៧ខែឆ្នាំនេះកម្ពុជាបានចំណូលជាង២០លានដុល្លារ ពីការលក់សំបុត្រជូនទេសចរចូលទស្សនារមណីយដ្ឋានអង្គរ

កម្ពុជាទទួលបានចំណូលប្រមាណជាង ២០លានដុល្លារ ពីការលក់សំបុត្រជូនភ្ញៀវទេសចរអន្តរជាតិ ដែលចូលទស្សនារមនីយដ្ឋានអង្គរ ក្នុងរយៈពេល៧ខែ ពោលចាប់ពីខែមករា ដល់ខែកក្កដា ឆ្នាំ២០២៦ ដោយទទួលបានភ្ញៀវទេសចរចំនួន៤២៨ ២២៣នាក់។ នេះបើយោងតាមរបាយការណ៍របស់គ្រឹះស្ថានអង្គរ។

គ្រឹះស្ថានអង្គរបានបញ្ជាក់ថា ៧ខែ ឆ្នាំ២០២៦នេះ ​ចំណូលដែលទទួលបាន ពីការលក់សំបុត្រចូលទស្សនា រមណីយដ្ឋានអង្គរមានចំនួន ២០ ៣២៦ ៩៦៦ដុល្លារ ថយចុះ២៩.០៣% បើធៀបនឹងរយៈពេលដូចគ្នា ឆ្នាំ២០២៥។ ចំណែកចំនួនភ្ញៀវទេសចរបរទេស មានចំនួន​ ៤២៨ ២២៣នាក់ ថយចុះ៣០.៧៩%។

បើតាមរបាយការណ៍ដដែល បានបញ្ជាក់ថា រយៈពេល៧ខែ ឆ្នាំ២០២៦នេះ ចំនួនភ្ញៀវសរុប៖ មានភ្ញៀវទេសចរបរទេសចំនួន ៤២៨ ២២៣ នាក់ បានទិញសំបុត្រចូលទស្សនា។ ចំនួនភ្ញៀវទេសចរមានការថយចុះ ៣០,៧៩% បើធៀបនឹងរយៈពេលដូចគ្នាក្នុងឆ្នាំ២០២៥។ ទឹកប្រាក់ប្រមូលបានមានការថយចុះ ២៩,០៣% បើធៀបនឹងរយៈពេល ៧ ខែដូចគ្នាកាលពីឆ្នាំទៅ។

ក្រៅពីចំណូលដែលទទួលបានពីប្រាសាទអង្គរ គ្រឹះស្ថានអង្គរក៏បានដកប្រាក់ឧបត្ថម្ភមួយផ្នែកពីការលក់សំបុត្រនេះ ដើម្បីចូលរួមចំណែកជួយដល់ មូលនិធិគន្ធបុប្ផាកម្ពុជា ក្នុងការជួយសង្គ្រោះជីវិតកុមារកម្ពុជាផងដែរ។ ក្នុងនោះ គ្រឹះស្ថានអង្គរ បានឧបត្ថម្ភដល់មូលនិធិគន្ធបុប្ផាកម្ពុជា សម្រាប់រយៈពេល៧ខែ ឆ្នាំ២០២៦ មានចំនួន ៨៥៦ ៤៤៦ដុល្លារ៕