ឯកឧត្តម សួស យ៉ារ៉ា៖សន្និសីទ ISC បានការពារកេរ្តិ៍ឈ្មោះកម្ពុជាដែលថៃយកលេស Scams មកឈ្លាន

មន្រ្ដីជាន់ខ្ពស់​រដ្ឋសភា​កម្ពុជាបានថ្លែង​បញ្ជាក់ថា តាមរយៈសន្និសីទប្រធានសភា នៃអន្តរសភា លើកទី២ (ISC-2) ដែលកម្ពុជា​ធ្វើជាម្ចាស់ផ្ទះរៀបចំនៅរាជធានីភ្នំពេញ​នៅថ្ងៃទី២៦-២៨ ខែសីហា ឆ្នាំ២០២៦នេះ, ក្រៅពីសម្ដេច​បានសេចក្តីប្រកាសទីក្រុងភ្នំពេញ, ​រឿងធំជាងគេរបស់កម្ពុជា​ដែលសម្រេច​បានថែមទៀតនោះ គឺការ​ធ្វើសង្គ្រាមការពារកេរ្តិ៍ឈ្មោះ តាមរយៈសង្គ្រាមការទូត ព្រោះសង្គ្រាម​មិនសំខាន់តែលើអាវុធនោះទេ ប៉ុន្ដែ​សង្គ្រាមការពារកេរ្តិ៍ឈ្មោះគឺជារឿងធំណាស់ និងសំខាន់ណាស់​។

ឯកឧត្តម សួស យ៉ារ៉ា ប្រធានគណៈកម្មការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា (គណៈកម្មការទី៥) បានថ្លែងក្នុងសន្និសីទសារព័ត៌មានស្ដីពីលទ្ធផល​នៃសន្និសីទប្រធានសភា នៃអន្តរសភា លើកទី២ (ISC-2) នៅថ្ងៃទី២៨ ខែសីហា ឆ្នាំ២០២៦នេះថា ក្រោយបញ្ចប់សន្និសីទសន្និសីទប្រធានសភានៃអន្តរសភាលើកទី២ (ISC-2) នៅរាជធានីភ្នំពេញ ព្រះរាជាណាចក្រកម្ពុជា ចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៦, អ្វីដែលអង្គសន្និសីទសម្រេច​បាន ក្រៅតែពី ​ចេញសេចក្តីប្រកាសទីក្រុងភ្នំពេញស្ដីពីសាមគ្គីភាពដើម្បីសន្តិភាព និងវិបុលភាពរួម៖ ពង្រឹងច្បាប់អន្តរជាតិ និងដោះស្រាយជម្លោះដោយសន្តិវិធី, រឿងធំជាងគេរបស់កម្ពុជា​ដែលសម្រេច​បាននោះ គឺសង្គ្រាមការពារកេរ្តិ៍ឈ្មោះ ព្រោះសង្គ្រាម​មិនសំខាន់តែលើអាវុធនោះទេ ប៉ុន្ដែ​សង្គ្រាមការពារកេរ្តិ៍ឈ្មោះគឺធំណាស់។

ឯកឧត្តមបញ្ជាក់ថា៖«គេមិនអាច​មកបំផ្លាញកេរ្តិ៍ឈ្មោះរបស់យើងបានទេនៅពេលដែលយើង​មានការ​ប្រជុំកម្រិត​ប្រធានសភាសកល,… អ្នកឯកមិនមែនយកបញ្ហា​បទល្មើសអនឡាញ (Online Scams ) ដើម្បីឈ្លានពាន​ទេ ដូច្នេះ​គេបានដឹងហើយ ការ​ឈ្លានពាននេះពិតប្រាកដ មិនមែនយក Scams មកដាក់ទេ។ បញ្ហា Scams យើងបាន​ប្រយុទ្ធប្រឆាំង យើងបានជោគជ័យ។ យើងបានប្រកាស Scams បានអស់ហើយពីកម្ពុជា​ហើយភ្នាក់ងារមួយចំនួនកំពុងធ្វើការងារតទៅទៀត​»។

