ក្រសួងអប់រំ៖ បេក្ខជនប្រឡងជាប់បាក់ឌុបឆ្នាំនេះជាប់និទ្ទេស A ជាង ២ ០០០នាក់ ក្នុងនោះ រាជធានីភ្នំពេញជាប់ច្រើនជាងគេរហូតដល់ចំនួន ៧៨៣នាក់

ភ្នំពេញ៖ ក្រសួងអប់រំ យុវជន និងកីឡា បាន​ប្រកាសថា បេក្ខជនប្រឡងជាប់បាក់ឌុបឆ្នាំនេះសរុប ១២៥ ៩៧៥នាក់ ត្រូវជា ៨៤.០៦ភាគរយ ខណៈជាប់និទ្ទេស A ចំនួន ២ ០២២នាក់។ នេះបើតាម​សេចក្ដីប្រកាស​ព័ត៌មានរបស់ក្រសួង។

នៅព្រឹកថ្ងៃទី២ ខែកញ្ញា ឆ្នាំ២០២៦នេះ ការ​ប្រកាស​លទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ កំពុង​ប្រព្រឹត្តទៅនៅ នៅតាមមណ្ឌលសំណេរ នៅរាជធានី និងបណ្ដាខេត្តទូទាំងប្រទេស។

បើតាម​ក្រសួងអប់រំ លទ្ធផលប្រឡងបាក់ឌុបឆ្នាំនេះ បេក្ខជនប្រឡងជាប់សរុប ១២៥ ៩៧៥ នាក់ ត្រូវជា ៨៤.០៦ ភាគរយនៃចំនួន បេក្ខជនមកប្រឡង។ ក្នុងនោះបេក្ខជនជាប់និទ្ទេស A ចំនួន ២ ០២២ នាក់, និទ្ទេស B ចំនួន ៨ ៨៤៨ នាក់, និទ្ទេស C ចំនួន ២៣ ៤២២ នាក់, និទ្ទេស D ចំនួន ៤៤ ៨៦៩ នាក់, និងនិទ្ទេស E ចំនួន ៤៦ ៨១៤ នាក់។

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ១០ សីហា ២០២៦ មានបេក្ខជនចុះឈ្មោះប្រឡងសរុបចំនួន៖ ១៥១ ២៣៨ នាក់ (ស្រី ៨៤ ៧៣៥ នាក់)។ បេក្ខជនប្រឡងជាប់សរុប៖ ១២៥ ៩៧៥ នាក់ (៨៤.០៦%)។

តាមទិន្នន័យផ្លូវការរបស់ ក្រសួងអប់រំ សម្រាប់ការប្រឡងបាក់ឌុបឆ្នាំ២០២៦ (សម័យប្រឡង ១០ សីហា ២០២៦) ដែលមានបេក្ខជនជាប់និទ្ទេស A សរុប ២ ០២២ នាក់ ក្នុងនោះ រាជធានី និងខេត្តដែលមានចំនួនសិស្សជាប់និទ្ទេស A ច្រើនជាងគេទាំង ១០ រួមមាន​៖ រាជធានីភ្នំពេញ៖ ៧៨៣នាក់, ខេត្តកណ្តាល៖ ១៨៦ នាក់, ខេត្តសៀមរាប៖ ១៦៨ នាក់, ខេត្តកំពង់ចាម៖ ១០០ នាក់, ខេត្តព្រៃវែង៖ ៩៩ នាក់, ខេត្តបាត់ដំបង៖ ៩០ នាក់, ខេត្តបន្ទាយមានជ័យ៖ ៨៨ នាក់, ខេត្តតាកែវ៖ ៧៦ នាក់, ខេត្តត្បងឃ្មុំ៖ ៦៣ នាក់និង ខេត្តកំពត៖ ៦២ នាក់៕