រដ្ឋមន្រ្តីកសិកម្មលើកទឹកចិត្តមន្ត្រីកសិកម្មឃុំ បន្តជួយកសិករលើការកាត់បន្ថយថ្លៃចំណាយ និងទទួលផលចំណេញខ្ពស់

ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តដល់មន្ត្រីកសិកម្មឃុំទាំងអស់ ឱ្យបន្តយកចិត្តទុកដាក់ជួយគាំទ្រប្រជាកសិករ ក្នុងការអនុវត្តបច្ចេកទេសកាត់បន្ថយថ្លៃដើម និងបង្កើនផលិតភាព ដើម្បីធានាឱ្យកសិករទទួលបានផលចំណេញខ្ពស់ និងលើកកម្ពស់ជីវភាពរស់នៅ។

ក្នុងកម្មវិធីជួបសំណេះសំណាលតម្រង់ទិស​ និងស្តាប់សំណើរសំណូមពររបស់មន្រ្តីកសិកម្ម​ឃុំ-សង្កាត់ នៅក្រុង/ ខេត្តស្ទឹងត្រែង កាលពីថ្ងៃទី១២ សីហា ឆ្នាំ២០២៦កន្លងទៅ​ ឯកឧត្តមរដ្ឋមន្រ្តី ឌិត ទីណា​ បានលើកឡើងពីសារសំខាន់របស់មន្រ្តីកសិកម្មឃុំ​ ក្នុងការអនុវត្តកម្មវិធីគោលនយោបាយអាទិភាពទី៥​ និងទី៦​ របស់រាជរដ្ឋាភិបាល​នីតិកាលទី៧​ ដើម្បីជួយគាំទ្រប្រជាកសិករក្នុងការវិភាគ​សេដ្ឋកិច្ច​ គណនាថ្លៃដើមផលិត បច្ចេកទេស​ផលិត និងការតភ្ជាប់ទីផ្សារ​ ស្របតាមទស្សនទាន​ “មានហូប​ មានប្រើ​ មានបាន​ និងមានរហូត”។

ទាក់ទិនការលើកឡើងខាងលើនេះ ឯកឧត្តម​ ទូច​ គង្គា អភិបាលរងខេត្តស្ទឹងត្រែង​ បានលើកឡើងថា ក្នុងនាមរដ្ឋបាលខេត្តពិតជាមានគាំទ្រចំពោះគោលនិយោបាយរបស់រាជរដ្ឋាភិបាល​នីតិកាលទី៧ ដើម្បីជួយដល់ប្រជាពលរដ្ឋក្នុងការតម្រង់ទិសវិស័យកសិកម្មនេះដោយស្របតាមលក្ខណៈបទដ្ឋានបច្ចេកទេស ដើម្បីទទួលបានទាំងគុណភាព និងបរិមាណខ្ពស់លើគ្រប់វិស័យកសិកម្មទាំងអស់ក្នុងខេត្ត។ ជាក់ស្តែង នៅក្នុងខេត្តស្ទឹងត្រែង ប្រជាជនដែលប្រកបមុខរបរកសិកម្មមានចំនួនជាង ៧៦% ពាណិជ្ជកម្ម៥% សិប្បកម្ម៤% ចិញ្ចឹមសត្វ៣% និងនេសាទ១%។

សូមជម្រាបជូនថា​ មន្រ្តីកសិកម្មឃុំ-សង្កាត់​ គឺជាប្រព័ន្ធប្រសាទ និងជាតួអង្គសំខាន់របស់ក្រសួងកសិកម្ម​ ក្នុងការប្រមូលនូវទិន្នន័យ​ ព័ត៌មាននៅតាមមូលដ្ឋាន​ ដើម្បីអនុញ្ញាតឱ្យក្រសួងកសិកម្ម មានទិន្នន័យគ្រប់ជ្រុងជ្រោយក្នុងការបម្រើការងារបច្ចេកទេសដល់កសិករចំគោលដៅ ជំរុញកសិករផ្សារភ្ជាប់​នឹងសហគមន៍កសិកម្មទំនើប​ មានផលចំណេញសេដ្ឋកិច្ច​ និងលើកកម្ពស់ជីវភាព​ សំដៅប្រែក្លាយកម្ពុជាទៅជាប្រទេសចំណូលខ្ពស់នៅឆ្នាំ២០៥០៕អត្ថបទ៖ ឈិត បូរ៉ាវី