រយៈពេល១ឆ្នាំ៖ សមត្ថកិច្ចបញ្ជូនសំណុំរឿង Online Scams ជិត ៤០០ករណីទៅតុលាការ និងជនសង្ស័យជាង៤ពាន់នាក់

ភ្នំពេញ៖ សមត្ថកិច្ចកម្ពុជាបានកសាង និងបញ្ជូនសំណុំរឿងពាក់ព័ន្ធករណីឆបោកតាមប្រព័ន្ធបច្ចេកវិទ្យា (Online Scams) ចំនួនជិត ៤០០ករណីទៅតុលាការ និងជនសង្ស័យជាង ៤ពាន់នាក់ រួមមានមេខ្លោងនិងគូកនចំនួន ២៧ សញ្ជាតិ ត្រូវបានចោទប្រកាន់តាមនីតិវិធីច្បាប់។ នេះ​បើតាមការបញ្ជាក់របស់លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)។

យោងតាមលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ដែលទូរទស្សន៍ BTV ទទួលបាននៅថ្ងៃទី១៨ ខែសីហា ឆ្នាំ២០២៦ បានឲ្យដឹងថា ចាប់ពីខែកក្កដា ឆ្នាំ២០២៥ រហូតដល់ថ្ងៃទី៣១ ខែកក្កដា ឆ្នាំ២០២៦ ដោយអនុវត្តតាមបទបញ្ជារបស់រាជរដ្ឋាភិបាល ការបោសសម្អាតការឆបោកតាមប្រព័ន្ធបច្ចេកវិទ្យា បានស្រាវជ្រាវ ស៊ើបអង្កេត រកឃើញនិងប្រតិបត្តិការលើទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ចំនួន ៧៥១ ទីតាំង, និងបានបិទសៀលទីតាំងចំនួន ៦០៥ ទីតាំងមិនឱ្យមានសកម្មភាពទៀតឡើយ។

របាយការណ៍បានបន្តថា ក្នុងប្រតិបត្តិការបោសសម្អាត សមត្ថកិច្ចបានស្រាវជ្រាវ និងស៊ើបអង្កេតតាមបណ្ដាទីតាំងកាស៊ីណូដែលមានអាជ្ញាបណ្ណសរុបចំនួន ១៩៥ និងបានឈានទៅដកហូតអាជ្ញាបណ្ណចំនួន ២០ កាស៊ីណូ និង បានព្យួរអាជ្ញាបណ្ណចំនួន ២៩ កាស៊ីណូ ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ខណៈកាស៊ីណូចំនួន ២៣ បានផុតសុពលភាពនិងផ្អាកដំណើរការអាជីវកម្ម។

គ.ប.ឆ.ប.បានបញ្ជាក់ថា គិតចាប់ពីខែកក្កដា ឆ្នាំ២០២៥ មកដល់ខែកក្កដា ឆ្នាំ២០២៦ អាជ្ញាធរកម្ពុជាបានសង្គ្រោះ និងអនុវត្តនីតិវិធីដើម្បីធ្វើមាតុភូមិនិវត្តន៍ជនបរទេស ចំនួន ២១,៦៦៦ នាក់ មកពី ៣៨ សញ្ជាតិ ភាគច្រើនជាជនជាតិចិន វៀតណាម ប៉ាគីស្ថាន ឥណ្ឌូនេស៊ី បង់ក្លាដេស និងឥណ្ឌា។ ក្នុងរយៈពេលដូចគ្នា សមត្ថកិច្ចបានកសាង និងបញ្ជូនសំណុំរឿង ចំនួន ៣៨៨ ករណីទៅតុលាការ និងជនសង្ស័យ ៤,១៤៧ នាក់ រួមមានមេខ្លោងនិងគូកន ចំនួន ២៧ សញ្ជាតិ ត្រូវបានចោទប្រកាន់តាមនីតិវិធីច្បាប់៕ អត្ថបទ៖ សុភាព