អ.ម.ត និងក្រសួងអប់រំចុះ MOU ដើម្បីលើក​កម្ពស់​កិច្ច​សហប្រតិបត្តិការ​ជួយ​និស្សិត​បន្ត​ការ​សិក្សា​នៅ​ថ្នាក់​ឧត្តមសិក្សា

ភ្នំពេញ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានសមាគមសិស្ស-និស្សិត​អាហា​រូបករណ៍​សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត (អ.ម.ត) និង​ឯក​ឧត្តម​បណ្ឌិតសភាចារ្យ ហង់ ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង​កីឡា ចុះអនុស្សរណៈនៃការយោគយល់គ្នា (MOU) ដើម្បីលើ​ក​កម្ពស់​កិច្ច​សហ​ប្រតិបត្តិ​ការ​ជួយ​សិស្ស​និស្សិត​ តាមរយៈការផ្ដល់អាហារូបករណ៍បានបន្តការសិក្សានៅថ្នាក់ឧត្តមសិក្សា។

នៅក្នុងពិធីចុះអនុស្សរណៈនៃការយោគយល់គ្នា នៅថ្ងៃទី២ ខែសីហា ឆ្នាំ២០២៦ លោក​ជំទាវ​បណ្ឌិត​មានប្រសាសន៍ថា MOU នេះ បានឆ្លុះបញ្ចាំងឲ្យឃើញពីការប្រសព្វគ្នា និងមនស្សកាជាតិ ដែល​ប្ដេជ្ញា​ចិត្ត​រួមគ្នា ក្នុងការជួយដល់យុវជនទៅថ្ងៃអនាគត សំដៅលើកកម្ពស់ និង​បង្កើន​សមត្ថភាព​ដល់យុវជនជំនាន់ក្រោយ។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានបន្តថា ជំនឿចិត្តរបស់ អ.ម.ត គឺ​ការ​ខ្វះ​ខាត​ថវិកា​ ឬហិរញ្ញវត្ថុ មិនមែនជាកត្តាកំណត់ជោគវាសនា របស់យុវជនណាមួយឡើយ គឺយុវជន​ទាំង​អស់​​មានសិទ្ធិស្មើណា ទទួលយកនូវការអប់រំ ការបណ្ដុះបណ្ដាល ដើម្បីក្លាយ​ជា​ធន​ធាន​មនុស្ស​ដ៏​ល្អ​ក្នុ​​ងថ្ងៃអនាគត ហើយបេសកកម្មរបស់ អ.ម.ត មិនមែនត្រឹម​តែជា​ការ​ផ្ដល់​នូវ​អាហា​រូបករណ៍​ប៉ុណ្ណោះ​ទេ ​ប៉ុន្តែបានបង្កើតនូវយន្តការតាមដាន គ្រប់គ្រង ការជ្រោមជ្រែង និងធានាថា ពួក​គាត់​ដែល​ទទួល​បាននូវអាហារូបករណ៍នេះ អាចបញ្ចប់នូវការសិក្សា ដោយជោគជ័យ និង​ជា​កម្លាំង​ចលករ​មួយ ​សម្រាប់សង្គមជាតិយ៉ាងពិតប្រាកដ។

លោកជំទាវបណ្ឌិតបានបន្ថែមថា រាល់ការវិវឌ្ឍផ្នែកសង្គម ផ្នែកសេដ្ឋកិច្ច និងការ​វិនិយោគ​លើ​មូល​ធ​​ន​មនុស្ស គឺជាតម្រូវការដ៏ចាំបាច់មួយ ហើយគោលគំនិតនេះ ស្របទៅនឹងវិស័យទីមួយ នៃ​យុទ្ធ​សាស្ត្រ​បញ្ចកោណ ដំណាក់កាលទី១ របស់រាជរដ្ឋាភិបាល ក្រោមចក្ខុវិស័យ​ដ៏​វែង​ឆ្ងាយ​របស់​សម្ដេច​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ហើយក្នុងន័យនេះ ការបណ្ដុះបណ្ដាល​មូល​ធន​មនុស្ស ឲ្យមានទាំងចំណេះដឹងសមត្ថភាព ជំនាញឯកទេសច្បាស់លាស់ និងគុណ​ធម៌​ប្រចាំ​ជីវិត​ គឺជានិរន្តរភាពពិតប្រាកដរបស់ជាតិ ហើយជាកាតព្វកិច្ចរួមរបស់យើងទាំងអស់គ្នា និង​ទាម​ទារ​ឲ្យ​មាន​ការចូលរួមយ៉ាងសកម្មពីគ្រប់ភាគីពាក់ព័ន្ធ។

