នាវាល្បាតសមុទ្ររបស់អង់គ្លេសមួយគ្រឿងនឹងចូលសំចតនៅមូលដ្ឋានសមុទ្ររាមកម្ពុជារយៈពេល ៨ថ្ងៃក្នុងខែសីហានេះ

ភ្នំពេញ៖ នាវាល្បាតរបស់អង់គ្លេសដែលមានឈ្មោះថា HMS Tamar នឹងចូលសំចតនៅមូលដ្ឋាន​សមុទ្ររាមរបស់​កម្ពុ​ជា រយៈពេល៨ថ្ងៃ ពោលគឺចាប់ពីថ្ងៃទី២០ ដល់ថ្ងៃទី២៧ ខែសីហា ឆ្នាំ២០២៦នេះ ដោយនាវា​នេះ​គឺមានផ្ទុក នាវិករបស់អង់គ្លេសចាប់ពី៦០នាក់ទៅ​១០០នាក់។

សូមបញ្ជាក់ថា នាវាHMS Tamar បច្ចុប្បន្នជាប្រភេទ នាវាតល្បាតសមុទ្រ នៃកងទ័ពជើងទឹកភូមិន្ទអង់គ្លេស ដោយមានប្រវែងជាង៩០ម៉ែត្រ ទទឹងជាង១៣ម៉ែត្រ ជម្រៅទឹកជាង៤ម៉ែត្រ មានទម្ងន់ទំហំផ្លាស់ ទីប្រមាណពីរពាន់តោន ដោយមានល្បឿនប្រមាណ៤៦គីឡូម៉ែត្រក្នុងមួយម៉ោង ក្រុមនាវិកប្រមាណ៥៨ ទៅ៦០នាក់ និងអាចផ្ទុកទាហានបន្ថែមបាន៥០នាក់ថែមទៀតផងដែរ។

បើតាមឧត្តមនាវីឯក សំ សុខា មេបញ្ជាការរងកងទ័ពជើងទឹក បានថ្លែងប្រាប់ទូរទស្សន៍BTVនាថ្ងៃទី១៨ ខែ សីហា ឆ្នាំ២០២៦នេះ​បានបញ្ជាក់ថា ក្នុងគោលបំណងនៃការចូលសំចតរបស់នាវាអង់គ្លេសលើផែសមុទ្ររាមរបស់ កម្ពុជានេះគឺដើម្បីពង្រឹងកិច្ចសហប្រតិបត្តិការ រឹតចំណងមិត្តភាព សាមគ្គីភាពនៃកងនៃប្រទេសទាំងពីរកម្ពុជា និង អង់គ្លេស។

ឧត្តមនាវីឯក សំ សុខា បានបញ្ជាក់ទៀតថា ក្នុងអំឡុងពេលសំចតនេះកងទ័ពជើងទឹករបស់កម្ពុជា និងអង់​គ្លេសនឹងមានកម្មវិធីហ្វឹកហ្វឺនរួមគ្នា ស្តីពីការសង្រ្គោះគ្រោះមហន្តរាយបឋមនៅលើនាវា ​និងការលេងកីឡារួមគ្នាដើម្បី បង្កើនភាពស្និតស្នាលរបស់កងទ័ពនៃប្រទេសទាំងពីរផងដែរ។

សូមបញ្ជាក់ថា កាលពីឆ្នាំ២០២៥កន្លងទៅនាវាចម្បាំងរបស់អង់គ្លេស HMS SPEY ក៏បានមកទស្សនកិច្ចនៅកំពង់ផែក្រុងព្រះសីហនុរបស់ប្រទេសកម្ពុជាផងដែរ ដោយដំណើរទស្សនកិច្ចរបស់នាវានេះ​ក្នុង​ពង្រឹងទំនាក់ទំនងការពារជាតិរវាងអង់គ្លេស និងកម្ពុជាឲ្យកាន់តែល្អប្រសើរបន្ថែមទៀត៕អត្ថបទបាន ចក់