសចរជាតិ និងអន្តរជាតិដែលមានបំណងទៅទស្សនាកម្សាន្តខេត្តសៀមរាបអាចធ្វើការ កក់សេវាកម្មទេសចរណ៍តាមរយៈគេហទំព័រ www.cambodiawonder.com ដោយទទួលបានការបញ្ចុះតម្ល ពិសេសចាប់ពី ១០% ដល់ ៥០% សម្រាប់សេវាកម្មកម្រិតផ្កាយ៣ រហូតដល់ផ្កាយ ៥ ៕អត្ថបទ ស៊ុម សុខជា