ក្រសួងអប់រំ ព្រមានបញ្ចប់ក្របខណ្ឌបុគ្គលដែលធ្វើឱ្យបែកធ្លាយវិញ្ញាសាប្រឡងបាក់ឌុបមុនការប្រកាសលទ្ធផល

ឯកឧត្តម ហង់ជួន ណារ៉ុន ឧបនាយករដ្ឋមន្រ្ដី រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ថា ក្រសួងនឹងបញ្ចប់ក្របខណ្ឌមន្ត្រីណាដែលធ្វើឱ្យមានការបែកធ្លាយវិញ្ញាសាប្រឡងបាក់ឌុប មុនការប្រកាសលទ្ធផលជាផ្លូវការ។ ការព្រមានធ្ងន់ៗបែបនេះ កើតឡើងក្រោយមានហេតុការណ៍បង្ហោះវិញ្ញាសាប្រឡង ក្រោយបញ្ចប់ការប្រឡងបាក់ឌុបកាលពីឆ្នាំមុន។

ឯកឧត្តម រដ្ឋមន្ត្រីក្រសួងអប់រំ ក្នុងឱកាសសន្និសីទសារព័ត៌មានពាក់ព័ន្ធនឹងការប្រឡងបាក់ឌុប នៅថ្ងៃ ៦សីហា នេះ បានបង្ហាញអារម្មណ៍ សោកស្ដាយជាខ្លាំង ចំពោះការដែលមានបែកធ្លាយវិញ្ញាសា ក្រោយការប្រឡងបានបញ្ចប់ភ្លាមៗ កាលពីឆ្នាំមុន។ បទពិសោធន៍មួយនេះ ក្រសួងនឹងចាត់វិធានការតឹងរឹងបំផុត ចំពោះបុគ្គលដែលល្មើស ចំពោះការហាមប្រាមមួយនេះ។

ជាវិធានការ គឺក្រសួងនឹងដាក់ពិន័យ និងអាចឈានដល់ការបញ្ចប់ក្របខណ្ឌ ករណីមានការល្មើសបញ្ចេញវិញ្ញាសាប្រឡង មុនការប្រកាសលទ្ធផលជាផ្លូវការ។ ក្រសួងមិនមានករណីលើកលែង ចំពោះការល្មើសនេះនោះទេ។

ជាការរឹតបន្តឹងបន្ថែម ពិសេសក្នុងការគ្រប់គ្រងភាពមិនប្រក្រតី ការពារការបែកធ្លាយវិញ្ញាសា និងដើម្បីធានាយុត្តិធម៌ សម្រាប់បេក្ខជនប្រឡងគ្រប់រូប នៅក្នុងការប្រឡងបាក់ឌុបឆ្នាំនេះ គឺនឹងមានវត្តមានអង្គភាពប្រឆាំងអំពើពុករលួយចូលរួមសង្កេតការណ៍តាំងពីដំណាកាល បោះពុម្ពនិងវេចខ្ចប់វិញ្ញាសា រហូតដល់ដំណាក់កាលប្រកាសលទ្ធផលផ្លូវការ។

ការប្រឡងបាក់ឌុប នៅក្នុងឆ្នាំ ២០២៦នេះ នឹងប្រព្រឹត្តិទៅ នៅថ្ងៃទី ១០ ថ្ងៃទី ១១ សីហា។ ការប្រកាសលទ្ធផលគ្រោងធ្វើឡើងនៅថ្ងៃទី ២ ខែកញ្ញា សម្រាប់គ្រប់មណ្ឌលប្រឡងទូទាំងប្រទេស។ ការប្រឡងនេះ ក្រសួងអប់រំ នៅតែរក្សាគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន ចេះគឺជាប់។

អត្ថបទ៖គឹមហុក