លិខិតចំហ៖អង្គការសង្គមស៊ីវិលផ្ញើជូន ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន

សូមគោរពជូន ឯកឧត្តមរដ្ឋមន្រ្តី ជាទីគោរព!

ក្នុងនាមអង្គការសង្គមស៊ីវិលអន្តរជាតិ ដែលបានប្តេជ្ញាចិត្តយ៉ាងមុតមាំក្នុងការការពារបរិស្ថាន និងការលើកកម្ពស់ការអភិវឌ្ឍប្រកបដោយចីរភាព យើងខ្ញុំសូមសម្តែងនូវការកោតសរសើរយ៉ាងស្មោះស្ម័គ្រចំពោះការដឹកនាំ និងការបន្តការប្តេជ្ញាចិត្តរបស់ឯកឧត្តមរដ្ឋមន្រ្តី ក្នុងការការពារបរិស្ថាននៅកម្ពុជា។

យើងខ្ញុំសូមប្រកាន់ខ្ជាប់នូវគោលការណ៍ដែលថា ប្រសិទ្ធភាពក្នុងកិច្ចការពារបរិស្ថាន គឺផ្អែកលើក្របខ័ណ្ឌច្បាប់ដ៏រឹងមាំ ការអនុវត្តច្បាប់ដោយយុត្តិធម៌ និងស្មើភាព ព្រមទាំងការប្រើយន្តការច្បាប់ និងលិខិតបទដ្ឋានគតិយុត្តយ៉ាងមានប្រសិទ្ធភាព ដើម្បីធានានូវការគោរពច្បាប់ និងការការពារព្រៃឈើ សត្វព្រៃ ទន្លេ ជីវចម្រុះ និងសុខុមាលភាពរបស់ប្រជាជនជំនាន់នេះ និងជំនាន់ក្រោយ ទាំងនៅកម្ពុជា និងជាផ្នែកមួយនៃប្រព័ន្ធអេកូឡូស៊ីសកល។

យើងខ្ញុំក៏ទទួលស្គាល់ផងដែរថា ការការពារប្រកបដោយចីរភាព ទាមទារឱ្យមានសកម្មភាពប្រកបដោយកិច្ចសហការ និងការសម្របសម្រួល។ គ្មានស្ថាប័ន ឬប្រទេសណាមួយអាចដោះស្រាយបទល្មើសបរិស្ថានតែម្នាក់ឯងបានឡើយ។ បញ្ហាប្រឈមបទល្មើសបរិស្ថាន ទាមទារឱ្យមានកិច្ចសហប្រតិបត្តិការ រវាងរាជរដ្ឋាភិបាល សង្គមស៊ីវិល សហគមន៍មូលដ្ឋាន វិស័យឯកជន គ្រឹះស្ថានឧត្តមសិក្សា ដៃគូអភិវឌ្ឍន៍ ប្រព័ន្ធផ្សព្វផ្សាយ និងប្រជាពលរដ្ឋ។

ស្មារតីនៃកិច្ចសហប្រតិបត្តិការនេះ មិនមែនបង្ហាញពីភាពទន់ខ្សោយនោះទេ ប៉ុន្តែវាស្តែងឱ្យឃើញពីភាពចាស់ទុំរបស់ស្ថាប័ន និងមានចក្ខុវិស័យជាយុទ្ធសាស្ត្រវែងឆ្ងាយ។ កិច្ចសហការពីគ្រប់អ្នកពាក់ព័ន្ធ ជួយពង្រឹងសមត្ថភាព ការទទួលខុសត្រូវរួមគ្នា និងជួយធានាថា ការការពារបរិស្ថានត្រូវ បានចាត់ទុកជាអាទិភាពរបស់ប្រទេសជាតិ និងសម្រាប់ពិភពលោក។

យើងខ្ញុំសូមកោតសរសើរ ចំពោះក្រសួងបរិស្ថាន ដែលបានពង្រឹងកិច្ចសហប្រតិបត្តិការ និងលើកកម្ពស់ការចូលរួមពីគ្រប់ភាគីទាំងអស់ ក្នុងការគ្រប់គ្រងបរិស្ថាននិងធនធានធម្មជាតិ។ ការអនុវត្តច្បាប់យ៉ាងម៉ឺងម៉ាត់ និងកិច្ចសហប្រតិបត្តិការយ៉ាងទូលំទូលាយ គឺជាយុទ្ធសាស្ត្រដែលមានប្រសិទ្ធភាព ក្នុងការប្រយុទ្ធប្រឆាំងនឹងបទល្មើសបរិស្ថាន និងការលើកកម្ពស់អភិបាលកិច្ចបរិស្ថាន។

យើងខ្ញុំមានសេចក្តីសោមនស្សរីករាយយ៉ាងខ្លាំង ចំពោះភាពបើកចំហរបស់ក្រសួងបរិស្ថាន ក្នុងការអនុញ្ញាតឱ្យមានការចូលរួម ពីអ្នកពាក់ព័ន្ធគ្រប់វិស័យក្នុងសង្គម រួមទាំងដៃគូអន្តរជាតិផងដែរ។ ការពារបរិស្ថាន គឺជាការទទួលខុសត្រូវរួមគ្នា ដែលត្រូវតែឆ្លងកាត់ព្រំដែនរបស់ប្រទេសមួយ ហើយពង្រឹងនិងពង្រីកនូវទំនុកចិត្ត ភាពធន់ និងចីរភាពរយៈពេលវែង នៅលើពិភពលោក។

ក្នុងនាមជាអង្គការសង្គមស៊ីវិលអន្តរជាតិ យើងខ្ញុំសូមបញ្ជាក់ជាថ្មី នូវការប្តេជ្ញាចិត្តរបស់យើងខ្ញុំ ក្នុងការធ្វើការរួមគ្នាជាមួយក្រសួងបរិស្ថានកម្ពុជា សហគមន៍មូលដ្ឋាន និងភាគីពាក់ព័ន្ធទាំងអស់ ក្នុងបេសកកម្មការពារបរិស្ថាន ទាំងនៅកម្រិតជាតិ និងសកលលោក។

យើងខ្ញុំសូមថ្លែងអំណរគុណចំពោះ ឯកឧត្តម សម្រាប់ភាពជាអ្នកដឹកនាំ ភាពបើកចំហ និងការប្តេជ្ញាចិត្តចំពោះឯកភាព ដែលជាគ្រឹះសម្រាប់ការជឿនលឿនរបស់ប្រទេសប្រកបដោយចីរភាព។

សូមឱ្យប្រទេសកម្ពុជាបន្តរុងរឿងជានិច្ច ក្រោមនីតិរដ្ឋ និងកិច្ចសហប្រតិបត្តិការជាតិ និងអន្តរជាតិ ក្នុងការការពារបរិស្ថានសម្រាប់មនុស្សជំនាន់នេះ និងជំនាន់ក្រោយ។

សូម ឯកឧត្តម មេត្តាទទួលនូវការគោរពដ៏ខ្ពង់ខ្ពស់បំផុតអំពីយើងខ្ញុំ,ក្នុងនាមសង្គមស៊ីវិលដែលធ្វើការការពារបរិស្ថាន