មន្ត្រីរាជការ កងកម្លាំង និងពលរដ្ឋ ចងចាំគំរូវីរភាពរបស់សម្ដេចតេជោដែលតែងតែនៅជាប់ជាមួយប្រជាជន

មន្ត្រីរាជការ កងកម្លាំងទាំងបី អតីតយុទ្ធជន និងប្រជាពលរដ្ឋ នៅថ្ងៃនេះបាននាំគ្នាជូនពរសម្ដេចអគ្គមហាសេនាបតីតេជោ ហ៊ុន សែន ក្នុងថ្ងៃខួបកំណើត៧៤ឆ្នាំ ឈានចូល៧៥ឆ្នាំ និងបានថ្លែងនូវការចងចាំចំពោះគំរូវីរភាពរបស់សម្ដេចតេជោដើម្បីជាតិ និងប្រជាជន។

កងកម្លាំង និងអតីតយុទ្ធជន នៅក្នុងខេត្តកំពង់ឆ្នាំង នៅថ្ងៃទី០៥ ខែសីហា ឆ្នាំ២០២៦នេះ បានគោរពជូនពរសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា, នាយឧត្តមសេនីយ៍ផុតលេខផ្កាយមាស៥, និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដោយក្ដីគោរព និងស្ញប់ស្ញែងចំពោះវីរភាពសម្តេចតេជោ ដែលតែងតែបានខិតខំបំពេញបេសកកម្មជាតិដ៏ថ្លៃថ្លា ប្រកបដោយភាពស្មោះត្រង់ ការពារទឹកដីពីចោរឈ្លានពាន និងការទទួលខុសត្រូវខ្ពស់ ដើម្បីបម្រើឧត្តមប្រយោជន៍ជាតិ មាតុភូមិ និងប្រជាជន នាំមកនូវសុខសន្តិភាពជូនប្រជាជន សំដៅអភិវឌ្ឍប្រទេសជាតិឱ្យមានការរីកចម្រើនជឿនលឿន ក៏ដូចជាការបន្តលើកស្ទួយកិត្យានុភាពជាតិ នៅលើឆាកអន្តរជាតិ។

ចំណែកលោកស្រី​ ឃាង ស៊ីផាន​ ប្រធានក្រុមប្រឹក្សាសង្កាត់សំបួរមាស​ និង​ លោក​ ខ្ចង​ អូន​ ប្រធានក្រុមប្រឹក្សាសង្កាត់បឹងកុក​ ក្រុងកំពង់ចាម​ បានលើកឡើងពីវីរភាពរបស់សម្ដេចតេជោ​ ហ៊ុន​ សែន​ ដែលមិនខ្លាចលះបង់សូម្បីអាយុជីវិតខ្លួន និងគ្រួសារ ដើម្បីរំដោះប្រទេសជាតិចេញពីរបបខ្មែរក្រហម និងដឹកនាំប្រទេសរហូតឈានដល់ការផ្សះផ្សាជាតិ តាមរយៈនយោបាយឈ្នះ ឈ្នះ ដែលធ្វើឱ្យប្រទេសជាតិទទួលបានសុខសន្តិភាពទាំងស្រុង។​ ហេីយមកដល់ពេលនេះ បើទោះសម្ដេចលែងជានាយករដ្ឋមន្ត្រី តែសម្ដេចនៅតែយកចិត្តទុកដាក់ជួយជាតិ លើកទឹកចិត្តមន្ត្រីរាជកការក្រោមជាតិ តាមរយៈការចុះជួសួរសុខទុក្ខកាលពីខែមុនៗនោះ។

មន្ត្រីរាជការ កងកម្លាំង អតីតយុទ្ធជន និងប្រជាជនកម្ពុជាទាំងអស់គ្នា​ សូមគោរពកោតសរសើរសម្តេចតេជោ ហ៊ុន សែន ដែលបានដឹកនាំវីរកងទ័ពខ្មែរ ដើម្បីការពារទឹកដី ដែលវីរភាពរបស់សម្តេច បានធ្វើឱ្យប្រជាជនកម្ពុជា មានសាមគ្គីភាពជាធ្លុងមួយ ក្នុងពេលសត្រូវឈ្លានពានទឹកដី នាំឱ្យមានខ្មែរតែមួយ និងខ្មែរខ្លាំងលើឆាកអន្តរជាតិ៕

អត្ថបទ៖ ហុង វាស្នា