អភិបាលខេត្តកំពង់ឆ្នាំង បញ្ជាឱ្យកម្ទេចសំណង់អនាធិបតេយ្យរំលោភចូលទន្លេសាប និងព្រមានមន្ត្រីពាក់ព័ន្ធ

កំពង់ឆ្នាំង៖ សំណង់រឹងមាំដែលសង់រំលោភចូលក្នុងតំបន់ទន្លេសាបដោយគ្មានការអនុញ្ញាតនៅខេត្តកំពង់ឆ្នាំង ត្រូវបានបញ្ជាឱ្យវាយកម្ទេចចេញរួចរាល់នៅក្នុងភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ខណៈអភិបាលខេត្តកំពង់ឆ្នាំង បានណែនាំដល់មន្ត្រីគ្រប់លំដាប់ថ្នាក់ ឱ្យបញ្ឈប់ការបណ្តែតបណ្តោយចំពោះសំណង់អនាធិបតេយ្យ និងការរំលោភលើទ្រព្យសម្បត្តិសាធារណៈ។

លោក ជា សុខរិទ្ធ អភិបាលរងខេត្តកំពង់ឆ្នាំង និងជាប្រធានក្រុមការងារចម្រុះថ្នាក់ខេត្ត បានឱ្យដឹងនៅព្រឹកថ្ងៃទី០៣ ខែសីហា ឆ្នាំ២០២៦ថា តាមបទបញ្ជារបស់ឯកឧត្តម ស៊ុន សុវណ្ណារិទ្ធិ អភិបាលខេត្ត ក្រុមការងារចម្រុះត្រូវអនុវត្តការវាយកម្ទេចសំណង់រឹងមាំដែលបានសាងសង់រំលោភចូលទន្លេសាបដោយអនាធិបតេយ្យឱ្យបានជាដាច់ខាត។ ក្រោយការវាយកម្ទេច សំណល់កម្ទេចកំទីទាំងអស់ត្រូវប្រមូល និងយកចេញពីទីតាំង ដើម្បីស្តារឡើងវិញនូវសណ្តាប់ធ្នាប់ និងការពារតំបន់ធនធានធម្មជាតិ។ ចំពោះម្ចាស់សំណង់ផ្សេងទៀតដែលបានសាងសង់ចូលក្នុងទន្លេសាបដោយគ្មានការអនុញ្ញាត ត្រូវរុះរើចេញដោយខ្លួនឯង និងហាមដាច់ខាតមិនឱ្យបន្តសាងសង់បែបអនាធិបតេយ្យបន្តទៀត។

លោក ជា សុខរិទ្ធ បានបញ្ជាក់ថា មិនត្រឹមតែចាត់វិធានការលើសំណង់ខុសច្បាប់ប៉ុណ្ណោះទេ អភិបាលខេត្តក៏បានព្រមានដល់មន្ត្រីគ្រប់ថ្នាក់ ចាប់ពីភូមិ ឃុំ ស្រុក រហូតដល់ខេត្ត ដែលមានការពាក់ព័ន្ធ ឬបណ្តែតបណ្តោយឱ្យមានសំណង់រំលោភលើដីសាធារណៈរបស់រដ្ឋ ដូចជាតាមមាត់ស្ទឹង អូរ ប្រឡាយ និងបឹងផងដែរ។

ឯកឧត្តម ស៊ុន សុវណ្ណារិទ្ធិ បានណែនាំថា មន្ត្រីមិនត្រូវយកផលប្រយោជន៍តូចតាចមកធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ និងទំនុកចិត្តរបស់ប្រជាពលរដ្ឋឡើយ។ ប្រសិនបើមានការរកឃើញថា មន្ត្រីណាមួយពាក់ព័ន្ធនឹងការអនុញ្ញាត ឬមិនចាត់វិធានការទប់ស្កាត់សំណង់ខុសច្បាប់ នឹងត្រូវអនុវត្តវិធានការតាមផ្លូវច្បាប់។

ការព្រមាននេះធ្វើឡើង បន្ទាប់ពីមានការរកឃើញថា ករណីសំណង់រឹងមាំសង់រំលោភចូលទន្លេសាបដោយគ្មានច្បាប់ទម្លាប់ មានការពាក់ព័ន្ធនឹងការខ្វះការទប់ស្កាត់ពីមន្ត្រីមូលដ្ឋានមួយចំនួនកន្លងមក៕