បេក្ខជនប្រឡងបាក់ឌុបម្នាក់នៅខេត្តកំពង់ធំ ជួបគ្រោះថ្នាក់ចរាចរណ៍ ប៉ុន្តែស្ម័គ្រចិត្ត​បន្តប្រឡង​ដោយមិនបោះបង់

កំពង់ធំ៖ បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ១រូប ឈ្មោះ ហេង បូរី លេខតុ ៣៤៦ បន្ទប់លេខ ១៤ ប្រឡងនៅមណ្ឌលបឋមសិក្សាត្រពាំងវែង ខេត្តកំពង់ធំ បាន​ជួប​ហេតុ​ការណ៍រថយន្តធុនធំកៀរ នៅវេលាម៉ោងជាង ១ នាទីរសៀលថ្ងៃទី១០ ខែសីហា ឆ្នាំ២០២៦ នេះ បន្ទាប់ពីរូបគេបានចាកចេញពីមណ្ឌលប្រឡងក្រោយបញ្ចប់ដំណើរការសំណេរនាវគ្គព្រឹក។

ទោះបីជាជួបហេតុការណ៍ចៃដន្យនេះក្តី បេក្ខជន ហេង បូរី បានបញ្ជាក់​អះអាងថា​សុខភាព​របស់​ខ្លួន​មិនមានបញ្ហាធ្ងន់ធ្ងរ ហើយអាចបន្តការប្រឡងបានធម្មតា។

ចំពោះវិធានការដោះស្រាយភ្លាមៗ ប្រធានអប្បមាទ និងប្រធានមណ្ឌលប្រឡង បានសម្រេច​អនុញ្ញាត​ឱ្យបេក្ខជនរូបនេះចូលរួមដំណើរការប្រឡងតាមកាលវិភាគធម្មតា ដើម្បីធានាសិទ្ធិ និង​ឱកាស​ក្នុងការប្រឡងរបស់បេក្ខជន។

ពាក់ព័ន្ធនឹងបេក្ខជនមានបញ្ហាសុខភាពក្នុងអំឡុងដំណើរសំណេរការប្រឡងសញ្ញាបត្រមធ្យមសិក្សា​ទុតិយភូមិនារសៀលថ្ងៃទី១ សម័យប្រឡង៖ ១០ សីហា ២០២៦នេះ ក្រសួងអប់រំ បាន​បញ្ជាក់​ថា មានបេក្ខជនមកពីបណ្ដាខេត្តមួយចំនួន ដែលមានបញ្ហា​សុខភាព​នៅ​ក្នុង​ដំណើរ​សំណេរ​កា​រប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦។ ក្នុងនោះបេក្ខជនមួយចំនួន បានបន្តការប្រឡង​ឡើងវិញ​ក្រោម​ការ​យក​ចិត្ត​ទុក​ដាក់​មើល​ថែពី​ក្រុម​គ្រូពេទ្យ បន្ទាប់ពីមានអាការៈធូរស្រាល។

ក្រសួងអប់រំ ជំរុញលើកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និង​បរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបាន​លទ្ធផល​ល្អ​ប្រសើរ​ក្នុង​ការ​ប្រឡង​៕