មន្ទីរទេសចរណ៍ខេត្តបាត់ដំបងជំរុញម្ចាស់ និងអ្នកគ្រប់គ្រងរមណីយដ្ឋានទេសចរណ៍នៅជាប់ប្រភពទឹកពង្រឹងសុវត្ថិភាពជូនភ្ញៀវ

បាត់ដំបង៖ នៅថ្ងៃទី៣១ ខែសីហា ឆ្នាំ២០២៦ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបងបានដឹកនាំមន្រ្តីចុះពិនិត្យស្ថានភាពតាមគោលដៅ និងរមណីយដ្ឋានទេសចរណ៍នៅអមដងស្ទឹងសង្កែ ក្នុងស្រុកសំឡូត និងរតនមណ្ឌលបន្ទាប់ពីមានការហក់ឡើងនៃទឹកជំនន់ស្ទឹងសង្កែ។

លោក ហម អរុណ បានឱ្យដឹងថា មកដល់ពេលនេះកម្ពស់ទឹកស្ទឹងសង្កែនៅផ្នែកខាងលើមានការថយចុះមកវិញហើយ នឹងអាចបន្តស្រកចុះជាប្រក្រតីក្នុងពេលឆាប់ៗដ៏ខ្លីខាងមុខនេះ។

លោក ហម អរុណ ឱ្យដឹងបន្ថែមថា ក្នុងអំឡុងនៃការកើនឡើងកម្ពស់ទឹកនេះសង្កែមានរមណីយដ្ឋាន និងគោលដៅទេសចរណ៍មួយចំនួនបានរងផលប៉ះពាល់ដូចជា ការបាក់រលំដើមឈើមួយចំនួន ការហូរច្រោះដី ការចាក់បង្គរដីល្បាប់នៅកន្លែងមួយចំនួន ការខូចខាតរោងក្យូស និងសម្ភារៈមួយចំនួន។

លោក ហម អរុណ គូសបញ្ជាក់ថា បន្ទាប់ពីទឹកស្រកចុះ ម្ចាស់និងអ្នកគ្រប់គ្រងរមណីយដ្ឋានទេសចរណ៍បាននិងកំពុងរៀបចំកែលម្អកន្លែងដែលរងផលប៉ះពាល់ឡើងវិញ ដើម្បីទទួលភ្ញៀវទេសចរមកកម្សាន្តសប្បាយក្នុងរដូវកាលបៃតងជាបន្ត។

ក្នុងឱកាសនោះ លោក ហម អរុណ បានណែនាំដល់ម្ចាស់ និងអ្នកគ្រប់គ្រងរមណីយដ្ឋានទេសចរណ៍ដែលនៅជាប់ប្រភពទឹកទាំងអស់ត្រូវយកចិត្តទុកដាក់គិតគូរខ្ពស់ពីសុវត្ថិភាពភ្ញៀវនៅក្នុងរដូវវស្សាដែលកម្ពស់ទឹកមានការហក់ឡើងអាចបង្កឱ្យមានហានិភ័យផ្សេងៗ។

លោក ហម អរុណ ណែនាំដល់ម្ចាស់រមណីយដ្ឋានគោលដៅទេសចរណ៍ទាំងអស់ត្រូវរៀបចំនៃអនាម័យបរិស្ថានឱ្យបានល្អ,គិតគូរអំពីចំណត,ការសម្អាតថែរក្សាបន្ទប់ទឹកសម្រាប់ការទទួលភ្ញៀវ និងការផ្តល់នូវសេវាប្រកបដោយបដិសណ្ឋារកិច្ចជូនភ្ញៀវឱ្យមានភាពកក់ក្ដៅ។

លោក ហម អរុណ អំពាវនាដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិអញ្ជើញមកទស្សនាសម្រាកលម្ហែកម្សាន្តនៅក្នុងខេត្តបាត់ដំបងឱ្យបានច្រើនកុះករនៅក្នុងរដូវកាលបៃតងដែលមានទេសភាពធម្មជាតិស្រស់បំព្រងគួរជាទីគយគន់។

សូមជម្រាបថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានទាំងរមណីយដ្ឋានបែបប្រវត្តិសាស្រ្ត វប្បធម៌ ប្រពៃណី សិល្បៈ ម្ហូបអាហារ និងមានគោលដៅទេសចរណ៍សរុបចំនួន១១៥កន្លែងក្នុងនោះរួមមាន៖ រមណីយដ្ឋានទេសចរណ៍ចំនួន២២កន្លែង សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិទេសចរណ៍ចំនួន៤កន្លែង៕