បេក្ខជនប្រឡងបាក់ឌុបមួយចំនួនពិចារណាងាកមករៀនជំនាញបច្ចេកទេស ក្រោយ​ប្រកាស​លទ្ធផល​ប្រឡង

បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)មួយចំនួនកំពុងពិចារណារៀន​ជំនាញ​​បច្ចេកទេស បន្ទាប់ពីប្រឡងចប់ ឬបើលទ្ធផលប្រឡងធ្លាក់។

នៅព្រឹកថ្ងៃ​ទី១១ ខែសីហា ឆ្នាំ២០២៦នេះ បេក្ខជនប្រឡងបាក់ឌុប នៅរាជធានីភ្នំពេញ បានប្រាប់BTVឲ្យដឹងថា ក្រោយពេលប្រឡងចប់ គឺមានបំណងចង់រៀនជំនាញបច្ចេកទេសដែរ ប៉ុន្តែចាំមើលលទ្ធផលនៃការប្រឡងសិន បើសិនប្រឡងជាប់នឹងបន្តការសិក្សានៅសាលកវិទ្យាល័យ ប៉ុន្តែបើប្រឡងធ្លាក់ អាចនឹងចូលរៀនជំនាញបច្ចេកទេស ដូចជា៖ អគ្គិសនី និងជំនាញផ្សេងៗមួយចំនួនទៀត ដើម្បីទទួលបានចំណេះជំនាញមួយពិតប្រាកដ អាចរកប្រាក់ចំណូលផ្គត់ផ្គង់ជីវភាពរស់នៅប្រចាំថ្ងៃ។ យ៉ាណាក្តី បេក្ខជនទាំងនោះរំពឹងទុកថា ការប្រឡងបាក់ឌុបនៅឆ្នាំនេះ នឹងទទួលបានលទ្ធផលវិជ្ជមាន។

ការប្រឡងសញ្ញាបត្រមធ្យមសិក្សាទុតិភូមិ ដំណើរការចំនួនពីរថ្ងៃ ចាប់ពីថ្ងៃទី១០ដល់ថ្ងៃទី១១ខែសីហា ឆ្នាំ២០២៦ ដោយមានបេក្ខជនសរុបចំនួនជាង១៥ម៉ឺននាក់ ក្នុងនោះថ្នាក់វិទ្យាសាស្រ្តមានចំនួនជាង៣ម៉ឺន៧ពាន់នាក់ និងថ្នាក់វិទ្យាសាស្រ្តសង្គមមានចំនួនជាង១សែននាក់។ លទ្ធផលនៃការប្រឡងនឹងប្រកាសនៅថ្ងៃទី២ខែកញ្ញា ឆ្នាំ២០២៦ តាមមណ្ឌលសំណេរនៃរាជធានីភ្នំពេញ-ខេត្តទាំង២៥ ទូទាំងប្រទេសកម្ពុជា។

ជាការកត់សំគាល់ ក្រោយដឹងលទ្ធផលនៃការប្រឡង យុវជនភាគច្រើនដែលប្រឡងជាប់ នឹងបន្តការសិក្សានៅសាកលវិទ្យាល័យទៅតាមជំនាញដែលពួកគេពេញចិត្ត និងស្រលាញ់ រីឯយុវជនដែលប្រឡងធ្លាក់មួយចំនួនរង់ចាំការប្រឡងនៅឆ្នាំបន្ទាប់ និងមួយចំនួនទៀតងាកមករៀនជំនាញបច្ចេកទេស និងវិជ្ជាជីវៈ ស្របតាមកម្មវិធីនយោបាយរបស់រាជរដ្ឋាភិបាល អាណត្តិទី៧ នៃរដ្ឋសភា។

ចំពោះមុខវិជ្ជាជំនាញបច្ចេកទេស និងវិជ្ជាជីវៈ មានដូចជា៖សំណង់ អគ្គិសនី និងថាមពល អេឡិត្រូនិក បរិក្ខារត្រជាក់ និងកម្កៅ កម្មន្តសាល មេការនិករថយន្ត និងកសិ-ឧហ្សាហកម្មជាដើម។ ក្រោយពេលរៀនចប់ក្រសួងការងារ និងបណ្តុះបណ្តាលវិជ្ជាជីវៈ ដែលជាសេនាធិការរបស់រាជរដ្ឋាភិបាល បានជួយសម្របសម្រួលរកការងារជូនដល់យុវជនទាំងនោះ៕ អត្ថបទ៖ ទូច សោភ័ណ