ក្រសួងការងារ រៀបចំកិច្ចប្រជុំពិនិត្យអំពីវឌ្ឍនភាពការដោះស្រាយវិវាទបុគ្គលដោយក្រុមប្រឹក្សាអាជ្ញាកណ្តាល

ភ្នំពេញ៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងកិច្ចប្រជុំពិនិត្យវឌ្ឍនភាពការងារការដោះស្រាយវិវាទការងារដោយក្រុមប្រឹក្សាអាជ្ញាកណ្តាលជាមួយសមាជិកក្រុមប្រឹក្សាអាជ្ញាកណ្តាល​ លេខាធិការដ្ឋានក្រុមប្រឹក្សាអាជ្ញាកណ្តាល និងមូលនិធិក្រុមប្រឹក្សាអាជ្ញាកណ្តាល កាលពីពេលថ្មីៗនេះ នៅទីស្តីការក្រសួង ដែលមានអ្នកចូលរួមសរុបប្រមាណ ចំនួន ៣០នាក់។

ថ្លែងក្នុងឱកាសនោះ លោកជំទាវរដ្ឋលេខាធិការប្រចាំការ បានបញ្ជាក់អំពីសារៈសំខាន់នៃកិច្ចប្រជុំនេះក្នុងការពិនិត្យវឌ្ឍនភាពការងារការដោះស្រាយវិវាទបុគ្គលដោយក្រុមប្រឹក្សាអាជ្ញាកណ្តាល បន្ទាប់ពីប្រកាសលេខ០៩៨ ក.ប/ប្រ.ក.វ.ក ចុះថ្ងៃទី១៣ ខែមេសា ឆ្នាំ២០២៦ ស្តីពី ក្រុមប្រឹក្សាអាជ្ញាកណ្តាល ត្រូវបានដាក់ឱ្យអនុវត្ត។

តាមរយៈកិច្ចប្រជុំនេះ ដំណើរការនៃការបញ្ជូនសំណុំរឿងវិវាទបុគ្គលទៅដោះស្រាយបន្តនៅក្រុមប្រឹក្សាអាជ្ញាកណ្តាល និងដំណើរការដោះស្រាយដោយក្រុមប្រឹក្សាអាជ្ញាកណ្តាលប្រព្រឹត្តទៅដោយរលូននិងបន្តទទួលបានការគាំទ្រពីភាគីពាក់ព័ន្ធ។

សូមបញ្ជាក់ផងដែរថា ចាប់ពីថ្ងៃទី១១ ខែឧសភា ឆ្នាំ២០២៦ មក ក្រុមប្រឹក្សាអាជ្ញាកណ្តាលបានទទួលដោះស្រាយវិវាទបុគ្គល ដែលផ្សះផ្សាមិនសះជាដោយអ្នកផ្សះផ្សាវិវាទការងារ ស្របតាមនីតិវិធី និងវិធានដែលបានកំណត់ក្នុងប្រកាសលេខ០៩៨/២៦ ក.ប/ប្រ.ក.វ.ក ចុះថ្ងៃទី១៣ ខែមេសា ឆ្នាំ២០២៦ ស្តីពីក្រុមប្រឹក្សាអាជ្ញាកណ្តាល៕