កងយោធពលខេមរភូមិន្ទ ប្តេជ្ញាការពារឱ្យខាងតែបាននូវសន្តិភាព និង​ស្ថិរភាព​ទោះ​ក្នុងតម្លៃ​ណាក៏ដោយ

អគ្គមេបញ្ជាការ នៃកងយោធពលខេមរភូមិន្ទ បានបញ្ជាក់អំពីការ​ប្តេជ្ញាបន្ត​ការពារ​ឲ្យខាង​តែ​បាន​នូវសន្តិភាព ស្ថិរភាពជាតិ សណ្តាប់ធ្នាប់សាធារណៈ ទោះជាស្ថិតក្នុងតម្លៃណាក៏ដោយ បង្ក្រាប និងកម្ទេចរាល់កម្លាំងជ្រុលនិយម ឬកម្លាំងអមិត្ត ដែលមានឧបាយកល​ញុះញង់​ក្នុងចេតនា​បំផ្លាញ​ជាតិ បំផ្លាញសន្តិភាព បង្កវិទ្ធង្សនាផ្សេងៗ ក្នុងគោលបំណងផ្តួលរំលំរាជរដ្ឋាភិបាលស្របច្បាប់ ទោះជាក្នុងរូបភាពណាក៏ដោយ។

ក្នុងសិក្ខាសាលាដកពិសោធន៍ការងារសម្ព័ន្ធមេត្រីភាព រវាងអង្គភាពកងយោធពលខេមរភូមិន្ទជាមួយស្ថាប័នអង្គភាពស៊ីវិល ឆ្នាំ២០២៥ ទិសយោភូមិភាគទី៤ និងទី៥ “សមរភូមិក្រោយ គាំទ្រសមរភូមិមុខ រួមគ្នាពង្រឹងខឿនការពារជាតិ” កាលពីថ្ងៃទី២៤ ខែសីហា ឆ្នាំ២០២៦ នៅទីស្តីការក្រសួងការពារជាតិ នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានបញ្ជាក់ថា កងកម្លាំងប្រដាប់អាវុធត្រូវពង្រឹងខឿនការពារជាតិ ដែលរាជរដ្ឋាភិបាលកំពុងប្រគល់ភារកិច្ចនៅពេលបច្ចុប្បន្ន ហើយដែលកំពុងតែធ្វើរាល់ថ្ងៃនេះ។ ហើយម៉ោងនេះ ត្រូវតែរួមគ្នាសាមគ្គីភាពជាធ្លុងមួយ ទាំងកងកម្លាំងប្រដាប់អាវុធ ទាំងមហាជន និងប្រជាជនទាំងអស់ ដើម្បីចូលរួមចំណែកក្នុងកិច្ចការងារការពារជាតិមាតុភូមិរបស់ខ្លួននិងប្រជាជន។

នាយឧត្តមសេនីយ៍ វង្ស ពិសេន បានបញ្ជាក់បន្ថែមថា ពេលនេះជាកិច្ចការងារចាំបាច់បំផុតជាងម៉ោងណាទាំងអស់នូវការពង្រឹងខឿនសាមគ្គីភាពជាធ្លុងមួយដើម្បីជាតិ និងមាតុភូមិរបស់ខ្លួន។ ហើយរាជរដ្ឋាភិបាលមិនមែននៅស្ងៀមទេ គឺស្ងាត់តែមិនស្ងៀម ហើយត្រូវតែចូលរួមអនុវត្តទៅតាមគោលការណ៍របស់រាជរដ្ឋាភិបាលដែលកំពុងតែធ្វើនាពេលបច្ចុប្បន្ន និងត្រូវបន្តអនុវត្តឲ្យបានម៉ឹងម៉ាត់នូវសេចក្តីសម្រេចរបស់រាជរដ្ឋាភិបាល ស្តីពីការចងសម្ព័ន្ធមេត្រីភាពរវាងអង្គភាពកងទ័ព ជាមួយនឹងអង្គភាពស្ថាប័នស៊ីវិលក្នុងកិច្ចការងារបង្កើតភាពស្និទ្ធស្នាលរវាងសមរភូមិមុខ និងសមរភូមិក្រោយ ដែលជាមូលដ្ឋានគ្រឹះនៃខឿនការពារជាតិរបស់ប្រជាជន និងដើម្បីកសាង និងពង្រឹងអង្គភាពឲ្យកាន់តែរឹងមាំ រៀបរយ ទំនើប និងមានប្រសិទ្ធភាព៕ អត្ថបទ៖ វង្ស សុភាព