ឯកឧត្តមបណ្ឌិតសភាចារ្យ ហង់ ជួន ណារ៉ុន បានថ្លែងថា MOU នេះ ជាសក្ខីភាព​ដែល​បង្ហាញ​ពី​ភាព​ចាំបា​ច់ និងការប្តេជ្ញាចិត្តខ្ពស់ ក្នុងការលើកកម្ពស់កិច្ចសហប្រតិបត្តិការ ឱ្យកាន់តែស៊ីជម្រៅ លើ​ការ​ងារស្នូលសំខាន់ៗដូចជា៖ ការតម្រង់ទិសការសិក្សា និងការងារ, ការចែករំលែក​បទ​ពិសោធន៍​សិក្សា និងចំណេះដឹង និងការអភិវឌ្ឍសមត្ថភាពសម្រាប់សតវត្សទី២១ ។

ឯកឧត្តម បានបន្ថែមថា ចាប់តាំងពីមានការផ្ទុះអាវុធ នៅតាមព្រំដែនកម្ពុជា-ថៃ នាថ្ងៃទី២៤ ខែ​កក្កដា ឆ្នាំ២០២៥ ក្រសួងអប់រំ បានសម្របសម្រួលឱ្យនិស្សិត វិលត្រឡប់មកពីប្រទេសថៃ ចូល​រៀន​ដោយ​មិន​បង់ថ្លៃ ក្រោមឈ្មោះថា “អាហារូបករណ៍សម្តេចតេជោ” ចំនួន៩លើក សរុប១ ២៦០​នាក់។ ក្នុងនោះមាននិស្សិតចំនួន ៦៧១នាក់ (ស្រី ៣២៣នាក់ ព្រះសង្ឃ ១៣អង្គ) បាន​ចុះ​ឈ្មោះចូ​លរៀនជាក់ស្តែង និងមានក្នុងប្រព័ន្ធទិន្នន័យ អ.ម.ត មានតាំងពីកម្រិតបរិញ្ញាបត្ររង រហូត​ដល់​ថ្នាក់បណ្ឌិត និងវេជ្ជបណ្ឌិតឯកទេស។ បន្ថែមលើនេះ អតីតនិស្សិត​អាហា​រូបករណ៍​មូល​និធិ​ព្រីន​ស៍ចំនួន ២៨៤នាក់ ត្រូវបានផ្ទេរចូលក្នុងប្រព័ន្ធទិន្នន័យរបស់ អ.ម.ត ផងដែរ។

គួរ​បញ្ជា​ក់ថា យោងតាមស្ថិតិ អ.ម.ត. គ្រឹះស្ថានឧត្តមសិក្សានានា ក្រោមអាណា​ព្យាបាល​របស់​ក្រសួង​អប់រំ យុវជន និងកីឡា បានផ្តល់អាហារូបករណ៍ជូនសមាគម អ.ម.ត សរុបចំនួន ៣៩ ៤៤០​កន្លែង ចាប់ពីឆ្នាំ២០០៨ មក។ ក្នុងនោះ គ្រឹះស្ថានឧត្តមសិក្សាប្រមាណ៦២ បាន​ផ្តល់​អាហា​រូបករណ៍ជាប្រចាំឆ្នាំ សរុបប្រមាណ ២ ៨០០កន្លែង នៅទូទាំងប្រទេស៕ អត្ថបទ បាន សុខរិទ្ធិ