អ្នកជំនាញណែនាំកសិករ «ចិញ្ចឹមមាន់តាមតម្រូវការទីផ្សារ» ដើម្បីកាត់បន្ថយហានិភ័យខាតបង់

អ្នកជំនាញក្នុងវិស័យចិញ្ចឹមសត្វ បានណែនាំឱ្យកសិករចិញ្ចឹមមាន់សាច់ និងមាន់យកស៊ុត ផ្អែកលើ

តម្រូវការទីផ្សារ ជាជាងបង្កើនការចិញ្ចឹមតាមគ្នា ខណៈការផ្គត់ផ្គង់សាច់មាន់ និងស៊ុតមាន់មានការកើនឡើងខ្ពស់ជាងតម្រូវការ អាចប៉ះពាល់ដល់តម្លៃ និងធ្វើឱ្យអ្នកចិញ្ចឹមប្រឈមនឹងការខាតបង់ជាពិសេសកសិករខ្នាតតូច។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានណែនាំឱ្យកសិកររៀបចំផែនការផលិតកម្មដោយផ្អែកលើតម្រូវការទីផ្សារ មុននឹងសម្រេចចិត្តបង្កើនចំនួនសត្វចិញ្ចឹម។ការចិញ្ចឹមដោយធ្វើតាមគ្នា ដែលមិនបានពិនិត្យពីស្ថានភាពទីផ្សារ អាចបណ្តាលឱ្យផ្គត់ផ្គង់កើនឡើងខ្ពស់ជាងតម្រូវការ ហើយអាចជំរុញឱ្យតម្លៃធ្លាក់ចុះដែលធ្វើឱ្យកសិករប្រឈមនឹងការខាត់បង់។

បច្ចុប្បន្ន តម្រូវការមាន់សាច់មានប្រមាណ ២០ម៉ឺនក្បាលក្នុងមួយថ្ងៃ ខណៈតម្រូវការស៊ុតមាន់ និងស៊ុតទា មានប្រមាណ ៤លានគ្រាប់ក្នុងមួយថ្ងៃ។ លោក ស្រ៊ុន ពៅ បានឱ្យដឹងថា ផលិតកម្មមាន់សាច់ និងស៊ុត បច្ចុប្បន្ន ស្ទើរតែគ្រប់គ្រាន់សម្រាប់បំពេញតម្រូវការទីផ្សារហើយ។ ដូច្នេះ ប្រសិនបើកសិករបង្កើនបរិមាណផលិតកម្មនៅពេលនេះ អាចប្រឈមនឹងការផលិតលើសតម្រូវការ។​

លោកពន្យល់ថា ការចិញ្ចឹមតាមទីផ្សារ មានន័យថា កសិករត្រូវសិក្សាពីតម្រូវការ បរិមាណផ្គត់ផ្គង់ តម្លៃ និងទីផ្សារ មុនពេលកំណត់បរិមាណផលិតកម្ម​ ដែលវិធីនេះអាចជួយឱ្យការផលិតមានតុល្យភាពជាមួយទីផ្សារ និងកាត់បន្ថយហានិភ័យនៅពេលផលិតផលចេញលក់នៅលើទីផ្សារ។ ​ទន្ទឹមនឹងនេះ លោកបានអំពាវនាវដល់ប្រជាកសិករបន្តខិតខំផលិតសាច់សត្វឱ្យមានស្តង់ដារអនាម័យត្រឹមត្រូវ និងបង្កើនការយកចិត្តទុកដាក់ការពារពីហានិភ័យនៃជំងឺឆ្លងនានាក្នុងរដូវវស្សានេះ។​

របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងរយៈពេល៥ឆ្នាំចុងក្រោយនេះ តម្រូវការសាច់សត្វសម្រាប់បរិភោគ បានកើនឡើងគួរឱ្យកត់សម្គាល់ គឺ កើនពីចំនួន ៣១០,០០០តោន ក្នុងឆ្នាំ២០២១ ឡើងដល់ ៣៣៨,០០០តោន នៅឆ្នាំ២០២៥។ បច្ចុប្បន្ន ផលិតកម្មសត្វក្នុងស្រុកអាចផ្គត់ផ្គង់សាច់បានប្រមាណ ៣៣១,៥០០តោន ស្មើនឹង ៩៨% នៃតម្រូវការសរុប។ បរិមាណសាច់ដែលខ្វះខាតត្រូវបាននាំចូលពីបរទេសមកបំពេញតម្រូវការបន្ថែម៕អត្ថបទ៖ ធូ វិរៈ