ក្រសួងមហាផ្ទៃ សម្រេចផ្អាកការងារនគរបាលសេដ្ឋកិច្ចខេត្តស្វាយរៀងចំនួន ២រូប និង​ចាប់​ខ្លួន​បុគ្គល​ម្នាក់​ពាក់​ព័ន្ធ​យក​ប្រាក់​ពី​ពាណិជ្ជករ ៩ពាន់ដុល្លារ

កម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ កាលពីយប់ថ្ងៃទី២ ខែ​កញ្ញា ​ឆ្នាំ​២០២៦ បានចាប់ខ្លួនបុគ្គលម្នាក់ឈ្មោះ សុខ ធន់ នៅក្នុងភោជណីយ​ដ្ឋាន​មួយ​កន្លែង​ក្នុង​ក្រុង​បាវិត។ ការ​ចាប់​ខ្លួន​នេះ​ធ្វើ​ឡើង​តាម​ដី​កា​បញ្ជា​ឱ្យ​ចូល​ខ្លួន​របស់​តំណាង​អយ្យ​ការ​ខេត្ត​ស្វាយរៀង ​ដែលបញ្ជាឱ្យឈ្មោះ សុខ ធន់ ចូលបង្ហាញខ្លួន​នៅ​នាយកដ្ឋាន​នគរបាល​ព្រហ្ម​ទណ្ឌ​ឱ្យ​បាន​មុន​ថ្ងៃទី​២ ខែតុលា ឆ្នាំ២០២៦ ទាក់ទងបណ្ដឹងព្រហ្មទណ្ឌពីបទ កំហែងយក។ ករណីនេះត្រូវបានមើលឃើញថា បន្ទាប់ពីឈ្មោះ សុខ ធន់ បានធ្វើសកម្មភាពទារប្រាក់ និងទ​ទួល​យក​ប្រាក់​ពីពាណិជ្ជករចំនួន ៩០០០ដុល្លារ ជាថ្នូរនឹងការដោះលែងរថយន្តដឹកក្រណាត់ចំនួន ២​គ្រឿង កាលពីល្ងាចថ្ងៃទី៥ ខែសីហា ឆ្នាំ២០២៦។

ជាមួយគ្នានឹងករណីនេះដែរ កាលពីថ្ងៃទី២៨ ខែសីហា ឆ្នាំ២០២៦ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បាន​សម្រេច​ផ្អាក​ការងារ​បណ្តោះ​អាសន្ន​ចំពោះ​មន្ត្រី​នគរបាល​ចំនួន ២រូប នៃស្នងការដ្ឋាននគរបាលខេត្តស្វាយរៀង ចំណុះអគ្គស្នង​ការដ្ឋាន​នគរបាល​ជាតិ ​ដោយមូលហេតុ ល្មើសបទវិន័យនគរបាលជាតិកម្ពុជា។

នគរបាលទាំង ២រូប គឺវរសេនីយ៍ទោ ឈុន ឆាង អត្តលេខ ៦៩៩៨៨ នាយការិយាល័យ​នគរបាល​ប្រឆាំង​បទ​ល្មើសសេដ្ឋកិច្ច និងវរសេនីយ៍ត្រី យ៉ន បូណាវី អត្តលេខ ៦០១១៩ នាយរង​ការិយាល័យ​នគរបាលប្រឆាំងបទល្មើសសេដ្ឋកិច្ច ដោយរដ្ឋមន្ដ្រីក្រសួងមហាផ្ទៃ បានបង្គាប់​ឱ្យ​នគរបាល​ទាំង ២រូប ត្រូវទៅបង្ហាញមុខរៀងរាល់ម៉ោងធ្វើការនៅការិយាល័យបុគ្គលិក នៃស្នងការដ្ឋាននគរបាលខេត្តស្វាយរៀង រហូតមានការសម្រេចជាថ្មី។

វរសេនីយ៍ទោ ឈុន ឆាង នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តស្វាយរៀង ត្រូវបានពាណិជ្ជករម្នាក់ប្ដឹងទៅកាន់អយ្យការអមសាលាដំបូងខេត្តស្វាយរៀង កាលពីថ្ងៃទី៧ ខែសីហា ឆ្នាំ២០២៦ ពីបទ កំហែងយក ដោយបានចោទប្រកាន់លោក ឈុន ឆាង រួមទាំងបក្ខពួកថាបានឃាត់រថយន្តដឹកក្រណាត់ចំនួន២គ្រឿង ដោយគ្មានបញ្ជាក់ហេតុផលនៃកំហុសខុសឆ្គង និងគ្មានធ្វើឯកសារអ្វីទាំងអស់ ហើយបានបង្ខំកំហែងយកប្រាក់ពីពាណិជ្ជករចំនួន ១០០០០ដុល្លារ ប៉ុន្តែក្រោយមកក៏ព្រមព្រៀងគ្នាត្រឹម ៩០០០ដុល្លារ ដោយមានឈ្មោះ សុខ ធន់ ជាអ្នកតំណាងខាងនគរបាលទទួលយកប្រាក់ ៩០០០ដុល្លារនោះ ទើបប្រគល់រថយន្តដឹកក្រណាត់ទាំង២គ្រឿងឱ្យពាណិជ្ជករវិញ៕ អត្ថបទ៖ ប្រាក់ វ៉ាន់ដា