រដ្ឋមន្រ្តីកសិកម្មជំរុញឱ្យមន្ត្រីកសិកម្មឃុំអនុវត្តតួនាទី​ឱ្យបានល្អ ដើម្បីលើកកម្ពស់ជីវភាពពលរដ្ឋនៅមូលដ្ឋាន​

ភ្នំពេញ៖ ឯកឧត្តម​ ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបសំណេះសំណាលជាមួយមន្ត្រីកសិកម្មឃុំ-សង្កាត់ ដើម្បីតម្រង់ទិសក្នុងការអនុវត្តការងារនិងតួនាទីភារកិច្ច​ ឱ្យកាន់តែមានប្រសិទ្ធភាព​ នៅក្រុងក្រចេះ​ ខេត្តក្រចេះ។

ក្នុងជំនួបសំណេះសំណាល កាលពីព្រឹកថ្ងៃទី១៣​ ខែសីហា​ ឆ្នាំ២០២៦​នេះ ឯកឧត្តមរដ្ឋមន្រ្តី​ បានគូសបញ្ជាក់លម្អិតពីគោលនយោបាយអាទិភាពទី៥​ និងទី៦​ ធ្វើយ៉ាងណាឱ្យប្រជាពលរដ្ឋគ្រប់រូប “មានហូប​​ មានប្រើ​ មានបាន និងមាន​រហូត”​ ដោយសង្កត់ធ្ងន់លើសារ:​សំខាន់នៃ​វិស័យកសិកម្ម​កម្ពុជា​ដែលធានា​បានទាំងស្រុងនូវសន្តិសុខ​ស្បៀងក្នុងគ្រប់កាល:ទេសៈ​ និងនិរន្តរភាពសេដ្ឋកិច្ច​ និងបរិស្ថាន។

ជាមួយនឹងការផ្តាំផ្ញើឱ្យមន្ត្រីកសិកម្មឃុំខិតខំក្នុងការអនុវត្តតួនាទី​ និងភារកិច្ចឱ្យបានល្អប្រសើរ​ជួយដល់ប្រជា​កសិករ​ ឯកឧត្តមរដ្ឋមន្ត្រី ក៏បានផ្តល់អនុសាសន៍ណែនាំអំពីយុទ្ធសាស្ត្រ​ និងសិល្ប:នៃការដោះស្រាយបញ្ហាប្រឈមរបស់កសិករ​ ផ្តល់ជាជំនួយបច្ចេកទេស​ គណនាថ្លៃដើមផលិត លើកទឹកចិត្តឱ្យកសិករធ្វើពិពិធកម្មមុខដំណាំ​ និងការចូលរួមក្នុងសហគមន៍កសិកម្មទំនើប​ សំដៅផ្តល់ផលចំណេញជូនកសិករ​ និងលើកកម្ពស់ជីវភាពប្រជាពលរដ្ឋនៅមូលដ្ឋាន​ សំដៅប្រែក្លាយកម្ពុជា​ ទៅជាប្រទេសចំណូលខ្ពស់នៅឆ្នាំ២០៥០៕