សម្ដេចធិបតី ហ៊ុន ម៉ាណែត ជួបសំណេះ​សំណាល​ផ្ទាល់​ជាមួយ​តំណាង​ប្រជា​សហគមន៍​ទេទឹក​ពុះ ដើម្បីឈ្វេងយល់ពីតម្រូវការជាក់ស្តែងរបស់ប្រជាពលរដ្ឋក្នុងសហគមន៍

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រ​កម្ពុជា បានឆ្លៀតពេល ជួប​សំណេះ​សំណាលផ្ទាល់ជាមួយតំណាងប្រជាសហគមន៍ទេទឹកពុះ ដើម្បីឈ្វេង​យល់​ពី​តម្រូវ​ការ​ជាក់​ស្តែង​របស់​ប្រជាពលរដ្ឋក្នុងសហគមន៍។

អមជាមួយវីដេអូ​សំណេះសំណាល​ដែលសម្ដេច​បានបង្ហោះ​លើ​​បណ្ដាញសង្គមនៅព្រឹកថ្ងៃទី១៦ ខែសីហា ឆ្នាំ២០២៦នេះ សម្តេចធិបតី ហ៊ុន ម៉ាណែត ក៏បាន​លើកឡើងផងដែរថា ការ​ចូល​រួម​យោបល់​របស់​សហគមន៍ចំពោះគម្រោងលម្ហែបៃតងទេទឹកពុះ ដែលនឹងត្រូវ​រៀបចំ​នៅ​ពេល​ខាង​មុខ​ គឺ​ដើម្បីធានាថាគម្រោងនោះនឹងផ្តល់អត្ថប្រយោជន៍ដល់សហគមន៍ ចំ​គោលដៅ​ដែល​សហគមន៍​ចង់​បាន។

សម្តេចធិបតី នាយករដ្ឋមន្រ្តី បានថ្លែងទៀតថា ក្រៅពី​ការ​រៀបចំ​កែ​លម្អ​ហេដ្ឋា​រចនា​សម្ព័ន្ធ​រមណីយ​ដ្ឋាន​ទេទឹក​ពុះ​ឱ្យមា​នភាពប្រសើរឡើង ការពង្រឹងសមត្ថភាពសហគមន៍ តាមរយៈ​ការ​បណ្តុះ​បណ្តាល​នូវ​ជំនាញ បំណិនពាក់ព័ន្ធមួយចំនួន និងស្តង់ដារសេវាកម្មបានច្បាស់លាស់ ក៏​នឹង​ត្រូវ​ផ្តល់​ជូន​ផងដែរ ក្នុងគោលដៅពង្រឹង និងពង្រីកសក្តានុពលរបស់សហគមន៍ ដើម្បី​ត្រៀម​ទទួល​អ្នក​ទេសចរនាពេលខាងមុខ។ និយាយ​អោយខ្លី និងសាមញ្ញ គឺ “បង្រៀន​សហគមន៍​អោយ​ចេះ​រក​ស៊ី”​ ក្នុងវិស័យទេសចរណ៍ ដែលនឹងជួយពង្រឹងភាពជាម្ចាស់របស់សហគមន៍ ក៏ដូច​ជា​អនុញ្ញាត​អោយ​ពួក​គាត់​អាច​ទាញ​យកផលប្រយោជន៍ជាអតិបរមាពីការអភិវឌ្ឍន៍នៅហ្នឹងកន្លែង៕