ក្រសួងការងារបើកសិក្ខាសាលាត្រីភាគី ខណៈកិច្ចចរចាកំណត់ប្រាក់ឈ្នួលអប្បបរមាឆ្នាំ២០២៧ នឹងចាប់ផ្តើមនាពេលខាងមុខ

ភ្នំពេញ៖ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា (ក.ជ.ប.អ.) បានអញ្ជើញជាអធិបតីក្នុងពិធីបើកសិក្ខាសាលាត្រីភាគីស្តីពី “បច្ចុប្បន្នភាព និងទស្សនវិស័យសេដ្ឋកិច្ចកម្ពុជា ឆ្នាំ២០២៦ និងឆ្នាំ២០២៧” ដើម្បីផ្លាស់ប្តូរព័ត៌មាន និងធ្វើបច្ចុប្បន្នភាពពីស្ថានភាពសង្គម និងសេដ្ឋកិច្ចកម្ពុជា និងសកល ដែលជាមូលដ្ឋានដ៏សំខាន់សម្រាប់សមាជិក សមាជិកានៃក្រុមប្រឹក្សាជាតិប្រាក់ឈ្នួលអប្បបរមា មុនពេលកិច្ចប្រជុំចរចាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផ​លិតផលធ្វើដំណើរនិងកាបូប ឆ្នាំ២០២៧ខាងមុខ។

ប្រភពក្រសួងការងារនិងបណ្តុះបណ្តាលវិជ្ជាជីវៈ ក្រោយចប់កិច្ចប្រជុំកាលរសៀលថ្ងៃទី២១ ខែសីហា ឆ្នាំ២០២៦នេះ បានសសេរឱ្យដឹងថា ក្នុងអង្គប្រជុំនេះ ឯកឧត្តមរដ្ឋមន្ត្រី បានគូសបញ្ជាក់ថា វិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប នៅតែជាវិស័យយុទ្ធសាស្ត្ររបស់កម្ពុជា ដែលតំណាងឱ្យ ៤៦% នៃការនាំចេញសរុបរបស់កម្ពុជា ហើយការកំណត់ប្រាក់ឈ្នួលអប្បបរមាសម្រាប់វិស័យនេះ ក៏មានផលជះដល់វិស័យមួយចំនួនទៀតផងដែរ។

ដូច្នេះ ដើម្បីជាធាតុចូលមុនដំណើរការចរចាប្រាក់ឈ្នួលអប្បបរមា ជាពិសេសក្នុងបរិបទសេដ្ឋកិច្ចសកល ដែលកំពុងមានភាពមិនប្រាកដប្រជា ឯកឧត្តមរដ្ឋមន្ត្រី បានមានប្រសាសន៍ថា ការរៀបចំសិក្ខាសាលានាថ្ងៃនេះ គឺដើម្បីផ្តល់ស្ថិតិ និងទិន្នន័យផ្លូវការ ដល់គ្រប់ភាគី ដើម្បីជាធាតុចូលឱ្យបានគ្រប់ជ្រុងជ្រោយ សម្រាប់ការពិនិត្យពិចារណាលើលក្ខណវិនិច្ឆ័យទាំង៧​​ ក្នុងការកំណត់កម្រិតប្រាក់ឈ្នួលអប្បបរមា សំដៅលើកកម្ពស់ជីវភាពរស់នៅសមរម្យរបស់កម្មករនិយោជិតនិងគ្រួសារ បង្កើនផលិតភាព ឱកាសការងារ និងបរិយាកាសវិនិយោគនិងធុរកិច្ចឱ្យកាន់តែប្រសើរឡើង។

ក្រៅពីនេះ ឯកឧត្តម​ក៏លើកទឹកចិត្តឱ្យមានកិច្ចពិភាក្សាដោយបើកចំហ ហើយក្រសួងនឹងបន្តខិតខំបន្តទៀត ក្នុងការពង្រឹងការអនុវត្តច្បាប់ និងបទប្បញ្ញត្តិពាក់ព័ន្ធ ការពង្រឹងយន្តការនិងសមត្ថភាពស្ថាប័ន ព្រមទាំងប​ង្កើនកិច្ចសហការជា​មួយដៃគូពាក់ព័ន្ធ ដើម្បីធ្វើយ៉ាងណាឱ្យកម្ពុជាអាចធានាបាននូវភាពប្រកួតប្រជែង រក្សាបាននូវភាពទាក់ទាញវិនិយោគ និងឱកាសការងារជូនបងប្អូនកម្មករនិយោជិត។

នាឱកាសនោះ លោកឧកញ៉ា ស គីណាល់ សមាជិក ក.ជ.ប.អ. តំណាងភាគីនិយោជក និងលោក គឹម ចាន់សំណាង អនុប្រធាន ក.ជ.ប.អ. តំណាងភាគីកម្មករនិយោជិត បានគាំទ្រ និងអរគុណចំពោះរាជរដ្ឋាភិបាល ក៏ដូចជាក្រសួងការងារដែលបានរៀបចំវេ​ទិកាដ៏សំខាន់នេះឡើង ដើម្បីមានមូលដ្ឋាន និងត្រៀមខ្លួនចរចាប្រាក់ឈ្នួលអប្បបរមានាពេលខាងមុខ ក៏ដូចជាផ្តល់ឱកាសឱ្យមានការពិភាក្សាកំណត់ប្រាក់ឈ្នួលអប្បបរមាប្រចាំឆ្នាំ ខណៈប្រទេសមួយចំនួនមិនមានយន្តការចរចាកំណត់ប្រាក់ឈ្នួលអប្បបរមាជាក់លាក់ដូចកម្ពុជា៕