កម្ពុជា​នឹងចូលរួមកិច្ចប្រជុំថ្នាក់អគ្គនាយកអាកាសចរណ៍ស៊ីវិល ប្រចាំតំបន់អាស៊ីនិងប៉ាស៊ីហ្វិក លើកទី៦១ នៅម៉ាឡេស៊ី នៅសប្ដាហ៍ក្រោយ

ភ្នំពេញ៖ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នឹងដឹកនាំគណៈប្រតិភូកម្ពុជាទៅអញ្ជើញចូលរួមកិច្ចប្រជុំថ្នាក់អគ្គនាយក អាកាសចរណ៍ស៊ីវិល ប្រចាំតំបន់អាស៊ីនិងប៉ាស៊ីហ្វិក លើកទី៦១ ដែលនឹងប្រព្រឹត្តទៅចាប់ពីថ្ងៃទី៧ ដល់ ថ្ងៃទី១១ ខែកញ្ញា ឆ្នាំ២០២៦ នៅទីក្រុងគូឡាឡាំពួ ប្រទេសម៉ាឡេស៊ី។

កិច្ចប្រជុំនេះនឹងរៀបចំឡើងក្រោមប្រធានបទ «ដែនអាកាសឆ្លាតវៃ៖ បច្ចេកវិទ្យាដែលកំពុងរីកចម្រើន សម្រាប់អាកាសចរណ៍ ប្រកបដោយសុវត្ថិភាព, សន្តិសុខ, ចីរភាព, និងប្រសិទ្ធភាព» ដោយផ្តោតលើការពិភាក្សាអំពីនិន្នាការថ្មីៗ, បច្ចេកវិទ្យាទំនើប និងដំណោះស្រាយប្រកបដោយភាពច្នៃប្រឌិត ដើម្បីជំរុញការអភិវឌ្ឍវិស័យអាកាសចរណ៍ក្នុងតំបន់។

ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល (SSCA) បានបញ្ជាក់ថា ការចូលរួមរបស់គណៈប្រតិភូកម្ពុជា គឺជាការបង្ហាញពីការប្តេជ្ញាចិត្តដ៏មុតមាំរបស់រាជរដ្ឋាភិបាលកម្ពុជា ក្នុងការពង្រឹងកិច្ចសហប្រតិបត្តិការអាកាសចរណ៍ក្នុងតំបន់ និងជំរុញការអនុវត្តស្តង់ដា និងអនុសាសន៍របស់អង្គការអាកាសចរណ៍ស៊ីវិលអន្តរជាតិ (ICAO)។ ជាមួយគ្នានេះ កម្ពុជានឹងបន្តលើកកម្ពស់សុវត្ថិភាព និងសន្តិសុខអាកាសចរណ៍ជំរុញបរិវត្តកម្មឌីជីថល និងការប្រើប្រាស់បច្ចេកវិទ្យាទំនើប ព្រមទាំង គាំទ្រការអភិវឌ្ឍវិស័យអាកាសចរណ៍ប្រកបដោយចីរភាព។

ឯកឧត្តម មានប្រសាសន៍ថា ៖ «កិច្ចប្រជុំថ្នាក់អគ្គនាយកអាកាសចរណ៍ស៊ីវិល ប្រចាំតំបន់អាស៊ីនិងប៉ាស៊ីហ្វិក លើកទី៦១ គឺជា វេទិកាយុទ្ធសាស្ត្រដ៏សំខាន់មួយសម្រាប់កម្ពុជា ក្នុងការផ្លាស់ប្តូរទស្សនៈ ចែករំលែកបទពិសោធន៍ និងឧត្តមានុវត្តន៍ជាមួយថ្នាក់ដឹកនាំ និងអ្នកជំនាញអាកាសចរណ៍មកពីបណ្តាប្រទេសក្នុងតំបន់។ វេទិកានេះនឹងរួមចំណែកពង្រឹងទំនាក់ទំនង, ភាពជាដៃគូជាមួយ អង្គការអាកាសចរណ៍ស៊ីវិលអន្តរជាតិ (ICAO) និងសហគមន៍អាកាសចរណ៍អន្តរជាតិ ព្រមទាំង បើកចំហកាលានុវត្តភាពថ្មីៗ ដើម្បីពង្រីកការតភ្ជាប់ផ្លូវអាកាស, កសាងសមត្ថភាពធនធានមនុស្ស និងធ្វើទំនើបកម្មប្រព័ន្ធអាកាសចរណ៍កម្ពុជា»។

កាលពីឆ្នាំទៅ កិច្ចប្រជុំថ្នាក់អគ្គនាយកអាកាសចរណ៍ស៊ីវិលប្រចាំតំបន់អាស៊ីនិងប៉ាស៊ីហ្វិក លើកទី៦០ ត្រូវបានប្រារព្ធឡើងយ៉ាងជោគជ័យនៅទីក្រុងសេនដៃ (Sendai) ប្រទេសជប៉ុន កាលពីថ្ងៃទី២៨ ខែកក្កដា ដល់ ថ្ងៃទី១ ខែសីហា ឆ្នាំ២០២៥ ក្រោមប្រធានបទ «ផ្ទៃមេឃប្រកបដោយចីរភាពនៃតំបន់អាស៊ីប៉ាស៊ីហ្វិក»៕អត្ថបទ៖ ធូ វិរៈ