គណបក្សនយោបាយសម្ព័ន្ធភាពបើកកិច្ចប្រជុំដើម្បីពិនិត្យវឌ្ឍនភាពការងារសំខាន់ៗសម្រាប់ជាតិ

ភ្នំពេញ ៖ គណបក្សនយោបាយសម្ព័ន្ធភាពបានបើកកិច្ចប្រជុំក្រុមការងារសម្របសម្រួល លើកទី៨ នៅថ្ងៃទី១២ ខែសីហា ឆ្នាំ២០២៦ នៅវិមាន ៧ មករា ក្រោមអធិបតីភាពឯកឧត្តម សោម សឿន សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារសម្រប​សម្រួល នៃគណបក្សនយោបាយសម្ព័ន្ធ។

ឯកឧត្តម សោម សឿន បានថ្លែងប្រាប់ BTV ថា កិច្ចប្រជុំនេះ គឺតាមស្មារតីបទបញ្ជាផ្ទៃក្នុងនៃគណបក្សនយោបាយសម្ព័ន្ធភាពដែលចែងថា ក្រុមការងារសម្របសម្រួលនៃគណបក្សនយោបាយសម្ព័ន្ធភាពត្រូវប្រជុំក្នុង ៣ខែម្តង ហើយភារកិច្ចរបស់ក្រុមការងារសម្របសម្រួលមានចំនួន៤ រួមមាន៖ ទី១. ត្រួតពិនិត្យដំណើរការនៃការអនុវត្តកិច្ចព្រមព្រៀងសម្ព័​ន្ធភាព និងកិច្ចសហ​ប្រតិបត្តិការរវាងគណបក្សនយោបាយក្នុងសម្ព័ន្ធភាព និងលើកទិសដៅការងារបន្ត។ ទី២. ពិនិត្យមើលសម្រ​ប​​​សម្រួល​ទំនាក់ទំនងកិច្ចសហប្រតិបត្តិការនៅក្នុងសម្ព័ន្ធភាពពាក់ព័ន្ធទៅនិងការអនុវត្តកិច្ចព្រមព្រៀងសម្ព័ន្ធភាព និងកិច្ចសហ​ប្រតិបត្តិការមានបញ្ហាអ្វីខ្លះ?។ ទី៣. សម្របសម្រួលបញ្ហានានាដែលអាចកើតមានឡើងរវាងបណ្តាគណបក្សនយោបាយក្នុងសម្ព័ន្ធភាព និងលើកយោបល់ជូនប្រធានគណបក្សនយោបាយអំពីការ​បង្កើតគណៈកម្មការសម្របសម្រួល ក្នុងករណីដែលក្រុមការងារសម្របសម្រួល មិនបានដោះស្រាយបញ្ហានានាដែលកើតមានឡើង។ ទី៤. ពិនិត្យឡើងវិញអំពីដំណើរការ នៃការអនុវត្តកិច្ចព្រមព្រៀង​សហ​ប្រតិបត្តិការរវាងគណបក្សក្នុងរយៈពេលដើមឆ្នាំ២០២៦ នេះ និងពិនិត្យមើលសភាពការណ៍ទូទៅនៅកម្ពុជា និងទិសដៅការងារ​ដែលត្រូវសហការបន្តទៀតនៅពេលខាងមុខ ជាពិសេសក្នុងដំណើរការឆ្ពោះទៅចូលរួមការបោះឆ្នោតជ្រើសរើសក្រុមប្រឹក្សាឃុំសង្កាត់​ឆ្នាំ២០២៧ខាងមុខនេះ។

លោកជំទាវ ពោធិតី សាវត្ថី ប្រធានគណបក្សធម្មាធិបតេយ្យបានថ្លែងថា សម្ព័ន្ធភាពគណបក្សនយោ​បាន គឺបីខែប្រជុំម្តងជាមួយឯកឧត្តម សោម សឿន ប្រធានក្រុមការងារសម្របសម្រួល នៃគណបក្សនយោបាយសម្ព័ន្ធ។ ហើយប្រជុំមួយឆ្នាំម្តងជាមួយសម្តេចតេជោ ហ៊ុន សែន ប្រធានគណបក្សប្រជាជនកម្ពុជា។ ហើយរាល់បីខែ គឺមានរបាយការណ៍របស់គណបក្សនយោបាយនិមួយៗ ដើម្បីផ្តល់យោបល់​ទៅ​គណបក្សសម្ព័ន្ធភាពដើម្បីរៀបចំគោលនយោបាយសម្រាប់អនុវត្តនៅអាណត្តិក្រោយ។

