«គណបក្សប្រជាជនកម្ពុជា មិនបានបិទទ្វារសម្រាប់អ្នកដែលមានចេតនា និងឆន្ទៈចង់ធ្វើការពិតប្រាកដជាមួយរាជរដ្ឋាភិបាល ឬគណបក្សប្រជាជនកម្ពុជាដើម្បីបម្រើបុព្វហេតុជាតិឡើយ»

ភ្នំពេញ៖ អ្នកនាំពាក្យរាជរដ្ឋាភិបាល ឯកឧត្តម ប៉ែន បូណា បានបញ្ជាក់តាមរយៈសន្និសីទសារព័ត៌មាននៅថ្ងៃទី២៣ ខែសីហា ឆ្នាំ២០២៦នេះថា រាជរដ្ឋាភិបាលគណបក្សប្រជាជនកម្ពុជាប្រកាន់ខ្ជាប់នូវវប្បធម៌សន្ទនា៖ «គណបក្សប្រជាជនកម្ពុជាមិនបានបិទទ្វារសម្រាប់អ្នកដែលមានចេតនា និងឆន្ទៈចង់ធ្វើការពិតប្រាកដជាមួយរាជរដ្ឋាភិបាល ឬគណបក្សប្រជាជនកម្ពុជា ក្នុងនាមជាដៃគូនិងក្នុងនាមជាខ្មែរតែមួយដើម្បីបម្រើបុព្វហេតុជាតិដោយគ្មានការរើសអើងឡើយ»។

ឯកឧត្តមបានថ្លែង​បញ្ជាក់ថា នេះជាការគូសបញ្ជាក់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី១៩ ខែសីហា ឆ្នាំ២០២៦ នាឱកាសជួបសំណេះសំណាលជាមួយអាចារ្យ និងអាចារិនី ទូទាំងប្រទេសលើកទី១១។

ឯកឧត្តម ប៉ែន បូណា បានរំឭកឡើងថា សម្តេចប្រមុខរាជរដ្ឋាភិបាលបន្តថា ការចូលរួមគឺមិនចាំបាច់តែត្រូវស្របមតិគ្នារហូតនោះទេ ប៉ុន្តែ ត្រូវផ្អែកលើការវិភាគដែលមានមូលដ្ឋាន ឬទឡ្ហីករណ៍ច្បាស់លាស់ ដើម្បីជាកញ្ចក់ឆ្លុះបញ្ចាំងនូវចំណុចខ្វះខាត និងពង្រឹងការងារជាមួយគ្នា។ សម្ដេចធិបតីបានសង្កត់ធ្ងន់ថា រាជរដ្ឋាភិបាលនិងគណបក្សប្រជាជនកម្ពុជាតែងតែប្រកាន់ខ្ជាប់នូវវប្បធម៌សន្ទនានិងការបង្រួបបង្រួមជាតិ ផ្អែកលើភាពស្មោះត្រង់ គុណធម៌នយោបាយ និងការគោរពគ្នាទៅវិញទៅមក។

សូមបញ្ជាក់ថា បើតាមប្រសាសន៍ដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា «បើចង់មកចាប់ដៃ ទ្វារខ្ញុំបើក ដៃខ្ញុំលា» ដែលសារនេះបានបង្ហាញពីស្មារតីផ្សះផ្សា និងបង្រួបបង្រួមជាតិខ្មែរតែមួយ។ បានឆ្លុះបញ្ចាំងយ៉ាងច្បាស់ពីវប្បធម៌សន្ទនា និងការបើកចំហចិត្តទូលំទូលាយរបស់គណបក្សប្រជាជនកម្ពុជា និងរាជរដ្ឋាភិបាល។ សារនេះត្រូវបានថ្លែងឡើងក្នុងន័យប្រមូលផ្តុំរាល់កម្លាំងគំនិត បញ្ញាវន្ត និងអ្នកនយោបាយគ្រប់និន្នាការ ដើម្បីរួមគ្នាបម្រើជាតិ មាតុភូមិ។

សម្ដេច​ធិបតីបានបញ្ជាក់ថារាជរដ្ឋាភិបាលមិនតម្រូវឱ្យរាល់ការចូលរួមត្រូវតែស្របគំនិត ឬបញ្ជោរលើកជើងរដ្ឋាភិបាលនោះទេ។ ផ្ទុយទៅវិញ ការរិះគន់ដើម្បីស្ថាបនា និងការបង្ហាញពីចំណុចខ្វះខាតដោយមានមូលដ្ឋានច្បាស់លាស់ គឺជាអ្វីដែលរដ្ឋាភិបាលស្វាគមន៍៕