គណៈប្រតិភូរដ្ឋសភាកម្ពុជា​ អញ្ជេីញចូលរួមកិច្ចប្រជុំប្រចាំឆ្នាំលេីកទី៧ របស់ក្រុមប្រឹក្សាពិគ្រោះយោបល់ស្តីពីគ្រឿងញៀន (The 7th AIPACODD) នៅប្រទេសឡាវ

ភ្នំពេញ៖ គណៈប្រតិភូរដ្ឋសភាកម្ពុជា ដឹកនាំដោយ​ ឯកឧត្តម ទី សុគន្ធ លេខាធិការគណៈកម្មការទី៥ រួមជាមួយ​ លោកជំទាវ អ៊ុន សុគន្ធា លេខាធិការគណៈកម្មការទី៤ ឯកឧត្តម ងួន សុជាតិ សមាជិកគណៈកម្មការទី៧ និងឯកឧត្តម​ ហ៊ាង ធុល​ ប្រធាននាយកដ្ឋានទំនាក់ទំនងអន្តរជាតិ​ នៃរដ្ឋសភា បានអញ្ជេីញចូលរួមកិច្ចប្រជុំលើកទី៧នៃគណៈកម្មាធិការពិគ្រោះយោបល់ស្តីពីគ្រឿងញៀនរបស់អន្តរសភាអាស៊ាន(AIPA) នៅទីក្រុងហ្លួងព្រះបាងនៃសាធារណរដ្ឋប្រជាធិបតេយ្យប្រជាមានិតឡាវ ពីថ្ងៃទី៦-៨ ខែសីហា ឆ្នាំ២០២៤។

កិច្ចប្រជុំនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់​ ឯកឧត្តម Khambay DAMLATH អនុប្រធានរដ្ឋសភាឡាវ ដោយមានការស្វាគមន៍ពី​ ឯកឧត្តម​ Khamkhan Chanthavisouk អភិបាលខេត្តហ្លួងព្រះបាង និងការចូលរួមពីសភាប្រទេសជាសមាជិកអាយប៉ា ចំនួន៩ប្រទេស លើកលែងតែសភាសហភាពមីយ៉ាន់ម៉ាមិនបានចូលរួម។ ក្នុងនោះក៏មានការចូលរួមចែករំលែកព័ត៌មាន​ និងបទពិសោធពីបញ្ហាពាក់ព័ន្ធនឹងគ្រឿងញៀន ដូចជា៖ តំណាងក្រសួងសន្តិសុខសាធារណៈនៃសាធារណរដ្ឋប្រជាមានិតឡាវ​ តំណាងឧត្តមមន្ត្រីអាស៊ានស្តីពីបញ្ហាគ្រឿងញៀន(ASOD) និងតំណាងការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម(UNODC)​ ។ល។