មន្រ្តីសុខាភិបាលឧត្តរមានជ័យ៖ ជំងឺគ្រុនឈាមក្នុងខេត្ត ឆ្នាំនេះកើតឡើងតិចតួចជាងឆ្នាំមុន https://www.btv.com.kh/article/113244

មន្ទីរសុខាភិបាលខេត្តឧត្តរមានជ័យ បានអះអាងថា បញ្ហាជំងឺគ្រុនឈាមចាប់ពីដើមខែមករា មកដល់ខែសីហាចុងឆ្នាំ២០២៦នេះ ការកើតឡើងជំងឺគ្រុនឈាមមានការកើតឡើងតិចតួចជាងឆ្នាំមុនៗ។

លោកវេជ្ជបណ្ឌិត ឃ្លោក ហួត បានឲ្យដឹងទៀតថា ទន្ទឹមនឹងការឆ្លងរាលដាលនៃជំងឺគ្រុនឈាមនេះដែរ រោគសញ្ញាដំបូងគឺមានអាការៈក្តៅខ្លួន ក្អួតចង្អោរ រលាកអញ្ចាញធ្មេញ និងមានកន្ទួលរមាស់ ដូច្នេះបងប្អូនដែលជាអាណាព្យាបាលប្រសិនបើមានកូនៗរបស់បងប្អូនមានបញ្ហានេះកើតឡើងត្រូវប្រញាប់បញ្ជូនមកពិនិត្យព្យាបាលនៅមន្ទីរបង្អែករបស់រដ្ឋ ឬទៅតាមមណ្ឌលសុខភាពដែលមានស្រាប់នៅជិតមូលដ្ឋានរស់នៅរបស់បងប្អូនឲ្យបានលឿនដើម្បីពិនិត្យព្យាបាលបានទាន់ពេលវេលា។

លោកវេជ្ជបណ្ឌិតបានបន្តថា បញ្ហាជំងឺគ្រុនឈាមនេះ មន្រ្តីសុខាភិបាលខេត្តបានធ្វើការផ្សព្វផ្សាយនៅតាមបណ្តាលក្រុងស្រុក ក្នុងសហគមន៌ សាលារៀនបានបាញ់ថ្នាំសម្លាប់មេរោគរួមទាំងដាក់ថ្នាំអាប៉ែត និងណែនាំដល់បងប្អូនប្រជាពលរដ្ឋត្រូវសម្រាកដោយការចង់ម៉ុង នាំគ្នាសម្អាតអណាម័យ បរិស្ថានជុំវិញផ្ទះសម្តែងឲ្យបានស្អាត ដូចជាការសម្អាតពាងឲ្យបានស្អាត និងសំបកកង់ឡានចាស់ៗមានដក់ទឹក កំប៉ុងដក់ទឹក និងវត្ថុផ្សេងៗត្រូវប្រមូលសំរាមដុតឬក៌កក់ចោល ឲ្យអស់ដើម្បីយើងទទួលបានអាណាម័យល្អមិនមានការឆ្លងជំងឺគ្រុនឈាមនេះតទៅទៀតផងដែរ។

យ៉ាងណាម៉ិញលោកវេជ្ជបណ្ឌិត អ៊ុក សុមេតធា ប្រធានមន្ទីរពេទ្យបង្អែកខេត្ត បានបញ្ជាក់ថា សម្រាប់ខេត្តឧត្តរមានជ័យអ្នកឆ្លងជំងឺគ្រុនឈាម ទាំងមនុស្សចាស់និងកុមារតូចៗ ធ្ងន់ស្រាលគិតមកដល់ពេលនេះនិយាយជារួមសរុបមានចំនួន២៤២នាក់ក្នុងនោះក៏មានអ្នកបានជាសះស្បើយពីជំងឺគ្រុនឈាមនេះជាបន្តបន្ទាប់បានចេញពីមន្ទីរពេទ្យមួយចំនួនខ្លះហើយ៕ ឃិន សារិទ្ធ