លោកជំទាវបានបញ្ជាក់ថា ៖ “សម្ព័ន្ធភាពនេះ គឺជាសម្ព័ន្ធភាពដ៏រឹងមាំសម្រាប់ដឹកនាំ​ប្រទេសកម្ពុជា និងផ្តល់យោបល់ជាច្រើននៅចំណុចខ្វះខាត ​ចំណុចណាដែលត្រូវកែ គឺយើងកែ ផ្តល់យោបល់ជូនថ្នាក់ដឹកនាំកែសម្រួល កន្លែងណាដែលបានអភិវឌ្ឍន៍រីកចំរើន យើងក៏លើកអំពីគុណភាព និងភាពវិជ្ជមាន និងអវិជ្ជមាន គឺយើងយកមកជជែកគ្នាក្នុងរាល់បីខែម្តង។ ដូច្នេះលទ្ធិប្រជាធិបតេយ្យនៅកម្ពុជា គឺមានពេញលេញតែម្តង”។

ឯកឧត្តម អ៊ុន វិសិទ្ធគុន ប្រធានគណបក្សកម្លាំងប្រជាធិប​តេយ្យបានថ្លែងថា សម្ព័ន្ធភាពគណបក្សនយោបាយមានការរៀបចំ គឺដើម្បីពង្រឹងនៅសម្ព័ន្ធភាពឲ្យមានភាពរឹងមាំក៏ដូចជាឆ្លុះបញ្ចាំងនៅការការជួយតាមដានក៏ដូចជាការអនុវត្តឲ្យស្របទៅតាមកិច្ចព្រមព្រៀងនៅក្នុងបទបញ្ជាផ្ទៃក្នុង និងបង្ហាញពីវឌ្ឍន​ភាពនៃសម្ព័ន្ធភាពនៅក្នុងកិច្ចការងារនយោបាយស្តីអំពីការចេះជួយគ្នានៅក្នុងគ្រាមួយដែលកំពុងតែជួបនៅបញ្ហា។ ជាក់ស្តែងដូចជាពេលបច្ចុប្បន្ននេះ ប្រទេសកម្ពុជាកំពុងតែរង់ការឈ្លានពានពីប្រទេសថៃ។ ដូច្នេះទាំងអស់គ្នាជាអ្នកនយោបាយ ក៏ត្រូវតែចូលរួមជាមួយនឹងរាជរដ្ឋាភិបាលដើម្បីទប់ស្កាត់នៅព័ត៌មានដែលមានចេតនាញុះញង់ស្មារតីរបស់ប្រជាពលរដ្ឋឲ្យជឿទៅលើរឿងដែលមិនពិត រឿងដែលប្រឌិត​ធ្វើឲ្យបែកបាក់សាមគ្គីខ្មែរនិងខ្មែរ និងធ្វើឲ្យបែកបាក់សាមគ្គីស្មារតីអ្នកនយោបាយជាតិនិយមទាំងអស់គ្នា។

ឯកឧត្តមបានបញ្ជាក់ថា ៖ “ជាអ្នកនយោបាយ គឺខ្ញុំគាំទ្រលើគោលនយោបាយរបស់រាជរដ្ឋាភិបាលដែលដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត និងសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសូមគាំទ្រនៅគ្រប់ចំណាត់ការទាំងអស់ ពីព្រោះទាំងអស់នេះ គឺដើម្បីជាតិមាតុភូមិ និងប្រជាពលរដ្ឋ មិនមែនដើម្បីបុគ្គលទេ”។

សូមជម្រាបថា កាលពីថ្ងៃទី២៥ ខែតុលា ឆ្នាំ២០២៣ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានចុះហត្ថលេខាលើកិច្ចព្រមព្រៀងចងសម្ព័ន្ធភាពរវាងគណបក្សប្រជាជនកម្ពុជា ជាមួយបណ្ដាគណបក្សនយោបាយនៅកម្ពុជា ចំនួន២៧ផ្សេងទៀត។ សម្ព័ន្ធភាពរវាងបក្សនយោបាយទាំង២៨ គឺមានគោលដៅយូរអង្វែង សម្រាប់ប្រទេសកម្ពុជា។ ការចងសម្ព័ន្ធនេះ ជាការឆ្លុះបញ្ចាំងអំពីសាមគ្គីភាព នៃការថែរក្សាសន្តិភាព និងការអភិវឌ្ឍរបស់កម្ពុជា៕ អត្ថបទ៖ វង្ស សុភាព