ធនាគារជាតិនៃកម្ពុជា បដិសេធព័ត៌មានក្លែងក្លាយ ស្តីពី​ការ​ដាក់​ឱ្យ​ចរាចរ​ក្រដាស​ប្រាក់​រៀល​ប្រភេទ​ថ្មី

ភ្នំពេញ៖ ធនាគារជាតិនៃកម្ពុជា នៅថ្ងៃទី២ ខែសីហា ឆ្នាំ២០២៦នេះ បាន​ចេញ​សេចក្តី​បដិសេធ​ទាំង​ស្រុង​ចំពោះការផ្សព្វផ្សាយព័ត៌មានប្រឌិតពាក់ព័ន្ធ​នឹង​ការ​ដាក់​ឱ្យចរាចរ​ក្រដាស​ប្រាក់​រៀល​ប្រភេ​ទថ្មី ដែលបានរីករាលដាលតាមរយៈគណនី TikTok និងបណ្តាញសង្គម​ផ្សេង​ទៀត​នា​ពេល​ថ្មី​ៗ​នេះ។

ព័ត៌មានក្លែងក្លាយទាំងនេះត្រូវបានអមដោយរូបភាពឌីហ្សាញក្រដាសប្រាក់មិនពិត ដែល​បង្កើត​ឡើង​ដោយ​បច្ចេកវិទ្យា AI។

ធនាគារជាតិនៃកម្ពុជា បានថ្កោលទោសយ៉ាងធ្ងន់ធ្ងរចំពោះអ្នកប្រព្រឹត្តល្មើសដែលបានបង្កើត និង​ផ្សព្វ​ផ្សាយ​ព័ត៌មានបំភាន់ទាំងនេះ។ បច្ចុប្បន្ន ធនាគារជាតិនៃកម្ពុជា កំពុង​សហការ​យ៉ាង​ជិត​ស្និទ្ធ​ជាមួ​យអា​ជ្ញាធរមានសមត្ថកិច្ច ដើម្បីចាត់វិធានការផ្លូវច្បាប់លើករណីនេះ ក្នុងគោល​បំណង​រក្សា​ស្ថិរភាព និងការពារផលប្រយោជន៍សាធារណជន។

ជាមួយ​គ្នានេះ ធនាគារជាតិនៃកម្ពុជា ក៏បានអំពាវនាវដល់សាធារណជនទាំងអស់ មេត្តា​ប្រុ​ង​ប្រយ័ត្ន និងចៀសវាងការចែករំលែកបន្តនូវព័ត៌មានក្លែងក្លាយទាំងនេះ ដែលអាច​បង្ក​ឱ្យ​មាន​ការ​យល់​ច្រឡំ និងប៉ះពាល់ដល់ទំនុកចិត្តសាធារណៈ។

ធនាគារជាតិនៃកម្ពុជា បញ្ជាក់ថា ព័ត៌មានពាក់ព័ន្ធនឹងប្រភេទក្រដាសប្រាក់ដែលកំពុងចរាចរ ត្រូវ​បានផ្សព្វផ្សាយយ៉ាងទូលំទូលាយ និងជាផ្លូវការជានិច្ច។ ដូច្នេះ រាល់​ព័ត៌មាន​ដែល​មិន​ចេញ​ផ្សាយ​ដោយ​ធនាគារជាតិនៃកម្ពុជាផ្ទាល់ គឺសុទ្ធតែជាព័ត៌មានមិនពិត៕