សង្គមស៊ីវិល៖ ការធ្វើជាម្ចាស់ផ្ទះសន្និសីទប្រធានសភា នៃអន្តរសភា​លើក​ទី២ គឺឆ្លុះ​បញ្ចាំង​ទិដ្ឋភាព​ដ៏​ឧត្តុង្គឧត្តម​សម្រាប់កម្ពុជា

ភ្នំពេញ៖ សង្គមស៊ីវិលបានបង្ហាញសុទិដ្ឋនិយមថា កម្ពុជាដែលជា​ប្រទេស​មួយ​ដែលធ្លាប់​តែ​ឆ្លង​កាត់​នៅ​ភ្លើង​សង្គ្រាម​ដ៏រ៉ាំរ៉ៃកាលពីអតីត​កាល ហើយឥឡូវកម្ពុជាបាន​ធ្វើ​ជាម្ចាស់​ផ្ទះ​រៀប​ចំ​សន្និសីទ​ប្រធាន​សភា នៃអន្តរសភាលើកទី២ នាពេលខាងមុខនេះ គឺជាវឌ្ឍនភាពដ៏​វិសេស​វិសាល និង​ជា​ការ​​ឆ្លុះ​បញ្ចាំងទិដ្ឋភាពដ៏ឧត្តុង្គឧត្តមសម្រាប់កម្ពុជា។

លោក ហេង ម៉េងលី ប្រធានសមាគមលើកស្ទួយកសិករបានថ្លែងថា កម្ពុជា​នឹង​រៀបចំ​ធ្វើ​ជា​ម្ចាស់​ផ្ទះ​រៀ​បចំសន្និសីទប្រធានសភា នៃអន្តរសភាលើកទី២ ចាប់ពីថ្ងៃទី២៦-២៨ ខែសីហា ឆ្នាំ២០២៦ គឺ​ជា​វឌ្ឍនភាពដ៏វិសេសវិសាលបំផុតសម្រាប់ប្រទេសកម្ពុជាដែលធ្លាប់រងនៅសង្គ្រាមរ៉ាំរ៉ៃ និង​បច្ចុប្បន្ន​នេះ​ក៏ទទួលរងនៅការឈ្លានពានពីសំណាក់​ភាគីថៃផងដែរ។ កាលណាបើនិយាយពីសភាសម្រាប់កម្ពុជា គឺជានីតិប្បញ្ញត្តិដែល​សង្កត់​ធ្ងន់​ទៅ​លើ​អំពី​បរិការ​ច្បាប់​នានា​ដែល​ពាក់ព័ន្ធមិនថាវិសាលភាពក្នុងប្រទេស ឬក៏តំបន់ និងសកលទេ។ ដូច្នេះហើយ​សន្និសីទ​នេះ ​គឺជាការឆ្លុះបញ្ចាំងទិដ្ឋភាពដ៏ឧត្តុង្គឧត្តមសម្រាប់កម្ពុជា។ ពីព្រោះកម្ពុជា​ធ្លាប់​រង​គ្រោះ​នៅ​សង្គ្រាម​រ៉ាំរ៉ៃ និងស្គាល់ពីផលលំបាកនៃទុក្ខវេទនាទាំងឡាយនៃសង្គ្រាម ហេតុនេះកម្ពុជា​ឲ្យ​តម្លៃ​ខ្ពស់​ទៅ​លើសន្តិភាព វិបុលសុខ ភាពសុខដុមរមនារវាងរដ្ឋនិងរដ្ឋ។ នៅក្នុងមូលបទនៃសន្និសីទ “សាមគ្គី​ភាពដើម្បីសន្តិភាព និងវិបុលភាពរួម ពង្រឹងនៅការអនុវត្តច្បាប់អន្តរជាតិ និងការ​ដោះ​ស្រាយ​បញ្ហា​ដោយសន្តិវិធី” គឺឆ្លុះបញ្ចាំងពីការរួមគ្នាដើម្បីសន្តិភាព និងវិបុលភាព​នៃ​សង្គម​ទាំង​អស់​គ្នា​ជា​អន្តរជាតិ។ សន្និសីទនេះ គឺសង្កត់ទៅលើការ​អនុវត្ត និង​ការ​គោរព​ច្បាប់​ជា​ធរមាន​សម្រាប់​ប្រទេស​ទាំងអស់នៅលើសកលលោកតែម្តង។ ជាក់ស្តែងកម្ពុជាបាន​អនុវត្ត​នៅ​ច្បាប់​នានា​ជា​ធរមាន​ដូចជា UNCLOS និងសន្ធិសញ្ញាជាដើម គឺឆ្លុះបញ្ចាំងពីការ​គោរព​ច្បាប់​របស់​កម្ពុជា​ផង​ដដែរ​។ ហើយ​កម្ពុជា​យក​ប្រទេស​ទាំង​អស់​ធ្វើ​ជា​មិត្ត​រួម​រស់​ជាមួយ​គ្នា​ក្នុង​សន្តិ​សហ​វិជ្ជមាន​ជា​មួយ​គ្នា​ផង​ដែរ។ នៅក្នុងបរិការនៅក្នុងតំបន់ជាពិសេសនៅក្នុងអាស៊ីអាគ្នេយ៍ដែលថៃប្រើច្បាប់ព្រៃ គឺ​ខុស​ពី​ច្បាប់​មនុស្សជាតិ។ ហើយសន្និសីទនេះនឹងពាំនាំនៅតម្លៃខ្ពស់អំពីច្បាប់មនុស្សជាតិអំពីច្បាប់រដ្ឋនៅក្នុងវិសាលភាពក្នុងតំបន់​ និងនៅក្នុងពិភពលោកទាំងមូល ដើម្បីធ្វើយ៉ាងណារួមគ្នាចាត់វិធានការ រួមគ្នាអូស​ទាញ​ក្រុម​ប្រទេស​ណា​ដែលមិនគោរពច្បាប់មនុស្សជាតិ។

