សមាជិក ប.ស.ស. សាទរចំពោះម៉ាស៊ីនបញ្ជាក់អត្តសញ្ញាណស្វ័យប្រវត្តិជួយកាត់បន្ថយការរង់ចាំ

ប្រជាពលរដ្ឋដែលជាសមាជិករបស់បេឡាជាតិសន្តិសុខសង្គម (ប.ស.ស.) បានបង្ហាញក្តីសប្បាយរីករាយ និងសាទរចំពោះការដាក់ឱ្យដំណើរការ “ម៉ាស៊ីន​បញ្ជាក់​អត្ត​សញ្ញា​ណ​ស្វ័យ​ប្រវត្តិ ប.ស.ស. (AIM NSSF) ដោយសារជួយកាត់បន្ថយពេលវេលារង់ចាំយូរ និងកាត់បន្ថយការកក់ស្ទះនៅពេលទៅទទួលសេវាថែទាំសុខភាពនៅមន្ទីរពេទ្យ។

ការធ្វើទំនើបកម្មប្រព័ន្ធបច្ចេកវិទ្យាថ្មីរបស់បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ គឺជាជំហានដោះស្រាយដ៏មានប្រសិទ្ធភាពមួយរបស់ ក្នុងការឆ្លើយតបទៅនឹងតម្រូវការរបស់កម្មករនិយោជិត និងមន្រ្តីរាជការ។ ពីមុនសមាជិក ប.ស.ស. ចំណាយពេលតម្រង់ជួររង់ចាំបញ្ជរពិនិត្យឯកសារ ដែលជារឿយៗបង្ករឱ្យមានការកក់ស្ទះយ៉ាងខ្លាំង នៅពេលមានអ្នកជំងឺមកច្រើនក្នុងពេលតែមួយ។

ប៉ុន្តែនៅពេលនេះ តាមរយៈម៉ាស៊ីនស្វ័យប្រវត្តិខាងលើនេះ សមាជិកម្នាក់ៗចំណាយពេលខ្លីជាងមុនប៉ុណ្ណោះ ក្នុងការបញ្ជាក់អត្តសញ្ញាណ ដើម្បីទទួលបានសេវាព្យាបាល។ ក្រៅពីចំណេញពេលវេលា ឧបករណ៍នេះក៏ជួយកាត់បន្ថយការិយាធិបតេយ្យ និងបង្កើនតម្លាភាពក្នុងការផ្តល់សេវាសុខាភិបាលផងដែរ។

ក្រុមប្រជាពលរដ្ឋដែលបានប្រើប្រាស់ម៉ាស៊ីន​បញ្ជាក់​អត្ត​សញ្ញា​ណ​ស្វ័យ​ប្រវត្តិនេះ បានឱ្យព័ត៍មាន ប៊ីធីវី ដឹងស្រដៀងគ្នាថា ពិតជាសប្បាយចិត្តណាស់ ខណៈពីមុនមកនៅពេលមកមន្ទីរពេទ្យម្តងៗគឺរង់ចាំយូរ ប៉ុន្តែឥឡូវមានម៉ាស៊ីននេះ គ្រាន់តែដាក់កាតភ្លាម ចេញទិន្នន័យភ្លែត មិនបាច់ចាំយូរដូចមុនទេនោះទេ ពោលគឺងាយស្រួលមែនទែន។

 ទាក់ទិននិងម៉ាស៊ីន​បញ្ជាក់​អត្ត​សញ្ញា​ណ​ស្វ័យ​ប្រវត្តិនេះ លោក ម៉េង សុភក្តី ប្រធានក្រុមភ្នាក់ងារមន្ទីរពេទ្យថ្នាក់ជាតិ បានបញ្ជាក់ឱ្យដឹងថា នេះគឺជាជំហានមួ​យក្នុងកា​រធ្វើទំ​នើប​កម្ម​សេ​វា​សា​​ធារ​ណៈរបស់ ប.ស.ស. ដើម្បី​ផ្តល់ភាព​ងាយ​ស្រួល​ រហ័ស និងមា​នប្រសិទ្ធភាពជាង​មុន និងជំរុញ​ការប្រើប្រា​​ស់បច្ចេក​វិទ្យា​ឌីជីថល​​ក្នុង​ការ​ផ្តល់​សេ​វា​ជូនប្រជាពលរដ្ឋឱ្យកាន់​តែមានប្រ​សិទ្ធភាព។ លោកបានបន្ថែមថា បេឡាជាតិសន្តិសុខសង្គម នៅតែបន្តប្តេជ្ញាចិត្តក្នុងការពង្រីក និងអភិវឌ្ឍប្រព័ន្ធឌីជីថលបែបនេះបន្ថែមទៀត ដើម្បីធានាថា ប្រជាពលរដ្ឋកម្ពុជាគ្រប់រូបទទួលបានសេវាគាំពារសង្គមប្រកបដោយគុណភាព ទាន់ចិត្ត និងមានប្រសិទ្ធភាពខ្ពស។

បេឡាជាតិ​សន្តិសុខ​សង្គម ហៅកាត់ថា ប.ស.ស. ​បានដាក់ឱ្យ​ប្រើ​ប្រាស់ម៉ាស៊ីន​បញ្ជាក់​អត្ត​សញ្ញា​ណ​ស្វ័យ​ប្រវត្តិ ប.ស.ស. នៅ​តាម​មូលដ្ឋានសុ​ខាភិបាលចំនួន ១៤ទី​តាំង ដើម្បី​កាត់​បន្ថយ​ការ​កក​ស្ទះ និង​ការ​រង់​ចាំ​យូរ​របស់សមាជិក ប.ស.ស. នៅ​ពេលមកប្រើប្រា​ស់សេវាកម្មនៅតាមម​ន្ទីរពេទ្យ។ សូមជំរាបជូនទៀតថា ទី​តាំងទាំង១៤នេះ រួមមាននៅមន្ទីរពេទ្យកាល់​ម៉ែត, មន្ទី​រ​ពេទ្យ​ជាតិតេជោ​សន្តិភាព, មន្ទី​រពេទ្យ​ព្រះអង្គ​ឌួង, មន្ទី​រពេទ្យព្រះកេ​តុមាលា, មន្ទីរពេទ្យហ្លួងម៉ែ, មន្ទីរពេទ្យ​មិត្តភាព​កម្ពុជា-ចិន ព្រះកុ​សុ​មៈ, មន្ទីរ​ពេទ្យកុមារជាតិ, មន្ទីរពេទ្យ​មិត្តភាពខ្មែរ-សូវៀត, មន្ទីរពេទ្យ​ព្រះសីហនុមណ្ឌលនៃក្តី​សង្ឃឹម, វិទ្យាស្ថា​នជាតិសុខ​ភាពសា​ធារណៈ, មជ្ឈ​មណ្ឌ​ល​ជាតិគាំ​ពារមា​តានិង​ទារក, មជ្ឈ​មណ្ឌលជា​តិ កំចាត់​រោគ​របេង និង​ហង់​សិន, មន្ទីរ​ពេទ្យបង្អែក​ខេត្ត​កំពង់​ចាម និងមន្ទី​រ​ពេទ្យបង្អែក​ខេត្ត​សៀម​រាប៕

អត្ថបទ៖ ឈិត បូរ៉ាវី