ចប់បាក់ឌុបមិនដឹងរៀនអ្វីមែនទេ? វិទ្យាស្ថានពហុបច្ចេកទេសមិត្តភាពកម្ពុជា-ចិន ខេត្តព្រះសីហនុ បណ្តុះជំនាញផ្សារភ្ជាប់ទ្រឹស្តី និងការអនុវត្ត បង្កើនឱកាសការងារឆាប់រហ័ស

ព្រះសីហនុ៖ សម្រាប់យុវជនដែលកំពុងស្វែងរកជំនាញច្បាស់លាស់ និង​ឱកាស​ការ​ងារ​នា​ពេល​អនាគត ​ការជ្រើសរើសសិក្សាការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅ​វិទ្យា​ស្ថាន​ពហុបច្ចេកទេសមិត្តភាពកម្ពុជា-ចិន ខេត្តព្រះសីហនុ គឺជាជម្រើស​ល្អ​បំផុត​ដែល​ផ្តល់​ទាំង​ចំណេះ​ដឹង​ ជំនាញអនុវត្តជាក់ស្តែង និងឱកាសភ្ជាប់ទៅកាន់ទីផ្សារការងារបានឆាប់រហ័ស។

លោក ប៊ូ សំអាត នាយកវិទ្យាស្ថានពហុបច្ចេកទេសមិត្តភាពកម្ពុជា-ចិន ខេត្តព្រះសីហនុ បាន​លើក​ឡើង​ថា ចំណុចសំខាន់ដែលធ្វើឱ្យការសិក្សា TVET នៅវិទ្យាស្ថានមានភាពទាក់ទាញ គឺ​ដោយ​សារ​វិទ្យាស្ថាន​ស្ថិត​នៅ​ក្នុង​តំបន់​ដែល​មាន​សក្តានុពល​ខ្ពស់​សម្រាប់​ការ​អភិវឌ្ឍ​វិស័យ​សេដ្ឋ​កិច្ច​ និងឧស្សាហកម្ម ដែលផ្តល់ឱកាសឱ្យសិស្ស-និស្សិត​អាច​ភ្ជាប់​ការ​សិក្សា​របស់​ខ្លួន​ទៅ​នឹង​តម្រូវ​ការ​ជាក់​ស្តែង​របស់ទីផ្សារការងារ។

លោកបានបញ្ជាក់ថា ការបណ្តុះបណ្តាលរបស់វិទ្យាស្ថាន មិនផ្តោតតែទៅ​លើ​ការ​សិក្សា​ទ្រឹស្តី​ក្នុង​ថ្នាក់​ប៉ុណ្ណោះ​ទេ ប៉ុន្តែផ្តោតសំខាន់លើការអនុវត្តជាក់ស្តែងនៅក្នុងរោងជាង និងបន្ទប់ពិសោធន៍ ព្រម​ទាំង​ការចុះកម្មសិក្សានៅតាមរោងចក្រ និងសហគ្រាសនានា ដើម្បីធានាថា សិស្ស-និស្សិត​រៀន​ចប់​ហើយ មានទាំងចំណេះដឹង និងជំនាញដែល​អាច​យក​ទៅ​ប្រើ​ប្រាស់​ក្នុង​ការ​ងារ​ពិតប្រាកដ​។

លោកនាយកបញ្ជាក់ថា៖ «គោលដៅរបស់យើង គឺចង់ឱ្យយុវជនរៀនឱ្យចប់ រៀនឱ្យចេះ និង​មាន​ជំនាញ​ពិត​ប្រាកដ ដើម្បីអាចចូលទៅកាន់ទីផ្សារការងារ។ ជាពិសេស ដោយសារ​វិទ្យាស្ថាន​ស្ថិត​នៅ​ក្បែរ​តំបន់ដែលមានរោងចក្រ ក្រុមហ៊ុន និងសហគ្រាសជាច្រើន សិស្ស-និស្សិត​ក៏​មាន​ឱកាស​កាន់​តែ​ច្រើន​ក្នុងការចុះកម្មសិក្សា ស្វែងរកបទពិសោធន៍ និងភ្ជាប់ខ្លួនទៅកាន់ឱកាសការងារ»។

លោកនាយកបានបន្ថែមថា ការជ្រើសរើសរៀន TVET គឺជាការវិនិយោគលើអនាគតខ្លួនឯង ព្រោះ​ជំនាញ​បច្ចេកទេសមួយអាចជួយឱ្យយុវជនមានសមត្ថភាពប្រកួតប្រជែងក្នុងទីផ្សារការងារ ទាំង​ក្នុង​ប្រទេស និង អន្តរជាតិ មានឱកាសរកចំណូលបានច្រើន និងអាចអភិវឌ្ឍ​ខ្លួន​បន្ត​ទៅ​មុខ​ថែម​ទៀត​៕