លោក ហេង ម៉េងលី បានបញ្ជាក់ថា ៖ “កម្ពុជាឲ្យតម្លៃខ្ពស់ទៅលើសន្តិភាពដែល​បាន​ខិតខំ​ប្រឹង​ប្រែង​ស្វែង​រកទម្រាំតែបានមកដល់ពេលបច្ចុប្បន្ននេះ។ ហើយប្រទេស​ដែល​មិន​ស្រឡាញ់​សន្តិភាព​ដូច​ជា​ថៃ​ដែលបង្កជាទំនាស់ចង់ឲ្យតែមានសង្គ្រាមកើតឡើង នេះហើយជាបញ្ហា​មិន​គោរព​ច្បាប់​អន្តរជាតិ មិនគោរពកិច្ចព្រមព្រៀងនានាជាដើម។ ហើយសង្ឃឹមថា សន្និសីទប្រធានសភា នៃ​អន្តរសភា​លើក​ទី២ ដែលកម្ពុជាធ្វើជាម្ចាស់ផ្ទះនឹងពាំនាំពាក្យពេជន៍ទាំងឡាយ និង​ខ្លឹមសារ​នៃ​សន្និសីទ​នេះ ដើម្បីផ្សព្វផ្សាយដល់បណ្តាប្រទេសលើសកលលោករួមគ្នាកសាងសន្តិភាព និង​ភាព​សុខ​ដុម​រមនាជាមួយគ្នា និងរួមគ្នា​ថ្កោល​ទោស​ចំពោះប្រ​ទេស​ទាំង​ឡាយ​ណា​ដែល​មិនគោរព​ច្បាប់​ជា​ធរមាន ហើយជាពិសេសប្រទេសថៃដែលបានឈ្លានពានបូរណភាពទឹកដីកម្ពុជា”។

សូមជម្រាបថា កម្ពុជាធ្វើម្ចាស់ផ្ទះរៀបចំសន្និសីទប្រធានសភា នៃអន្តរសភាលើកទី២ ចាប់ពីថ្ងៃទី២៦-២៨ ខែសីហា ឆ្នាំ២០២៦ ដោយមានបណ្តាមេដឹកនាំប្រទេសជាច្រើន និងអង្គការអន្តរជាតិនានា នឹងអញ្ជើញមកចូលរួមសន្និសីទនេះ។ មូលបទដែលបានកំណត់គឺ “សាមគ្គីភាពដើម្បីសន្តិភាព និងវិបុលភាពរួម ពង្រឹងនៅការអនុវត្តច្បាប់អន្តរជាតិ និងការដោះស្រាយបញ្ហាដោយសន្តិវិធី” ដែលនេះគឺជាមូលបទដ៏មានសារសំខាន់ និងមានការប្រទាក់ក្រឡាគ្នាស្របទៅនឹងស្ថានការណ៍ពិភពលោកនាពេលបច្ចុប្បន្ន មានភាពមិនគោរពច្បាប់អន្តរជាតិ និងការដើរចេញពហុភាគីនិយម៕ អត្ថបទ៖ វង្ស សុភាព