ឯកឧត្តម សួស យ៉ារ៉ា បន្តថា សង្គ្រាមការងារកេរ្តិ៍ឈ្មោះ គឺការ​ធ្វើការទូតទាំងសភា ទាំងរដ្ឋ ដែលហៅថា ការពារធម្មានុរូបនៃកម្ពុជា។ ក្រៅពីនេះ ជនរួមជាតិទាំងអស់​ក៏​បានមើលឃើញថា យើងធ្វើការងារ​ឱ្យមានសាមគ្គីភាពនៃអន្តរស្ថាប័នទាំងរដ្ឋាភិបាល ទាំងសភា យើងហៅថា «ចលនារួមគ្នា ដើម្បីប្រឆាំងច្បាប់​ព្រៃ អ្នកខ្លាំង​ឈ្នះ ហើយអ្នកតូចចាញ់»។ អីចឹង​ការ​ប្រើប្រាស់​ច្បាប់ព្រៃមិនជោគជ័យទេ បើសិនជាជួបជុំគ្នាហើយ។ អីចឹង​គណនេយ្យភាពនៃស្ថាប័ន និងដំណោះស្រាយផ្លូវច្បាប់។

ឯកឧត្តមបន្ថែមថា ក្រៅពីនេះ កម្ពុជា​ក៏ទទួលបានូវការការពារមួយ ដែលបច្ចុប្បន្ននេះ កម្ពុជា​ពឹង​ផ្អែកលើតែក្រុមអ្នកសង្កេតការណ៍អាស៊ាន (​AOT) ទេ ដែលបានទៅកន្លែង​តំបន់ជម្លោះរវាងកម្ពុជា និងថៃ, ប៉ុន្ដែ​យើងនឹងមានការ​អំពាវនាវ​សាមគ្គីគ្នា​រវាង អន្តរបញ្ញត្តិទាំងអស់ ឬស្ថាប័នសភាទាំងអស់ ដើម្បីបង្កើត​នូវចលនាមួយឱ្យមានការ​សង្កេតការណ៍បទឈប់បាញ់របស់កម្រិត​សភាសកល។

សូមជម្រាបថា តាមរយៈសុន្ទកថា បើកសន្និសីទ ISC-2 នៅថ្ងៃទី២៧ ខែសីហានេះ សម្ដេច​តេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសន្និសីទ បានថ្លែងថា ក្របខ័ណ្ឌនៃសង្គ្រាមបច្ចុប្បន្ន​សណ្ឋានចំនួនបីគឺ សង្គ្រាមបំបាក់កម្លាំង,​ សង្គ្រាមបំបាក់សេដ្ឋកិច្ច និងសង្គ្រាមបំបាក់កេរ្តិ៍ឈ្មោះ។ ក្នុងនោះ សង្គ្រាមបំបាក់កេរ្តិ៍ឈ្មោះ៖ មានទម្រង់ជាសង្គ្រាមព័ត៌មាន និងសង្គ្រាមចិត្តសាស្ត្រដែលប្រើប្រាស់យុទ្ធនាការលាបពណ៌ជាលក្ខណៈប្រព័ន្ធសង្គ្រាមនេះកេងចំណេញ ពីភាពផុយស្រួយផ្ទៃក្នុងប្រទេសដូចជា ឧក្រិដ្ឋកម្មឆបោកអនឡាញ ឬការប្រើប្រាស់ស្ដង់ដារពីរ លើបញ្ហាសិទ្ធិមនុស្សមកធ្វើជាលេសដ៏សមស្របដើម្បីដាក់សម្ពាធពីខាងកវាយប្រហារលើស្ថាប័ននយោបាយក្នុងស្រុក និងធ្វើឱ្យប្រជាជាតិមួយបាត់បង់ធម្មានុរូបនៅលើឆាកអន្តរជាតិ៕