ពលរដ្ឋ និងយុវជន៖ វត្តមានសម្ដេចធិបតីបន្តចុះដល់មូលដ្ឋានជាស្ពានតភ្ជាប់ទំនុកចិត្តរវាងរដ្ឋ និងរាស្រ្ដ

ប្រជាពលរដ្ឋ និងយុវជន លើកឡើងថា វត្តមានសម្ដេចធិបតី ហ៊ុន ម៉ាណែត នាយករដ្ឋមន្រ្ដី បន្ត​ចុះ​ដ​ល់មូលដ្ឋាន ជួបប្រជាពលរដ្ឋ និងពិនិត្យការអនុវត្តការងារជាក់ស្ដែងរបស់មន្រ្ដី គឺជាស្ពាន​តភ្ជាប់​ទំនុក​ចិត្តរវាងរាជរដ្ឋាភិបាល និងប្រជាពលរដ្ឋ ។

លោក ផ្លុង សៀវឡៃ និស្សិតកំពុងសិក្សា ជំនាញនីតិសាស្រ្ដ ឆ្នាំទី៣ នៃពុទ្ធិកសាកល​វិ​ទ្យា​ព្រះសីហមុនី​រាជា ក្នុងរាជធានីភ្នំពេញ បានប្រាប់ BTV ថា ក្នុងនាមជាយុវជនមួយរូប លោកមាន​មោទន​ភាព​ចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី ដែលបានដឹកនាំប្រទេស បន្តការអភិវឌ្ឍ បម្រើសេចក្ដីត្រូវការរបស់ប្រជាពលរដ្ឋ។ ហើយចំពោះ​សកម្មភាព​ដែល​សម្ដេច​ធិបតី បន្តចុះដល់មូលដ្ឋានដោយផ្ទាល់ មិនស្ដាប់តែរបាយការណ៍របស់មន្រ្ដី លោកពេញចិត្ត ពី​ព្រោះ​នេះ ​គឺជាការពិនិត្យជាក់ស្ដែង ការអនុវត្តការងាររបស់មន្រ្ដីបម្រើប្រជាពលរដ្ឋ និងស្ដាប់​រាល់​បញ្ហា​របស់​ប្រជាពលរដ្ឋ។

កញ្ញា វ៉ន វាសនា និស្សិតកំពុងសិក្សានៅពុទ្ធិកសាកលវិទ្យាល័យព្រះសីហមុនីរាជា និងជា​ពលរដ្ឋ​ម​ក​ពី​ខេត្តរតនគិរី បានប្រាប់ថា រយៈពេល ៣ឆ្នាំកន្លងមកនេះ កញ្ញាឃើញថា មូលដ្ឋានខេត្តរតនគិរី របស់​កញ្ញា មានការអភិវឌ្ឍបានល្អច្រើន ពិសេសគឺហេដ្ឋារចនាសម្ព័ន្ធផ្លូវថ្នល់។ កញ្ញា ថា ផ្លូវគឺជា​រឿង​សំខាន់សម្រាប់អ្នកនៅខេត្តភូមិភាគឦសាន ពីព្រោះនៅរដូវវស្សាតែងតែលិចទឹក បង្កការ​លំបាក​ក្នុងការធ្វើដំណើរ។ ប៉ុន្ដែចាប់តាំងពីសម្ដេចធិបតី ចូលកាន់ដំណែង និងបានអញ្ជើញ​ទៅ​ដល់​ខេត្តភូមិភាគឦសាន ហេរដ្ឋារចនាសម្ព័ន្ធត្រូវបានអភិវឌ្ឍល្អយ៉ាងខ្លាំង ដែលលទ្ធផលនេះ គឺ​កើត​ចេញពីការចុះដល់មូលដ្ឋានដោយផ្ទាល់។

ចំណែកលោក អ៊ុត​ អឿ ប្រជាពលរដ្ឋ រស់នៅក្នុងស្រុកស្អាង ខេត្តកណ្ដាល បានប្រាប់ថា លោក​កត់​សម្គាល់ឃើញឥរិយាបថរបស់សម្ដេចធិបតិ ដែលចុះជួបពលរដ្ឋនៅមូលដ្ឋាន ប្រកប​ដោយ​ភាព​សាមញ្ញ។ លោកថា នៅពេលឃើញសកម្មភាពរបស់ថ្នាក់ដឹកនាំ ជួបពលរដ្ឋ​ដោយ​ភាព​ស្និត​ស្នាល​បែប​នេះ​​លោករំភើប ដែលទទួលបានថ្នាក់ដឹកនាំដែលមានទឹកចិត្តកក់ក្ដៅចំពោះពលរដ្ឋបែបនេះ។ លោកចង់ឃើញ សម្ដេចធិបតី បន្តអញ្ជើញទៅឱ្យបានគ្រប់បណ្ដាខេត្តដើម្បីស្ដាប់រាល់តម្រូវការរបស់ប្រជាពលរដ្ឋ។

គួររំឭកជូនថា សម្ដេចមហាបរវធិបតី ហ៊ុន ម៉ាណែត នាយករដ្ឋមន្រ្ដី បានចាប់ផ្ដើមចុះដល់មូលដ្ឋានតាមបណ្ដាខេត្តនានា ដោយគ្មានការជូនដំណឹងជាមុនទៅអាជ្ញាធរនោះឡើយ ដើម្បីពិនិត្យការអនុវត្តការងារ របស់មន្រ្ដី និងស្ដាប់រាល់បញ្ហាប្រឈមរបស់ប្រជាពលរដ្ឋ។ ការអញ្ជើញចុះដល់បណ្ដាខេត្ត ដោយមិនជូនដំណឹងជាមុន មិនមែនជាការចាប់កំហុសរបស់មន្រ្ដីនោះឡើយ ប៉ុន្ដែនេះគឺជាការកែទម្រង់វិធីសាស្រ្ដធ្វើការ និងគ្រប់គ្រង តាមបែបអភិបាលកិច្ចល្អ។ ការចុះដល់មូលដ្ឋាន គឺជាការពង្រឹងការទទួលខុសត្រូវ នាយករដ្ឋមន្រ្ដីទទួលបានទិន្នន័យពិតដើម្បីដោះស្រាយបញ្ហា កសាងវប្បធម៌ធ្វើការដោយស្មោះត្រង់ និងលើកទឹកចិត្តមន្រ្ដីធ្វើការល្អ។ ហើយអ្វីដែលរឹតតែសំខាន់ទៀតនោះ គឺបង្កើនទំនុកចិត្ត និងភាពស្និតស្នាល រវាងប្រមុខរាជរដ្ឋាភិបាល និងប្រជាពលរដ្ឋ៕ អត្ថបទ៖ លៀ ស៊ីណា