នាយកវិទ្យាល័យ៖ ការលើកទឹកចិត្តសាលាចំពោះ​សិស្សជាប់និទ្ទេសA ច្រើន​ជា​ការ​ផ្ដល់​កិត្តិយស​ជូន​គ្រូ

នាយកវិទ្យាល័យ លើកឡើងថា គោលការណ៍បន្តផ្ដល់ប្រាក់រង្វាន់លើកទឹកចិត្ត និង​ដាក់​ជា​សាលា​គំរូ ​សម្រាប់សាលាដែលមានសិស្សប្រឡងជាប់និទ្ទេស A ច្រើនជាងគេ គឺជាការផ្ដល់កម្លាំងចិត្ត និង​កិត្តិយសដល់លោកគ្រូ អ្នកគ្រូ ដែលខិតខំបង្រៀនសិស្ស។

លោក ម៉ម សុធានី នាយកវិទ្យាល័យ ហ៊ុន សែន សេរីភាព ស្ថិតក្នុងក្រុងតាខ្មៅ ខេត្តកណ្ដាល បាន​ប្រាប់ BTV នៅថ្ងៃទី៧ ខែសីហា ឆ្នាំ២០២៦នេះ ថា គោលការណ៍ ដែលរដ្ឋមន្រ្ដីក្រសួងអប់រំ យុវជន និងកីឡា ប្រកាសថា សាលាដេលមានសិស្សប្រឡងជាប់និទ្ទេស A ច្រើនជាងគេ និង​សាលា​មាន​អត្រាសិស្សជាប់ច្រើន នឹងទទួលបានប្រាក់រង្វាន់លើទឹកចិត្ត និងដាក់ជាសាលាគំរូ គឺ​ការ​លើក​ទឹកចិត្ត និងផ្ដល់កិត្តិយសជូនលោកគ្រូ អ្នកគ្រូ ដែលខិតខំបង្រៀន។ សម្រាប់សាលារបស់លោក ដែលជាប់លេខមួយ នៅក្នុងខេត្តកណ្ដាល និងលេខ ២ នៅ​ទូទាំង​ប្រទេស​ មានសិស្សប្រឡងជាប់និទ្ទេស A ច្រើនកាលពីឆ្នាំ២០២៥ សង្ឃឹមថា ឆ្នាំនេះ សិស្ស​របស់​លោក​នឹង​ខិតខំប្រឡងយកនិទ្ទេសល្អបានច្រើនជាងឆ្នាំមុន។

សូមរំឭកជូនថា កាលពីឆ្នាំ២០២៥ លទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សិស្ស​ប្រឡងជាប់ជាង ១២ម៉ឺននាក់ ក្នុងចំណោមបេក្ខជនសរុបជាង ១៤ម៉ឺននាក់។ ហើយ​សិស្ស​ជាប់​និទ្ទេស ​A មានចំនួន ៣,០០៣នាក់ រាជធានីភ្នំពេញឈរនៅលំដាប់ទី១ ខេត្តកណ្ដាល លេខ​២ និងខេត្តសៀមរាប នៅលេខរៀងទី៣។ សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ក្នុងឆ្នាំ២០២៦នេះ នឹង​ប្រព្រឹត្ត​ទៅ​ថ្ងៃទី១០ និងទី១១ ខែសីហា។ នៅក្នុងសម័យប្រឡងឆ្នាំនេះ មានបេក្ខជនជាង ១៥​ម៉ឺន​នាក់​។ ​ក្រសួងអប់រំ យុវជន និងកីឡា អះអាងថា ដំណើរការប្រឡងនៅឆ្នាំនេះ នឹងប្រព្រឹត្តទៅ ដោយ​បន្ត​អនុវត្តម៉ឺងម៉ាត់ គោលការណ៍គ្រឹះទាំង៤ ច្បាប់, យុត្តិធម៌, តម្លាភាព និងលទ្ធផល​អាច​ទទួល​យក​បាន ឬ អ្នកចេះគឺជាប់។ ពាក់ព័ន្ធដំណើរការប្រឡងនេះ រដ្ឋមន្រ្ដីក្រសួងអប់រំ បញ្ជាក់ថា កំណែ​ទម្រង់ការឡងកំពុងធ្វើឱ្យគុណភាពអប់រំនៅកម្ពុជា កាន់តែប្រសើរ៕ អត្ថបទ៖ លៀ ស៊ីណា