ទូតកម្ពុជាប្រចាំនៅសាធារណរដ្ឋកូរ៉េ ជួបជាមួយអាជ្ញាធរកូរ៉េ និង​ស្នើជួយ​គាំទ្រ​ការ​ធ្វើ​ទំនើប​កម្ម​វិស័យ​កសិកម្ម​មានសក្ដានុពលនៅកម្ពុជា

ភ្នំពេញ៖ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បាន​អញ្ជើញ​ជួប​សំណេះ​សំណាល និងពិភាក្សាការងារជាមួយលោក Baek Seong-hyeon អភិបាល​ក្រុង​នួន​សាន់ ​នៅសាលាក្រុងនួនសាន់ ខេត្តឈុងឆង់ណាមដូ សាធារណរដ្ឋកូរ៉េ ដែលក្នុងជំនួបនេះ ឯកឧត្តម​ឯកអគ្គរដ្ឋទូតបានស្នើដល់ភាគីកូរ៉េ ជួយគាំទ្រការ​ធ្វើ​ទំនើប​កម្ម​លើ​វិស័យ​កសិកម្ម​មាន​សក្ដានុពល​នៅក្នុ​ងប្រទេសកម្ពុជា ។

ក្នុងជំនួបនោះ ឯកឧត្តមឯកអគ្គរាជទូត បានសម្តែងការអបអរសាទរ ចំពោះលោក Baek ដែល​ត្រូវ​បាន​ប្រជាពលរដ្ឋក្រុងនួនសាន់ បានផ្តល់ទំនុកចិត្ត និងបោះឆ្នោតជូនលោក សម្រាប់​តំណែង​អភិបាល​ក្រុង​នួនសាន់អាណត្តិ ទី២របស់លោក ។

ក្នុងឱកាសនោះ លោក Baek បានជម្រាបជូន ឯកឧត្តមឯកអគ្គរាជទូត ថាក្នុងអាណត្តិទី២នេះ លោក​មាន​បំណងអភិវឌ្ឍក្រុងនួនសាន់ ឱ្យក្លាយជាទីក្រុង ដែលមាន​សក្តានុពល​ផ្នែក​ឧស្សាហកម្ម​យោធា និងកសិកម្ម ហើយលោកបានអញ្ជើញទូតកម្ពុជា ចូលរួមកម្មវិធី “ពិព័រណ៍​ឧស្សាហកម្ម​ស្ត្របឺរី​ពិភពលោកនួនសាន់ ២០២៧- 2027 Nonsan World Strawberry Industry Expo” នៅដើមឆ្នាំ២០២៧ ខាងមុខនេះផងដែរ ។

ជាការឆ្លើយតប ឯកឧត្តម ឃួន ផុនរតនៈ បានថ្លែងអំណរគុណ ចំពោះការ​អញ្ជើញ​សម្រាប់​កម្ម​វិធី​ពិព័រណ៍​ខាង​លើ ហើយឯកឧត្តមក៏បានអញ្ជើញលោកអភិបាលក្រុង មកបំពេញទស្សន​កិច្ច​នៅ​កម្ពុជា ​និងពិភាក្សាអំពីការចងសម្ព័ន្ធមេត្រីជាមួយខេត្តណាមួយក្នុងប្រទេសកម្ពុជា ដែល​មាន​សក្តានុពល​ស្រដៀង​នឹងក្រុងនួនសាន់ ។

ទន្ទឹមនឹងគ្នានេះ ដោយសម្លឹងឃើញពីគម្រោងអភិវឌ្ឍន៍ របស់ក្រុងនួនសាន់ ឯកឧត្តម​ឯក​អគ្គ​រដ្ឋ​ទូត ​ក៏បានស្នើសុំក្រុងនួនសាន់ សហការក្នុងការធ្វើទំនើបកម្ម នៃវិស័យកសិកម្មកម្ពុជា ពិសេស​លើ​ដំណាំ​ឧស្សាហកម្មដូចជា ស្រូវ និងគ្រាប់ស្វាយចន្ទីជាដើម ព្រមទាំងស្នើ​លោក​អភិបាល​ក្រុង​ពិចារណា ​នាំយកបច្ចេកទេសដាំដុះស្ត្របឺរីដ៏ល្អរបស់នួនសាន់ ទៅកាន់ប្រទេសកម្ពុជា។ លើស​ពី​នេះ ឯ​កឧត្តមក៏បានស្នើសាលាក្រុងជួយជំរុញបន្ថែម លើកិច្ចសហការរវាងសាកលវិទ្យាល័យ Konyang និងសាកលវិទ្យាល័យយោធារបស់កម្ពុជាផងដែរ ។

បន្ថែមពីនេះ ភាគីទាំងពីរ ក៏បានពិភាក្សាអំពីទិសដៅសហប្រតិបត្តិកា ររវា​ងស្ថា​នទូ​ត​កម្ពុជា​ប្រចាំ​នៅ​សាធារណ​រដ្ឋកូរ៉េ និងក្រុងនួនសាន់ និងកិច្ចសហការ​ក្នុង​ការ​គាំពារ​អត្ថ​ប្រយោជន៍​របស់​ប្រជាជន​កម្ពុជា​​ ដែលកំពុងរស់នៅក្នុងតំបន់នួនសាន់ផងដែរ៕ អត្ថបទ បាន សុខរិទ្ធិ