សហរដ្ឋអាមេរិកនៅតែជាទីផ្សារនាំចេញធំជាងគេរបស់កម្ពុជា

ភ្នំពេញ៖ មន្រ្តីជាន់ខ្ពស់ក្រសួងពាណិជ្ជកម្ម បានលើកឡើងថា កម្ពុជាបាននាំចេញទំនិញទៅកាន់ទីផ្សារសហរដ្ឋអាមេរិក​ក្នុងទំហំទឹកប្រាក់ ៩ពាន់លានដុល្លារអាមេរិក ក្នុងរយៈពេល ៧ខែឆ្នាំ២០២៦ កើនឡើង​ជាង ៣០ ភាគរយ បើធៀបនឹងរយៈពេលដូចគ្នាកាលពីឆ្នាំមុន​។​ សហរដ្ឋអាមេរិកនៅតែជាទីផ្សារនាំចេញធំជាងគេរបស់កម្ពុជា ដែលមានចំណែកទីផ្សារ​ ៤៣% នៃការនាំចេញសរុប។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានឱ្យដឹងថា ក្នុងរយៈពេល ៧ខែ​ឆ្នាំ​២០២៦ កម្ពុជាបាននាំចេញទំនិញទៅកាន់ទីផ្សារសហរដ្ឋអាមេរិកមានទឹកប្រាក់ ៩,០៤៥ លានដុល្លារអាមេរិក ហក់ឡើង ៣០,៦០ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ឯកឧត្តម បន្តថា សហរដ្ឋអាមេរិកនៅតែជាដៃគូពាណិជ្ជកម្មធំជាងគេរបស់កម្ពុជាដែលមានចំណែកទីផ្សារ ៤២,៨១ ភាគរយនៃការនាំចេញសរុប។ ក្នុងនោះ ផលិតផលកាត់ដេរ ស្បែកជើង និងផលិតផលធ្វើដំណើរ (GFT) របស់កម្ពុជានៅតែជាទីផ្សារសំខាន់សម្រាប់សហរដ្ឋអាមេរិក បើទោះជា កម្ពុជាមានពន្ធបដិកាជាមួយសហរដ្ឋអាមេរិកក៏ដោយ។ កម្ពុជានៅតែ​មានទំនុកចិត្តថា វិស័យ GFT នឹងបន្តរីកចម្រើនតទៅទៀត ដោយសារ ការបោះទុនវិនិយោគ និងតម្រូវទីផ្សារ ពីវិស័យនេះនៅតែមានសញ្ញាវិជ្ជមានគួរឱ្យកត់សម្គាល់។

សូមបញ្ជាក់ថា ក្រៅពីសហរដ្ឋអាមេរិក ទីផ្សារបណ្តាប្រទេសនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ហៅថា RCEP ដែលមានសមាជិក ១៥ប្រទេស រួមមាន ប្រទេសអាស៊ាន ១០ និងប្រទេសដៃគូ ៥ គឺ ចិន,ជប៉ុន, កូរ៉េខាងត្បូង,អូស្ត្រាលី, និងនូវែលសេឡង់ គឺជាដៃគូពាណិជ្ជកម្មរបស់កម្ពុជាឈរលំដាប់ទី២ ដែលមានចំណែកទីផ្សារ ៣០,៣៤ ភាគរយនៃការនាំចេញសរុប ដែលមានចំនួន ២១,១៣ ពាន់លានដុល្លារអាមេរិក។​អត្ថបទ៖ ធូ វិរៈ