បេក្ខជនប្រឡងបំពេញវិជ្ជា​ បាក់ឌុប នៅមណ្ឌលប្រឡងវិទ្យាល័យ ជា ស៊ីម សន្ធរម៉ុក ប្ដេជ្ញា​ចិត្ត​ខិតខំ​ប្រឡង​ឱ្យជាប់

នៅ​ព្រឹកថ្ងៃទី១០ ខែសីហា ឆ្នាំ២០២៦ ការប្រឡងសញ្ញាបត្រមធ្យមសិក្សាទុតិយភូមិ ឬ «បាក់ឌុប» បានចាប់ផ្តើមជាផ្លូវការ ខណៈបេក្ខជនប្រឡងបំពេញវិជ្ជា និងបេក្ខជនស្វ័យរិន ១,០៥០នាក់ បានចូលរួមប្រឡងនៅមណ្ឌលវិទ្យាល័យ ជា ស៊ីម សន្ធរម៉ុក រាជធានីភ្នំពេញ។ ជា​មួយ​ទឹក​មុខស្ងប់ស្ងាត់ និងការតាំងចិត្តខ្ពស់ បេក្ខជនម្នាក់ៗបានចូលមណ្ឌលប្រឡង ដោយ​ប្តេជ្ញា​បញ្ចេញ​សមត្ថភាពឱ្យអស់ពីលទ្ធភាព ដើម្បីសម្រេចបានលទ្ធផលល្អ និងបំពេញក្តី​រំពឹង​របស់​ក្រុម​គ្រួសារ​។

តាំងពីព្រឹកព្រលឹម បេក្ខជនបានមកកាន់មណ្ឌលប្រឡង ដោយអ្នកខ្លះមកជាមួយក្រុមគ្រួសារ ខ្លះ​មក​ជា​មួយ​មិត្តភក្តិ និងអ្នកខ្លះទៀតធ្វើដំណើរមកដោយខ្លួនឯង។ បេក្ខជនទាំងអស់ មកទីនេះ មាន​គោល​ដៅរួមតែមួយ គឺការខិតខំប្រឡងឱ្យបានល្អ ដើម្បីទទួលបាន​សញ្ញា​បត្រ​បាក់​ឌុប​ដែល​ខ្លួន​ប្រាថ្នា​។

បេក្ខជនប្រឡង បានប្រាប់ BTV ថា សម្រាប់មនុស្សមួយចំនួន សញ្ញាបត្របាក់​ឌុប​អាច​ជា​ក្រដាស​មួយ​សន្លឹក ​ប៉ុន្តែសម្រាប់អ្នករៀនបំពេញវិជ្ជា អាចជាគន្លឹះមួយ​សម្រាប់​បើក​ទ្វារ​ទៅ​រក​ឱកាស​ថ្មី​ៗ​ក្នុង​ជីវិត ដូចជា ការបន្តការសិក្សា និងការស្វែង​រក​ការ​ងារ​ដែល​មាន​លក្ខ​ខណ្ឌ​តម្រូវ​ឱ្យ​មាន​សញ្ញាបត្របា​ក់ឌុប ជាដើម។ មុនពេលចូលបន្ទប់ប្រឡង ទឹកមុខរបស់បេក្ខជន​ម្នាក់​ៗ​អាច​បង្ហាញ​អារម្មណ៍​ខុសៗគ្នា។ អ្នកខ្លះមានភាពជឿជាក់ អ្នកខ្លះមានការភ័យបារម្ភ ខណៈ​អ្នក​ខ្លះទៀ​ត​ព្យាយាម​ផ្តោត​អារម្មណ៍លើអ្វីដែលខ្លួនបានរៀន។ ប៉ុន្តែអ្វីដែលដូចគ្នានោះ គឺពួកគេ​បាន​មក​ដល់​ទីនេះ ​ដោយមានគោលដៅមួយ គឺប្រឹងប្រែងឱ្យអស់ពីសមត្ថភាព ដើម្បីទទួលបា​ន​លទ្ធ​ផល​ដែល​ខ្លួន​ចង់​បាន ​និងធ្វើឱ្យក្រុមគ្រួសារមានមោទកភាព។

មណ្ឌលប្រឡងបាក់ឌុបនៅវិទ្យាល័យសន្ធរម៉ុក មានចំនួន ៤២ បន្ទប់ ដែលមានបេក្ខ​ជន​ប្រឡង​បំពេញ​វិជ្ជា​ប្រមាណ ១០៥០នាក់។ ក្រសួងអប់រំ យុវជន និងកីឡា បានបញ្ជាក់ថា ការប្រឡង​សញ្ញា​បត្រ​មធ្យមសិក្សាទុតិយភូមិ សម័យប្រឡង ១០ សីហា ឆ្នាំ ២០២៦ មាន​បេក្ខ​ជន​ចុះ​ឈ្មោះ​ប្រឡង​សរុប ១៥១ ២៣៨ នាក់ ក្នុងនោះ បេក្ខជនថា្នក់វិទ្យាសាស្រ្ត ចំនួន ៣៧ ៤៤៥នាក់ និង​បេក្ខ​ជន​ថ្នាក់​វិទ្យាសាស្រ្តសង្គម ចំនួន ១១៣ ៧៩៣ នាក់៕ អត្ថបទ៖ ធូ វិរៈ